وابانی تہ ءَ بستگیں کلات

اکرم ارس

تو وتی کوٹی ءِ تہ ءَ وپتگ ئے ءُ وشیں واب گندگ ءَ ئے، وابانی تہ ءَ تئی بستگیں کلات انچو مھکم انت ڈن ءِ چست ھیرانی نہ توارے گوشاں کپ ایت نہ بوھے جنت

تو انچو وش واب ئے نہ ترا گوست گیر کیت نہ ترا باندات ئے سما ھست

وھد گوزان انت جھان ءَ دگہ پندے بُر اتگ بلے تو انگت ھما وش وابی ءَ ئے

تو واب ءَ گند ئے منی کلات ءِ دریگ پچ بوت دریگ ءَ چہ زندگی ءَ سر کش ات ھمے دمان تئی وابانی کَلات پُرشت تو چم چست کت انت چپ چاگرد چار اِت داں منی بستگیں کلات گار انت تو چم شانک دات وتی کوٹی ءِ دپ ءَ تو گند ئے پیرزالے اوشتاتگ دست ءِ ٹال انت تئی نیمگ ءَ ترا انچو سما بوت کہ پیرزال چیزے لوٹگ ءَ انت آ پیرزال انچو پیر ات آئی چم بُڑاتگ ات انت جان ءِ پوست ءِ نز اتکگ ات آئی دست لرزگ ءَ اتاں تو یک برے پیرزال شر نگاہ کت ترا گمان بوت اے پیرزال منی مات ءِ رنگ انت پد ءَ تئی دل ءَ گشت اے پیرزال ءَ چیزے بہ دیاں بلے تو دست کیسگ ءَ برت ترا سما بوت منی کیسگ ھُورک انت ءُ تو دست چہ ھالی ءَ جیب ءَ کش ات نہ کت پیرزال ءَ ھم ھچ نہ گشت ءُ پشت ءِ ماندات ءُ شت

اولی رنداں تو زندمان ءَ دیم پہ دیمی ءَ گندگ ءَ ات ئے

نوں ترا وتی گوست سرجمی ءَ یات پیداک ات گوستگیں مردم گوستگیں یات تو جیڑات ارمانی بوت ئے

ترا زندمان ءَ دیم پہ دیم بوھگ انچو گران کپتگ ات ترا کوٹی ءَ چہ ڈن گام ءِ ایر کنگ ھم تُرسگ ءَ ات بلے زندمان اچو ملمکوت ءَ سرا اوشتاتگ ات کہ ترا لاچاری ءَ در ءَ در کپگی ات، تو کہ در ءَ در کپت ئے کشک گپت راہ ءَ سر گیپت ئے

تو گند ئے یک کورے، دگہ لنگے، دگہ یک نادراھے بلے درستاں زندمان تاچینگ ءَ انت تو انگت روان ئے تو گند ئے تھنہ یک ھورکیں کشکے ھما پیرزال انت اوشتاتگ کہ تئی کوٹی دپ ءَ اتکگ ات، تو دیم پہ ھما پیرزال ئے گورا شت ئے بلے تو سک دمبرتگ وتءَچہ شزارا ئے زندمان پہ تو انچو گران انت گش ئے آزمان تئی سرا کپگ ءَ انت تو کہ پیرزال ءِ گورا شت ئے پیرزال بکچھے بَڑا ات پیرزال ءَ ترا ھمے بُکچہ تئی کوپگ ءَ دات ءُ ترا گشت ئے ھرکجا کہ دمبرت اے بکچہ ءَ بوج بلے تو ھچ نہ گشت ءُ سرگیپت ئے…..!!!!