پشتو آزمانک :گنوکیں جِنک ءُ آئی ءِ کَنجری۔ بلوچی رجانکار: وحید واحد
آزمانک :گنوکیں جِنک ءُ آئی ءِ کَنجری
پشتو آزمانکار : فاروق سرور
اردو رجانکار : فاروق سرور
بلوچی رجانک : وحید واحد
۔۔۔۔۔۔۔۔۔۔۔۔۔۔۔
میان اُستمانی لبزانک ءِ رجانک
آزمانک نمبر : 20
۔۔۔۔۔۔۔۔۔۔۔۔۔۔۔
مُرگ ھر وھد ءَ زھر ءِ تہ ءَ بنت اِنت ءُ آیانی دُژمنی گوں زیبائیں جِنک ءَ روچ پہ روچ ودّان کنت اِنت۔ آ آئی ءَ یک بے ادب ءُ بے ھیایے ھم پھم اَنت ءُ لوٹ اَنت کہ آئی ءَ یک ڈڈّیں تاوانے ھم بِدی اَنت۔
زیبائیں جِنک ءِ لوگ کوھانی میان ءَ اِنت۔ آ ھر رو وتی کوٹی ءِ تہ ءَ نند اِت ءُ چَہ دریگ ءَ دیم ءِ کوہ ءِ بُن ءِ ڈولداریں سوریں پُلّاں چار اِت۔
اے پُل کوہ ءِ بُن ءِ چاریں نیم ءَ شنگ ءُ تالان اَنت ءُ چریشانی سَوَب ءَ کوہ ءِ بُن دلکش ءُ ڈولدار گندگ ءَ کیت۔
آئی ءَ ھمے دریگ ءِ تہ ءَ یک پُرْشتگیں مزنیں کانچے ھم ایر کُتگ کہ آئی ءِ تہ ءَ آ وت ءَ را دم پہ ساھت چار اِت ءُ گَل بیت کہ آ اوں ڈولداری ءَ چَہ اے پُلّاں کم نہ اِنت بلکیں چرایاں ھم ڈولدار تر اِنت۔
آئی ءِ بلکل دیم پہ دیم ءَ یک بُرزیں مزنیں دْرچکے ھست کہ آئی ءِ تہ ءَ مُرگ نند اَنت ءُ آیاں جِنک ءِ اے رَوشت ھچ دوست نہ بیت۔ آ مُرگ سجّائیں روچ ءَ آئی ءِ اے وت دوستی ءِ سر ءَ گیبت کن اَنت کہ آئی ءَ وتی زیبائی ءِ سر ءَ اِنچو مھر اوں کنگ نہ لوٹ ایت۔ پرچاکہ باند ءَ آئی ءَ پیر ھم بیگ کپ ایت ءُ اے زیبائی روگ ءُ آؤکیں چیزے۔ ایشی ءِ اے وت دوستی کہ اے وڑ ءَ گوں تُرْندی ءَ گیش بیان اِنت اے وڑ ءَ اے یکروچے گنوک بیت۔ پد ءَ ما اوں ڈولدار ایں، بَلے آ بِھ مئے نیمگ ءَ چمّاں چست نہ کنت ءُ نہ چار ایت۔ اھمک گوں جِنکے ءَ۔ گواھے مے سیادی مُرگانی ڈولداریں تھر ءِ تہ ءَ اِنت بَلے اے کمبھت ءَ را مئے ڈولداری ءِ تُشے اوں پرواہ نیست۔
ایشاں وَ ھیر، نی وَ مُرگ آئی ءِ سر ءَ گیشتر آس گوارگ ءَ لگ اَنت وھدے آ آئی ءَ را شائری کنگ ءَ گند اَنت۔ وھدے آ گوں وتی بُرزیں آواز ءَ شئیر گْوشگ ءَ بیت گُڑ ءَ آ اے توامیں شائری ءِ تہ ءَ تھنا وتی زیبائی ءَ ساڑا اِت۔ نی مُرگاں آئی ءِ اے وت ساڑائی ھچ وڑ ءَ برداش نہ بیت ءُ آ آئی ءِ سر ءَ گیشتر نپرت کنگ ءَ لگ اَنت کہ زان آں چے دُگنیا ءِ تہ ءَ دگہ ڈولداریں چیز نیست؟
نی مُرگانی سر ءَ یک دگہ جنجالے کیت۔ اے جنجال یک کنجری یے بیت کہ آئی ءِ جَنَگ ءَ آ جنک دیوانگانی وڑ ءَ وتی بُرزیں ءُ شوکیں آواز ءِ تہ ءَ گنوکی ءِ گوم ءَ وتی زیبائی ءِ سوتاں جَنَگ ءَ لگ اِت۔ جِنک ءِ چر ئِے رَوشت ءَ مُرگانی بے تاھیر ءِ تہ ءَ گیشی کیت ءُ آ آئی ءِ نام ءَ دیوانگیں جِنک ایر کن اَنت۔
