چو کڑب تیگاں چرتگاں ورناہ ۔۔۔۔۔ شعیب شاداب

جی ہما سُہب ءُُ جی ہما بیگاہ
مَجلِس ءُُ دیوان اَت ہمک پیشگاہ
مِکّ اَتاں کوٹ ءُُ مُہکمیں درگاہ
سَرپہ نَنگ سَرداراں نہ کُت پَرواہ
باجُوہی دؤراں دُرْواِتاں ہمراہ
کوہ بُن ءُُ سَنداں بیتگاں جنگجاہ
تَنک دَپ ءُُ گوک پرْوش ءَ بِگر کولواہ
چو کڑب تیگاں چرتگاں ورناہ
مِہتِراں بکشاتاں سَرءُُ اَرواہ
چہ بُن ءَ بَدواہے کُتاں بیگوْاہ
پُرْشتگاں رِندانی بَزیں دیوان
لاگریں شینکاں کُشتگاں دِہکان
اَنچو بَرگَشتگ کوڑو ءَ اِنسان
سِتک پَش کپتگ، نئے دِل ءَ اِیمان
پہ لَگورانی داتگیں فَرمان
کُشتگاں چَنّوں دروراں مِہمان
دِل عَزابیں پہ شادہی اومان
من کناں سَکّیں ساہتاں ارمان
تَلوسیت راج گوں واری ءِ سوزمان
کاری ئیں ٹَپّاں کہ نباں درمان
بیا بُبّریں نی دیر سریں پَندءَ
سَرگِراں بِیں پہ شادہیں ہَندءَ
ظُلم چاگِرد ءَ شِنگ اِتگ تَندءَ
ہون گواران اِنت نوشکی ءُُ مندءَ
کوہلو ، چاغی تاں قَصرقَند ءَ
سَر پَناہ بیتاں ہیسی ئیں چَندءَ
بے سَریں تاوانیں ترا دَندہ
فانی اِنت دُنیا گوں ترا بَندہ
دَہل مئے پامال اِنت ہمک سَندءَ
ماں دَل ءَ ارمانی مَہ بیں رَندءَ
ڈیھ کتگ جوریں دُژمِناں اَنگار
پُسَگاں بَرپُشتی جَن اَنت آوار
تولَگ ءَ دُزّیں ما وتی بازار
راج وابیں گوں شادہاں آتار
چہ سرا ہیسی پَررِچاں دَستار
چوٹواں باہیناں وتی سَردار
پہ وت ءَ دَزگُلّاں وتی پَلگار
من تئی چانیگءِ نیاں چمدار
ماں گُباران اَنت حَمّل ءِ بیہار
بے دِلیں فَرزِندوں نباں پادار
نِشتگاں کوہاں شیر سِلاہ سَنجاں
چومن ئے مَرد پہ ہاتِرئے رَنجاں
بِلّ کہ نَزّآراں گوہَر ءُُ گَنجاں
کوت کناں پہ ما گَلّہ ءُُ بِرْنجاں
سَنگَراں ماتکوہاں گِراں وَجّاں
دُژمِناں ڈیھءِ پاہو ءَ دَرْنجاں
بُرز ماں مِحلّی نِشتگاں چَجّاں
مئے سَرا پِرْےِشتاں کینگی گَجّاں
ما بلوچاں نئے وادَہاں بَجّاں
چادِر ءَ مانپوشاں وتی لَجّاں
ہَمبلاں رُمبیناں ’’نَلی گَٹّ‘‘ءَ
چے بَری سودا ءَ کناں کَٹّءَ
بیت بلوچ کُورّ ءُُ بیدہی جَٹّءَ
اَچ وتی تاریخ ءَ نہ جنت ہَٹّءَ
گُژنگیں ما پہ لیجر ءُُ بَٹّءَ
چوں نہ پُرْوشاں تئی بَرجمیں رَٹّءَ
لَشکراں مان رِیچاں ہمک پَٹّءَ
ہون ءِ قندیل ءِ بُرز کناں وَٹّءَ
آ سَتَر زوریں گوں وتی لَٹّءَ
اکبرءُُ بالاچءِ نہ بیت مَٹّءَ
سَر مَچارانی من کپاں یاداں
دَست جولان ءُُ سانکلاں پاداں
سِینگاں شیِری وارتگیں کاداں
پہ بَدل دَرمان ، پِرمُشاں واداں
دُوراں چہ نَنگانی پَری زاداں
اَندوہاں راج ءِ دُوتُکی ناداں
گوں غماں جَتک ءُُ رِیستگَیں ساداں
ہاتِرئے نَنگ ءَ ماں دِل ءَ شاداں
زور دِنگانی دیم ئے ایرماداں
قابِل ئے قَدر ءُُ لاءِق ئے داداں
دَرنئیت ماتبَنداں سَریں مَردے
مَہشریں دوراناں بِدنت گَردے
ایر بِکنت جوانیں جُہدءِ بَروردے
ایمنیں بیاریت ڈیھ ءَ روزَردے
چیر بِدنت ہُشکیں کورجواں بَردے
گُژنگیں راج ءَ سَربِکنت وَردے
من مُجاں بیگوْاہ ، ایوکیں پَردے
ہالیِگیں دَستان چے کناں کِردے
وَت بِہ گپیت بَدواہ ءِ دِل ءَ دَردے
کہ بہِ کَشّاں من وَشّیں آہ سَردے
نی کنیں کوتاہ کینگ ءُُ کَستءَ
آپ زورانی چہ سَرا گوْستءَ
چو سبق مارا نوبت ءَ رَستءَ
ہوش نُوں بَدواہ ءِ سَرا نَستءَ
زَہر وَران اِنت چو لیڑہی مَستءَ
اُرش ءَ پہ جورانی نہ بیں پَستءَ
قَہر ءِ آماچیں سال داں شَستءَ
نی گِریں زَہم ءُُ نیزَگ ءَ دَست ءَ
نیستی ءَ گَردیناں پَرا ہَستءَ
جمبراں گوْاریناں وتی بَستءَ
ڈیھ شُعیب جِندءِ جَنّتے باگیں
ڈھاڈرءُُ کیچ، تازعمران ناگیں
مئے وتی جوہان ، مئے وتی زاگیں
نی مَدار پِکراناں تَچ ءُُ تاگیں
شَرّ بِکن اَلہان واہگاں راگیں
بیا تَرْہین کرنانی دِل ءَ داگیں
بے لَگام ظُلم ءِ سِستگیں لاگیں
تئی وتی دَست ءَ قِسمَت ءِ واگیں
شادِہاں چَنڈین گوْانزگے شاگیں
مَہشر ءَ داں کہ بُرز تئی پاگی