چمشانک: یاسرکریم دشتی

نزر دوست ءِ گدار: مات ھَور ءِ سر ءَ اَت –

گدارنَبیسّی ءِ پِڑ ءَ باز کم ندکار گِندگ ءَ کیت اگاں بچارے پہ لنکک ھساب بنت نزردوست ءَ ھم ھمے پڑ ءَ وتی اولی جھد:مات ھَور ءِ سر ءَ اَت :چہ بندات کُتگ باز وشیں گپے کہ مئے ندکار گدار ءِ نیمگ ءَ دلگوش دَیگ ءَ اَنت وشی ءِ گپ ایش اِنت کہ بلوچی لبزانک تہ ءَ نزر دوست اولی گدار نَبیسّ اِنت کہ آئی ءِ گدار:مات ھَور ءِ سر ءَ اَت :یکیں سال ءَ دو رند ءَ چاپ ءُ شنگ بیتگ اولی چاپ جون ءَ ءُ دومی ۔اپ نومبر ءَ بوتگ اد ءَ ھمے زانگ بیت کہ نزردوست ءِ وانوک باز اَنت – نوں بیاگدار ءِ نیمگ ءَ راویں

مات ھَور ءِ سر ءَ اَت نود ءُ ھشت تاکدیم اِنت تاکدیم دو ءَ من گنداں ھیراں باں کہ گالسنج کنوکے نام ماں نہ اِنت سرتاک کُج ءَ زورگ بوتگ یا کئے جوڑ کتگ۔

گالسنج ءِ بابت ءَ نزردوست وتی سر دانک تہ ءَ نِبشتہ کنت تاکدیم چار ءَ منتوار مجیب ولی ءُ ھاسل نور ءِ کہ گالسنج ءَ منی کُمک اِش کتگ بلے سرتاک کشوکے نام زاھر نہ اِنت-

گدار ندر کنگ بوتگ پہ ھَما بچاں کہ مات ءِ مھر اِش زرتگ – گدار ھشت در ءِ تہ ءَ نِبشتہ کنگ بوتگ ھر دَر ءَ را نامے دَیگ بوتگ گدار ءَ وانے ترا ھمے گندگ کیت کہ دگنیا متلب پرست ءُ مردگ پرست جوڑ بوتگ زیارت پرست ءُ پیر پرست جوڑ بوتگ مات ھَور ءِ سر ءَ اَت مستریں کارست داد مھمد کمال اِنت دومی آئی ءِ دوستگیں مِنڈ توکی اِنت میتگ ءِ دراھیں مردم داد مھمد کمال ءِ سر ءَ زھر اَنت کہ داد مھمد کافرے نماز پرچہ نہ کنت زکر پرچہ نہ کنت چندہ پرچہ نہ دنت تبلیکی مُلاھاں پرچہ نہ منّ اِت؟

داد مھمد کمال ءِ چمان درستیں مردمانی نماز زکر چندہ ءُ ھیرات پہ نام ءِ واست ءَ اَنت ۔ایشانی تہ ءَ ایمان نیست پمیشکا ایشاں نہ منّ اِت.داد مھمد انسانے بلے آئی منڈ توکی کُچکے ھیوانے وت پدر کنگ ءَ اِنت کہ کس ءَ ایمان نیست مردم دوستی ءُ وتن دوستی وپاداری ھِچ نِیست سیمی در ءَ تاکدیم سی ءُ چار ءَ اے نِبشتہ اِنت مات ءَ دگہ گپے ھم جتگ اَت کہ توکی ءَ دگہ شوم ءُ سِلیں آدتے ھم گوں بوتگ توکی کہ وھدے زاتگ چُک ءُ چلانگی بوتگ برے شش برے ھپت گُلڑے آورتگ کھمبت ءَ روچے یک گُلڑے وارتگ ھَپتمی روچ ءَ ھونڈے ھالیک کتگ داد مھمد ءِ منڈ توکی ءَ پرچہ وتی گُلڈ وارتگاں؟ توکی پد ءَ ھمے پدر کنگ ءَ اِنت کہ اد ءَ مردم نیست اد ءَ درست رستر اَنت اد ءَ مردماں ایمان نیست توکی ءَ زانتگ کہ من وتی چُکاں مہ وراں اد ءَ منی چُک بزگ ءُ ھزاب بنت ھمے انسان رنگیں رسترانی ھرجان بنت بس اِنت کہ من چمداری ءُ گلامی کنگ ءَ اَنت پہ شات نہ بوگ ءُ دوستی ءُ وتی گُلڑے وارتگاں-

اد ءَ دو چیز پدر اِنت یکے ھمے جونیں ماھولے ترس ءُ دومی مھر دوستی وتی چُکے وارتگاں میتگ ءِ درستیں مردماں داد مھمد ءَ رابے نمازی ءُ کافر گشتگ بلے اسل ءَ دادمھمد کمال نیکیں مردمے اَت زند ءَ آئی ءِ کدر کس ءَ نہ زانت بلے مرگ ءَ پد آئی ءِ کتگیں نیکی زاھر بوتاں ھرکس ءَ دیست کہ آئی ءِ کبر ءِ سر ءَ شپ ءُ روچ چراگ روک اَت ھپمتی در ءَ اے گپ پدریں کہ داد مھمد یک نیکیں ءُ بزرگیں انسانے بوتگ-

گدار نویسی ءِ پڑ ءَ نزردوست ءَ جوانیں جھدے کتگ ءُ آئی ءِ اے جھد ستاکرزیت دگر ءَ نہ زاناں بلے من ءَ نزر دوست ءِ گدار بے کساس دوست بوت-

ھما گدار یا آزمانکی دپتر کہ من ءَ دوست بیت من آئی ءِ سر ءَ الم وتی ھیالاں درشان کناں-

گڈسر ءَ ھمے امیت اِنت کہ نزر دوست وتی گاماں لبزانک ءِ پڑ ءَ ترند تر کنت-

ھلاس