میڈیکل ٹیسٹءِ گونڈوءُ وتکُشی:نصرت آزاد
میڈیکل ٹیسٹءِ گونڈوءُ وتکُشی:
زی منءَ یکےءَ میسنجرءَ میسج کُت کہ منءَ لھتیں سوج بدئے (من وَ چُشیں زانتکارے نہ آں، ناں کہ تبزانتے آں) من جُست کُت چونیں سوج گُڑا گُش ایت کہ من انیگیں میڈیکل ٹیسٹ فیل کُتگ من سک دلپروش آں۔۔۔۔من کمو دلبڑی دات۔ مرد کمو Motivate بیت۔ ھیر۔۔۔
چنچو جنکوءُ بچکوءَ دنیگہ میڈیکلءِ ٹیسٹءَ فیل کنگءَ پد وتکُشی کُتگ؟ باز درور دست کپ ایت۔ منی ھیالءَ گیشتریں گونڈو تُربتءِ بیتگ انت۔ سوب چے انت؟
اِشیءِ سوب باز بیت کن انت بلئے منی دلءَ مستریں سوب سئے انت۔ بْیا اِشاں چاریں:
اولی Career Counselling انت:
مئے کرّءَ چُشیں مردمءِ جند نیست کہ نودربراں بہ چار ایت، آھاں بہ تپّاس ایتءُ بہ گُش ایت کہ آئیءِ واستہ کُجام field شر انت۔ کیرئیر کونسلنگ ایوکءَ راہءَ سوج نہ دنت بلکں اے ھم گُش ایت کہ کُجام راہءَ ترا چے وڑیں جیڑہ دیمءَ کئیتءُ آ چے وڑ شر کنئگ بنت۔ آ مردمانی تبءَ چار ایتءُ سوج دنت۔۔۔۔۔ کُجام ڈپارٹمنٹءَ آ شرتِر ونت کنت۔ کُجام راہءَ آ سپر کُت کنت۔ پمشکا گونڈو گار انت، گْوات ھما دیمءَ کہ کش ایت گونڈو ھما دیمءَ رو انتءُ گیشتر بے سوب بنت۔
دومی Borrowed Dreams انت:
بلوچیءَ منی ھیالءَ اشیءَ “وام زُرتگیں یا بدل زُرتگیں واب” گُشگ شر انت۔ گیشتر نودربر میڈیکلءَ ھمے واستہ کاینت پرچا کہ اے آھانی پِتءِ، ماتءِ، بْراتءِ یا دگہ سْیادےءِ واب بیتگ کہ پلانی ڈاکٹرے بہ بیت۔ منی نزّءَ مستریں سوب ھم ھمیش انت وتکُشیءِ پرچا کہ ما وتءَ سرین پروش کنیں پہ دگہ یکےءِ وابانی سرجم کنئگءَ۔۔۔۔وھدے کہ کُت نہ کنیں گُڑا دلپروش بئیںءُ وتکُشی کن ایں۔
سیمی Over Commitment انت:
وھدے کہ گونڈو گند انت کہ مئے گوما وانگ بئیگءَ نہ انت (یا وَ آ سائنسءِ وانگءَ سک نزور انت یا آھاں ھُب نیست بس بدل زُرتگیں وابانی سرجم کنئگءِ جُھدءَ انت) گُڑا آ سک باز Commitment کن انت۔ “منءَ کنئگی انت، ھر وڑءَ کنئگی انت” اشیءِ سوبءَ آ وتءَ چہ سنگتاں دیر کن انت۔ موبائلاں بند کن انت۔ دیوان نہ کن انت۔۔۔۔۔وانگءِ توکا ایوکءَ وانگ المی نہ انت، کوٹیءَ در آھگ، سنگتاں گوں نندگءُ چاھےءِ ورگءُ وتی دلءِ زنگانی ریچگ، سوتےءِ گوشدارگءُ وتءَ سُبک تِر کنئگ، یک کندینگی تامرےءِ چارگ ھم المی انت۔۔۔۔۔بلئے وھدے وتءَ اشاں چہ سند انت بلئے انگت ٹیسٹءَ فیل کن انت گُڑا دوبر سنگتانی دیمءَ وتی دلءِ زنگاں ریتک نہ انت، ناں کہ لوگءَ فونے کُت کن انت (یکے وَ اِش انت کہ مئے کرّءَ کس نہ زانت کہ depression، anxiety یا چُشیں دگہ ھزارانی ھسابءَ نادراھی ھست) گُڑا گُڈّی راہ وتکُشی انت۔۔۔۔۔ءُ آ کنت۔
توجیل اش انت:
1: ماتءُ پتاں گوں دستبندی انت کہ وتی ناسرجمیں وابانی باراں وتی چُکّانی کوپگءَ مہ دئے اِتءُ آھاں سرین پروش مہ کن اِت۔
2: چاگردءَ اے پھمگی انت کہ depressionءِ وڑیں نادراھی ایوکءَ انگریزاں نہ بیت بلکں ھمک انسانءَ بیتءُ مارا وتی چُکءُ بْراتءُ گُھار گوشدارگی انت۔۔۔۔اے راستی یے۔
3: نودربر ھم بچار انت کُجام field آھاں وش بیت، آ ونت ئے کن انت نی ھما fieldءَ برو انت۔
4: نودربر over commit مہ کن انت۔ اگاں چیزے نہ بیت گُڑا یلہ ئے دئے۔۔۔۔وتءَ مہ کُش اِت۔
5: میڈیکل زندگیءِ گُڈّی راہ نہ انت دگہ ھم مُچ انت۔