ڈاکٹر رحیم بخش مہر ءِ گچین رجانکی لچّہ
منصور
منصور
چہ پاھوءَ بُرزتر
برز اچ من
برز اچ تو
برز چہ ھاکءَ
بلئے
نزیک انت
چہ آزمانءِ ھدابُندءَ
فرخ تمیمی/ رحیم مہر
٭٭٭
٭٭٭
ھمایانی نامءَ کہ ابد مان انت
شما زندگ اِت،
شما درست کہ تپتگیں بادگیراں اجل بوت اِت،
سنگسار کنگ بوت اِت
پاھوءِ سادءَ درنجگ ءُ ھڑکّہی کُچِکّانی
میار کنگ بوت اِت
شما زندگ اِت
شما مئے نیامءَ زندگ اِت
مئے ھستی ءُ وجوت
تاں ھما وھدءَ است مان ایت
کہ شمارا یات بہ کنیں
کُشندھانی دوار اُرش ءُ بیڑ
ھمے دابءَ دارگ بوت کن انت۔
اووی برجر / رحیم مہر
٭٭٭٭
٭٭٭٭
درْین
ناوڑءِ لمبءَ
بیگاہءِ تنکّیں دنز ءُ مُجءَ
ھئور شنزان انت
دل کشّیں درْین
جمبرانی پُشتءَ سرکشّان انت
روچ رولہءَ سرگردان انت
ناھدا گوں وتی یدّارءِ ھولیگءَ
بدمستیں چولاں دِرّان انت
دل بلئے آئی
درْینءِ کید ءُ بندءَ انت ۔
عادی کیلانا\ رحیم مہر بلوچ
٭٭٭٭٭٭
٭٭٭٭٭٭
کپودر
سبزیں کپودر
سُہبی بیران بوت
من آئیءِ سکٹّیں جون زرت ءُ
سارتیں زمینءَ کَل کت ،
کپودر ایوک بوت ءُ
جمبراں بُرز تِر، گوں ایندگہ کپودراں
بال کنان بوت،
سہبءِ رُژن ءَ آئیءِ بانزل
چو رِچوکیں تاکاں توارءَ ات انت
پدا آ چہ درستاں یکّر ءُ گستا بوت
آئیءِ گم بے گْواز اَت
مانشانتگیں مرکےءِ موتکے اَت
مئے زند ھم انچو آسر بیت
ما ھم ھمے دابءَ ایوک بئیں
بلئے پہ بالءَ مارا بانزل پِر نیست
ما گوں دردءُ مونج ءُ ازابءَ
زند کنگءَ پہ لاچاریں
الیگزینڈر گروف \ رحیم مہر بلوچ