پیشالءِ زیارت ….. ارشادعالم
پیشالءِ زیارت ….. ارشادعالم
زیارتانی سرا روگ دعا ءُ ھاجت لوٹگءِ ربیت کم ءُ گیش دراھیں راجانی توکءَ چہ قدیمءَ ہست ءُ پیداگ انت بازیں مردم زیارتاں ستکءُ یقین دارنت… اودءَ پریات زاری دعا کن انت… کول کن انت کہ فلاں واھش ھاجت پیلہ بہ بیت اے وڈ کناں بازیں مردم زیارتاں ھیرات ءُ ھسنات کن انت بسکوٹ. ھلواہ ھما زیارت ھیر کن انت… پیشءَ کہ میڈیکل سائنسءَ مئے دمگاں دیمروئی نہ کتگ یا کہ ناوانندگی دورے بوتگ زیارتانی سرا روآ گیش بوتگ گیشتر ٹک ءُ کٹمانی وتی ھاسیں زیارت بوتگ انت کہ آ وھد وھدءِ سرا شتگ انت زیارت کتگ ئے. بازین ننکءِ سرے سایگءَ اوں زیارتاں شتگ انت. پہ نادراھیءِ رکھگءُ پہریزءِ ھاترا اوں شتگ انت دعا ءُ پریات کتگ. چشیں ھندءُ جانے. کوچگ ءُ کلگے نیست کہ اودءَ زیارت مہ بیت. ھمک زیارت ءِ منوک ءُ مرید ہست انت….. من نوزدہ سد ءُ ھپتادءُ چارءِ سالءِ گڈی ماہءَ پیداگ بوتگاں اے وھداں منی کماش گوادرءَ ایجوکیشن آفیسر بوتگ منءَ مارے یا زومےءَ وارتگ دشتءَ بلکنءَ مکرانءَ داکتر نہ بوتگ.. اے وھداں مہلوکءَ بلوچی تہلگ. یا ملا ءُ میاہ. یا زیارت ءُ پیر. شے ءُ پکیرانی اوستءَ بوتگ انت… وھدے پتءَ ھال گپتگ کہ چک نادراہ انت گڈا آ چہ گوادر ءَ درکپتگ گوادر دشتءِ راہ آ زمانگءَ سنٹسر بوتگ کہ ھمے راہءَ پیشال زیارت کیت… پت وھدے پیشال زیارت کرا گوستگ گڈا دلءَ چہ دعا لوٹتگ کہ چک اگاں وش ءُ دراہ بہ بیت. مزن ءُ لاہک بہ بیت الما وتی وڈا پیشال ءِ زیارتءَ کیت… من کہ رُدان ءُ مزن بوتاں. گپ ءُ گالی بوتاں پتءِ دپءَ اشکت کہ من پتو چشیں کولے کتگ اے وھداں من ناں وت پیشالءَ شتاں ناں کہ پتءَ منءَ گشت تو پیشالءَ برو زیارت بکن کہ من چوشیں کولے کتگ.. من ایف اے نودربر اتاں. پت وپات کت.. من یکمی ھمے پگرءَ کپتاں کہ من پیشالءِ کولی آں. منءَ پیشالءِ زیارت کنگی انت پتءِ زبان دومی جہانءَ ھراب مہ بیت.. ھمے وھداں ملا محمد کہ ملائی نگور ءِ مردمے کھڈان اسکولءَ معلم القرآن ءِ استاد ات….. ملا محمدءَ منءَ گشت کہ مئے نیمگا چہ پیشالءِ زیارتءَ گاڈی رونت من گل بوتاں کہ پتءِ کول موکگ بیت. من ءُ ملا محمد سرگپتیں. شپ ما ملائی نگورءَ ملا محمدءِ لوگءَ سہب کت ھمودا چہ باڈہ ئی گاڈیءَ اتکیں. پیشال زیارت کہ اتک ما گاڈی اوشتارینت ما دعا ونت. پیشال زیارت کت … پدا گوادرءَ اتکیں منی ناکوزتک میر جان کہ جیونیءِ سوشل ویلفیر آفیسر ات اے وھداں گوادرءَ ات گوما گوادرءَ دُچار کپت وھد باز گوستگ من پکا نہاں بلے منی ھیالءَ ما بلوچ وارڈءَ سنگتےءِ کرا داشتگ ات…. گوادرءِ نامداریں چاگردی ءُ سیاسی رھشون عابد سہرابیءِ نامءُ توار من اسکولءِ وانگءِ زمانگءَ اشکتگ ات ھاس گریبیں مردمانی دپءَ اشکتگ ات کہ آہانی روگ ءُ آھگ ءُ سیادی گوں گوادرءَ ہست ات. ھماہانی دپءَ من اشکتگ ات کہ عابد سہرابی گریب دوستیں مردمے. گوادرءَ ھرگاڈی ہلائنوکاں بگر داں جانشو ءُ ناھداہاں ھورءُ تور انت آہانی دردءُ مرکءَ شریدار انت. .. دلءَ ھل کت کہ عابد سہرابیءَ گوں ھم نیادے بہ بیت. میرجانءَ عابد سہرابی ساریءَ زانتگ ات ءُ مارا گشتگ ات کہ عابد سہرابی مدام پازُل چوکءَ اے چاہءِ ہوٹلءَ کیت اے زمانگءَ ھمے ہوٹل ھرگاڈی ہلاہینوکانی جاہ ات. ما ناشتہ کت پازل چوکءَ اتکیں. عابد سہرابی ھمدا مارا دوچار کپت منی اولی نیاد گوں سہرابیءَ ھمے ہوٹلءَ بوت من ملا محمد ءُ میرجانءَ گوں عابد سہرابیءَ دراج کشیں نیادے کت…. ءُ بیگاہءَ واتر چمے راہءَ ملائی نگورءَ اتکیں.. من اے زمانگءَ کم کمءَ سگریٹ کشگ اوں بندات کتگ ات شپءَ وھدے منءَ سگریٹءِ اوماناں زرت من بیچاڈ بوتاں گڈا من ملا محمدءَ گشت مشوک رسیت …. ملاءَ مشوک شوھاز کت منءَ دات منی سگریٹءِ تلب پورا بوت…
زندگیءَ اگاں موہ دات دیمترا پیشال زیارتءِ بابتءَ گیشتر نبشتہ کناں