کتابجاہ ءِ یات گاریں روچے، نبشتکار: عالیہ شاہ
کتابجاہ ءِ یات گاریں روچے
نبشتکار: عالیہ شاہ
من ھر روچ وتی لوگے نزیکے لائبریری ءَ رواں پہ وانگے ھاتر ءَ ، ءُ من مدامی دانکہ بیگاہ ءَ ھمودا نشتگ آں واناں ءُ پدا ھاموشی ءَ در کپاں وتی لوگ ءِ نیمگا رواں، اے لائبریری انچو ویران انت پرچا کہ سکیں کوھین کتابجاہ یے۔۔۔
من اولی بر ءَ کہ وتی گام ایر کت انت گڑا منی اولی جست بلوچی کتاب ئیگ ءَ ات۔۔۔ کہ اِدا بلوچی کتاب است اِنت ، کتابجاہ ءِ مستر ءَ منءَ ھمے گُشتگ ات کہ “نہیں بلوچی کوئی پڑھتا ہی نہیں آج کل” اے گپ منءَ وش نہ بوتگ ات ءُ سک بژن ھم بوت منءَ۔۔۔ بلے ھیر منءَ وتی ھر روچ کتاب گون ات انت پہ وانگ ءَ .. ءُ منءَ باز وھد گواستگ ات بلے من کسی گوما سلام ءُ دعا نہ کتگ ات ، چیا کہ وانگ جاہ ءَ من کس پجا نیارات ءُ کس منی تب ءِ مردم نہ ات۔۔۔۔۔
بلے یک روچے ھمے کتابجاہ ءَ یک بچکے اتک ءُ کتابجاہ ءِ مستر ءِ گوما اھوال کُت ءُ آئی توار منی گوشاں کپت کہ آ ھم چو منی وڑا بلوچی کتابے جست ات ، بلے آئی ءَ منءَ چے گِشتر ھمت کتگ ات، چیا کہ آ پیسر ءَ اتکگ ءُ کتاب ایوک ءَ الماری آہانی تہا نہ چارتگ انت، بلکیں آئی ءَ سرجمیں دور داتگیں ءُ دنزاں گپتگیں کتابانی تہا بلوچی کتاب شوھاز کتگ۔۔
ءُ آ روچا آ اتکگ ات ءُ اجازت لوٹگ ات کہ بلوچی کتاب شوھاز بہ کناں ءُ باز گلگ ھم کنگ ءَ ات کہ اِدا بازیں کتابجاہ یا وَ بند انت اگاں پچ انت گڑا بلوچی کتاب دور داتگ انت ھمے ھال ءَ انت۔۔۔ منی چم گوں کتاب اتاں بلے سرجمیں دلگوش گوں ھمائی ءِ گپان ات۔۔۔ ساھتے ءَ رند آئی ءَ اتک منی دیمے نیمگا بازیں کتاب انچو دنز ءُ مُجاں گپتگ ات ءُ کپتگ ات انت، آئی ھمے کتابانی پٹ ءُ پول بندات کُت گوں وتا باریں چے ھبر کنگ ءَ ات، گلگ کنگ ءَ ات زنگ جنگ ءَ ات۔۔۔ من چارگ ءَ اتاں ءُ آئی ءِ چم اناگہ ءَ گوں منءَ کپت انت ، منءَ جست ءَ لگ اِت، بلوچی کتاب اِدا است ، تو کدی جست کتگ اِشاں؟من آئی ءِ پسّہ نہ دات وتی جست کت، کہ اِدا بلوچی کتاب است تو چوں زانتگ؟ گڑا آئی ءَ گشت من اِدا بازیں کتابجاہ گولیتگ ءُ پولیتگ چمشکہ سرپداں ءُ اِدا من یک روچے پیسر ءَ ھم اتکگ آں بلے بلوچی کتاب اِشاں انچو دور داتگ انت اِشانی واستہ بلوچی کتاب ھچ ارزشت نہ داراں ھلاں کہ مئے واستہ اے کتاب گوھر قیمتی انت، اِدا انچیں ھم کتاب دست کپیت۔۔۔۔
گڑا من وتی جاگہ ءِ سرا پاد اتکاں ءُ آئی نزیک شُت آں۔۔۔
” من بچاراں کتاب”؟ من اولی روچا جست کتگ ات گُشت ئے اِدا بلوچی کتاب کس نہ وانیت” بلے من ھم ھمت نہ کُت اے دنزاں گپتگیں کتاب دست نہ جت انت چیا کہ من زاھر ءَ یک بلوچی کتابے نہ دیستگ ات۔۔۔
