نوکجو بازار (حصہ دوم)

مکران روڈ پارکرکے شمال کی طرف رُخ کرتا ہوں تو میرے دائیں ہاتھ کی طرف تقریباً 20 یا 25 کمرے ایک لائن میں تعمیر شُدہ ہیں۔جِن میں پہلے 10 کمرے ایک دوسرے سے جُڑے ہوئے ہیں اُن کے بعد ایک دو کمروں جتناخالی جگہ ہے جِس پر کوڑا کرکٹ پڑا ہوا ہے۔پھر تقریباََ 7 یا 8 کمرے ہیں اور ایک دروازے جتنا گلی ہے پھر دو تین کمروں کے بعد ایک کمرے جتنا خالی جگہ ہے اور اُس سے آگے اور تھوڑا سا پیچھے ایک کمرہ ہے۔اِس کمرے کے بعد وہی ندی ہے جہاں سے میں بازار میں داخل ہوا۔یہ کمرہ بھی ایک دکان ہے اور اِس لائن میں تعمیر تمام کمرے دکانیں ہیں لیکن اِن میں فعال دکانیں بس چند ہی ہیں۔باقی سارے کمرے خالی ہیں۔چلیں دوبارہ یہاں سے شروع کرتے ہیں لیکن اَب کے کچھ اُلٹا ہے۔یعنی کہ اِس بار کی دکانیں میرے الٹے ہاتھ پر ہیں اور میرا رُخ دوبارہ جنوب کی جانب ہے۔

اِس ہاتھ پر جو پہلا دکان ہے۔یہ دکان قادربخش کے نام پر مشہور ہے۔اِس میں قادر بخش اور اُس کا بڑا بیٹا “باقی” ہوتے ہیں۔یہ دکان بھی پرچون کی دکان ہے لیکن اِس میں بچّوں کی چیزیں موجود ہوتی ہیں۔اِس دکان کے سامنے کنکریٹ کا ایک چبوترہ ہے۔ قادربخش سے میری زیادہ واقفیت نہیں۔بس اتنا یاد ہے کہ ایک خوش شکل اور درازقد بوڑھا تھا جو اپنی داڑھی اور بالوں میں مہندی لگاتا تھا۔

قادر بخش کی دکان بازار کی دیگر دکانوں کے ساتھ مِلا ہوا نہیں تھا۔وہ دراصل قادر بخش کے گھر کا حصہ تھا جس کا دروازہ سڑک اور بازار کی جانب کھول کر دکان بنایا گیا تھا۔وہ قطار کے لحاظ سے تھوڑا سا پیچھے کی جانب اور گھر کی چاردیواری سے مِلا ہوا تھا۔اُس سے آگے بازار تھوڑا سا آگے تھوڑا سا تِرچھا ہوکر پھر سیدھا ہوجاتا تھا اور ایک اور قطار بن جاتا تھا۔مجھے اُس قطار میں دکانوں کی ترتیب یاد نہیں البتہ کچھ سال بعد رمضان کی دکان اُس قطار میں شفٹ کردی گئی۔قادربخش کی دکان کے بعد جو دکان میری یاداشت میں محفوظ ہے وہ ناکو دوست محمد کی فروٹ اور سبزیوں کی دکان تھی۔ناکو دوست محمد کو بھی مشکے والے بلوچی لہجے میں “دوزُمد” بولا جاتا تھا۔اور یہ دکان “دوزمُدی ” دکان کے نام سے مشہور تھاجس میں زیادہ تر حبیب ولد دوست محمد ہی بیٹھتا تھا۔کبھی کبھی اُس کا بھائی شاید “عبدالرؤف” بیٹھتا تھا۔ناکو دوست محمد کا بیٹا حبیب ایک ملنسار اور شاہ یار لڑکا تھا۔جب وہ دکان پر بیٹھتا تو اُس دکان میں رونق لگ جاتی۔نوکجو میں کچھ خاص لڑکوں کے علاوہ باقی سب میں ایک طرح کا مشترکہ یارانہ چلتا تھا۔کچھ دوست یاز گہرے تعلق میں تھے وہ سارا دِن ساتھ رہتے۔ایسے دوست جنہیں آپ ہم پیالہ و ہم نوالہ کہتے ہیں۔باقی سب ایک دوسرے کےدوست تھے اُن کی آپسی تعلقات میں محبت تو تھی۔ایک دوسرے کا احترام تھا لیکن پیالہ و نوالہ کے اشتراک سے ماورا۔

۔۔۔۔۔۔۔۔۔۔جاری ہے۔۔۔۔