کازی ءَ دراہ یکجاہ کتگ انت۔ ڈاکٹر اے آر داد
کازی ءَ دراہ یکجاہ کتگ انت
ڈاکٹر اے آر داد
ڈاکٹر اے آر داد
سنگتے گوشگ ءَ ات کہ مبارک ءَ راج یکجاہ کتگ۔ من گْوشت اے ازم ءُ لبزانک ءِ کرامات انت کہ مہر ءِ ربیدگ ءَ زندگ کنت۔ما وَ کس زانت نہ کنیں کہ اتا شات چنت مردم ءَ برتگ ءُ کبر ءُ کسارت کرتگ بلکیں 2005 ءَ کہ من شال ءَ اتکگ اتاں ھمک بلوچ ءَ کہ آئی ءِ کبر ءِ جست کتگ ات کس ءَ نزانتگ ات واجہ کجا کلّ انت۔ھمے رنگ ءَ سید ھاشمی ءِ میّت ءَ چنت مردم گون بیتگ اشی ءِ بارو ءَ بلکیں احمد زھیر ءَ بزانتیں یا یک ءُ دو دگہ مردم بہ بنت اشی ءَ بزان انت ۔اے شرپ ایوک مبارک ءَ رستگ کہ اینچو مردمانی دل ءُ دریکگانی نیام ءَ کلّ کنگ بیتگ ،سرجمیں راج یکجاہ کتگ۔پرچا اے لشکر ءَ شنگینگ بہ بیت؟۔چریشی(ھمے شنگینگ ءِ کار ءَ ) اگاں راج ءُ زبان ءَ نپ ءُ سیتّے رست کنت گُڑا اے کار ءَ برجاہ دارگ بہ بیت۔ مبارک بلوچی ءِ میراس انت ۔کس اے گپ ءَ مہ کنت کہ آئی ءَ ایوک من زاناں۔من ءَ چہ شرتر ارشاد مبارک ءَ زانت، قاسم ءُ حنیف زان انت، ندیم اکرم ءُ پروفیسر سکسینا شر تر زان انت۔منیر ءُ ممتاز یوسف آئی ءَ جُوانتر زان انت۔ عبید شاد ءُ عابد علیم آئی ءَ من ءَ چہ شرتر زان انت۔ پسنی ءَ چہ شرتر آئی ءَ کَے زانت۔ زانگ دگہ گپے ءُ مبارک ءِ ازم ءِ پوہ بیگ دگہ گپے۔
کازی ءَ کہ نی راج ھر کس وتی وڑ ءَ یات کنگ لوٹ ایت پہ آئی پرسی دیوانے ایر کنگ لوٹ ایت بلّے کنت۔ سیلم کرد اگاں شال ءَ آئی ءِ پرس ءَ دارگ لوت ایت بلّے دار ایت ،اگاں ورنا وانندگ گلّے پہ آئی ءَ دیوانے کنگ لوٹ ایت بلّے کنت۔ باندا آرسی ڈی ھم بلکیں دیوانے بکنت، کے بی فراق ھم آئی ءَ وتی رنگ ءَ گیر آرگ لوٹ ایت، دیوانے کنگ لوٹ ایت من ءُ تو کے یاں کہ آئی ءَ بداراں ءُ بگوشاں کہ مبارک ایوک منی میراس انت۔ھدا ءَ بچار ات مبارک ءَ اینچو کسان مکن ات یک پگرے ءِ تہ ءَ کیز مکن ات۔
مبارک ءَ وتی زند ءَ شما آئی ءِ گُلگداراں بوان ات، مدام گُوشتگ ات کسے یک لبزے ھم بلوچی ءَ نبشتگ کنت، من ءَ دوست بیت۔ نی کہ کازی ءَ اے راج یکجاہ کتگ اشی ءَ پرے زیت ءَ شنگینگ مہ بیت۔
کازی ءِ وامدار ما ءُ شمائیں کہ آئی ءِ سر ءَ ھچ نبشتگ نہ کتگ ۔ حنیف دیدگ ءَ بگر داں نورمحسن ءَ بیا درائیناں کازی ءِ زند ءَ آئی ءِ سر ءَ نبشتگ کتگ۔اسگرداد رس ءَ بگر داں عابد علیم ءُ سحر احمد (من وتی نام ءَ نہ گراں کہ من چنچو نبشتانک آئی ءِ سر ءَ نبشتگ) ءَ ھم ھما دور ءَ کازی وتی رنگ ءَ جیڑ اتگ ءُ چیزے نہ چیزے نبشتگ کتگ۔
شما ماھتاک بلوچی،سچکان، دْرد ءُ چمّگ ءِ تاکاں بْوان ات کہ کازی ءَ آئی ءِ زند ءَ مردماں یات کرتگ ءُ آئی ءِ شاعری ءِ سر ءَ نبشتگ کتگ بلے چو کہ ما اے چیز نہ دیستگ انت ۔ ھژدری نہ انت ھر ندکار ءُ شاعرے ءِ سر ءَ آئی ءِ زند ءَ آئی ءِ ازمی درائیں پھنات دیم ءَ بیا انت ۔یکے کہ نبیسگ ءَ انت زانگ نہ بیت کہ دیمتر ءَ آئی ءِ بودشت چونین بنت ،نی کہ مبارک ءَ وتی کار سرجم کتگ ءُ پشت مانداتگ ،نی آئی ءِ سر ءَگپ بوت کنت کہ آکجا اوشتاتگ ۔
ھمے نیام ءَ کپوکیں مردم وتی سیاست ءَ انی بِلّ انت اگاں آیاں گوں مبارک ءَ دوستی ءُ واھگے ھست آئی ءِ ازم ءُ شاعری ءِ سر ءَ نبشتگ بکن انت کہ لبزانک ءِ مستریں دوستی ءُ نزیکی ھمیش انت ءُ مبارک کازی ءِ پجار ھم ھمیش انت۔اگاں نویسگ ءِ کار ءَ نہ زان انت کازی ءِ سر ءَ نبشتگیں نبشتانکاں بہ چن انتءُ نزّ بیارانت کہ دو کتاب ارزانی ءَ بوت کن انت چریشی نوکیں وانوکے زانت کنت کہ دنیگا مبارک چون چارگ ءُ سما کنگ بیتگ