آئی ءَ منءَ چارت ءُ گُشت تو بلوچی وان ئے؟ من پسّہ دات ” جی بلوچی بچار اِنت منی بلوچی مھر اِنت منی” ھیر تئی نام؟ آئی ءَ منءَ چارت ءُ بچکندیت نام ءَ نہ گُش آں گوں وتی، تو بلوچی ءِ واستہ چے کار کنگ ءَ ئے۔۔۔؟
من آئی را جست کُت کہ تو چے کنگ ءَ ئے؟ گُشت ئے من کتاباں شوھازگاں۔۔۔ ءُ تو ھم ایوک ءَ بلوچی ءَ مھر مہ کن کار ھم بہ کن۔۔۔منءَ آئی گپ سک دوست بوت ءُ من ایوکا گُشت ” جی الم” منءَ پدا جست کُت ئے کہ اِے کتاباں گوں تئی اکسے بگراں تو وتی دیم ءَ گوں کتاباں بہ کن۔۔۔ من گُشت جی بالکل۔۔۔”
من ھمودا کتاباں پٹگ ءَ لگیت آں کہ منءَ چیزے شوکیں کتاب دست کپتگ ات ءُ واکی پہ ما اے کتاب گوھر قیمتی ءَ چہ کمتر نہ اتاں۔۔۔ آئی ءَ منءَ جست کت تو چہ کجا؟
من پدا پہ مسکرا گُشت کہ نہ گُش آں گوں۔۔۔ آ سرپد بوت ءُ آئی ءَ کندیت ءُ وتی نام منءَ گُشت گڑا من ھم وتی ھند ءُ جاہ گُشت ءُ باز گل بوت ءُ منءَ گُشت ئے کہ من ھم ھمے میتگ ءِ مردم آں۔۔ تو نبشتہ کن ئے؟ من آئی را پسّہ دات کہ جی آزمانک نبشتہ کناں ، نبشتانک ءُ برے برے دل گُشیت گڑا توار بند ھم کناں واناں چیزاں۔۔۔
آئی ءَ گُشت نا!!! من ھم کناں بگندئے تو منی توار اِیش کتگ؟ تو راستی نبشتہ کن ئے؟؟؟ من گُشت جی ھو۔۔۔ آئی منءَ گُشت راست گُشگ ءَ ئے اگاں نہ بس انچو منی دیم ءَ چو گُشگ ءَ ھاھاھا تو بُرو وتی جاگہ ءِ سرا من دست شوداں کتاباں نز کاراں کایاں بریں تئی نبشتہ کتگیں چیزے زاھر کن چارانئے من۔۔۔
من پدا کندیت ءُ گُشت جی الم ۔۔۔!!!
کمو رندا آ کہ گِشتگ ات گڑا اتک منءَ جست کُت ئے، کجا انت تئی نبشتگیں چیز؟؟؟
من گُشت منی چیزاں وَ فیس بک ءَ ھم وانت کن ئے۔۔۔ گڑا منءَ منی نامے جست کُت ئے من آئی ءَ وتی نام گُشت کہ من عالیہ شاہ۔۔۔۔ آئی ءَ کندیت کہ نام شوک اِنت تئی۔۔۔ باریں تئی نبشتگیں چیز ھم تئی نام ءِ وڑا ڈولدار انت اگاں نہ۔۔۔ من کندیت ءُ پسّہ دات ” باریں چو نزاناں من۔۔۔ آئی ءَ بازیں زالبولیں نبشتہ کارانی بابت ءَ جست کت ” آئی ءَ منءَ در گپت ءُ منی چیزے نبشتگیں شوھاز کُت ءُ ھما دامان ءَ وانگ ءَ لگیت۔۔۔
ساھتے ءَ رند منءَ اجازت ئے کت ءُ کتابجاہ چہ در کپت ءُ شُت۔۔۔
آئی ءِ روگ ءَ چہ پد منءَ سک باز وشی بوت کہ بلوچی ءِ چوشیں مھروانیں دیوانگ ھم است اِنت، کہ چو شے ءِ وڑا ھانی ءِ شوھازگ ءَ در کپتگ ات آ انچو شیدا ات منی چماں، من مدام گلگ بوتگ آں کہ بلوچی ءَ گوں بلوچ پرچا مھروان نہ اَنت، آئی ءَ گوں کمے وھد ءِ گند ءُ نند ءَ پد منی گلگ کمتر بوت اَنت ءُ جوانیں آذمودگے ھم بوت ، مدتے ءَ چہ پد بلوچی ءِ مھروانے دیست ، اے جاگہ ءَ، آئی مھروانی ءَ چہ اے ویرانگیں کتابجاہ ھم کمے ڈولدار بوت چیا کہ آئی ءَ بلوچی چیزے کتاب شوھاز کت ءُ زاھر ءَ کت اَنت..!!