نی وَ اے ھسد یا نپرت ءِ سَوَب ءَ مُرگ نادْراہ بنت اِنت، پرچاکہ جِنک ءِ اے گنوکی ءِ سر ءَ آ سرجمیں روچ کِٹان بنت۔
یک روچے وھدے یک پیریں مِٹّویے کہ چِداں چِہ گْوز اِت ءُ آ دْرچک ءِ مُرگاں گوں نادْراھی ءِ اے ھالت ءَ کہ گند اِت گُڑ ءَ اجکّہ بیت۔ پد ءَ وھدے مُرگ آئی ءَ وتی نادْراھی ءِ سَوَب ءَ گْوش اَنت گوں گُڑ ءَ پیریں مِٹّو وت ءَ داشت نہ کنت ءُ آ ھم ءَ دمان ءَ یک زانتکاریں بُزرگے ءِ وڑ ءَ جِنک ءِ گورا کیت ءُ آئی ءَ کنجری ءِ سر ءَ وتی زیبائی ءِ سوتانی جَنَگ ءَ مکن کنت۔ آئی ءَ گْوش اِت کہ زیبائی روگ ءُ آؤکیں چیزے، ایشی ءِ سر ءَ اِنچو مگرور بیگی نہ اِنت۔
درآمدیں مِٹّو ءِ اے اناگھیں آیگ ءُ گُستاکی کنگ ءِ سر ءَ وت دوستیں جِنک زھر گپت ءُ آئی ءَ سنگ جنت ءُ چوداں چِہ گلّین اِت کہ پیریں بدرنگ ترا گوں منی ڈولداری ءَ چے کار اِنت؟ زاناں چے منی زیبائی ءَ تئی لوگ ءَ را آس شانتگ؟
نی وھدے مُرگ گِند اَنت کہ جِنک بے ھیا ءُ بدکرد اِنت ھم گُڑ ءَ آیانی گوں ایشی ءَ دُژمنی گیشتر بیت، ءُ آ آئی ءَ یک تاوانے ءِ دیگ ءِ بابت ءَ جیڑگ ءَ لگ اَنت۔ پیریں مِٹّو ھم منی (انا) ءِ وارتگین ئِے ءُ آ ھم وتی بے ازتی ءِ سر ءَ اے پندل ءِ تہ ءَ گوں آیاں ھوار بیت گوں۔
جِنک ءَ اسل چاڑ دیم ءِ کوہ ءِ بُن ءِ سوریں پُلّانی وشبواں چِہ رس ایت ءُ اے کار ءِ تہ ءَ مستیں گوات دیم دیم ءَ بیت، پرچاکہ آئی ءَ آئی ءِ سوت ءُ کنجری ءِ توار سک دوست بیت۔ پمیشکا آ آئی ءِ سوتاں دور دور ءَ بارت ءُ سر کنت کہ ھر کُجا یک شوانگے یا ھر وڑیں مردمے وھدے جِنک ءِ اے سوتانی توار ءَ کہ اشکوں گُڑ ءَ آ بے وت بیت ءُ ناچ کنت۔
نی وھدے مِٹّو ءُ مُرگ مستیں گوات ءَ را کہ وتی پندل ءِ بھرے جوڑ کن اَنت گوں گُڑ ءَ گوات ساپ ساپ ءَ گْوش اِت کہ اے وڑ ءَ پُلّانی وشبو کُٹ ایت، آ دْراہ گیمُرنت ءُ سرجمیں ماھول ءِ تہ ءَ یک بڈّولی یے کیت اِنت۔
اِد ءَ اے تیوگیں ناٹِکی چلّگ ءَ بنت ءُ دومی نیمگ ءَ یک سکّیں سیریں ءُ دیمروئی کُتگیں مُلکے ءِ اَکسانی یک سکّیں مزنیں، ڈولداریں ءُ گوں رُژن ءَ چکّاریں ساز ءُ زیمل جاھے ءِ تہ ءَ وھدے یک نیزگاریں مُلکے ءِ بیگانگیں یلاچرے یک پیریں مردے ءَ را جُست کنت کہ اے مُلک ءِ دیمروئی کنگ ءِ راز چی اِنت گُڑ ءَ کماش زور زوراں کند اِت ءُ گْوش اِت کہ اِد ءَ اِزم ءُ اِزمکار ءِ کارانی تہ ءَ دور کنگ نہ بیت۔
***