کلوھے پہ کراچی ءَ سپر کنوکیں بلوچستان ءِ مساپراں
کلوھے پہ کراچی ءَ سپر کنوکیں بلوچستان ءِ مساپراں
نبشتہ کار: زاھدہ رئیس راجی
نبشتہ کار: زاھدہ رئیس راجی
سک اپسوزی گپے کہ یک بلوچے چَہ یوسف گوٹھ ءَ دیم پہ کراچی ءِ دگہ ھندءُ دمگءَ روگی بیتگ کہ رکشہ والاءَ آ نشہ کنوکیں چاہ وارینتگ ءُ پُل اتگ ءُ چَہ آئیءَ 70،000 کلدار کہ آئی ءَ پہ مات ءِ علاج ءِ زر بوتگ انت بُرتگ انت۔
یک چیزے درائیں بلوچاں زانگ لوٹ ایت کہ کراچی نوں دُز ءُ ڈنگانی جاگہ انت ءُ بلوچیں نامداریں ڈُنگے ءَ لیاری ءِ ٹرانسپورٹ یوسف گوٹھ ءَ رسینتگ، تاں بلوچ کراچی ءَ سربیگ ءَ ھمنچو تکانسر بہ بنت کہ ادءَ آھگ ھم مہ لوٹ انت۔ بازینے ءَ سوشل میڈیا ءَ جاک سلوات کُتگ بلے کسی گوشاں مورے ھم نہ وارت پرچا کہ اے بلوچ ءِ توار بیتگ انت۔ نوں چَہ پولیس ، رکشہ یا ٹیکسی والایانی دُزی ڈنگی ءَ رکینگ ءَ دو سے کار بلوچاں الم ءَ دلگوش کنگ لوٹ ایت۔
وتی زراں ھجبر کیسگ ءَ ایر مہ کن ات۔ ھما کیپ یا کیس شمارا گون انت آھانی تہ ءَ ایریں گدانی کیسگاں جتا جتائیں جاگھاں ایر اش بہ کن ات۔
وتی زراں ایزی پیسہ اکاؤنٹ یا جیز کیش ءَ مان کنائین ات ءُ دستی گوانکو ءَ ھم راہ ءَ دست ءَ مہ کن ات، مَہ تراِت کہ دُزانی اولی ٹارگٹ ھمیش انت۔ چَہ بلوچستان ءَ دیم پہ کراچی ءَ آھگءِ وھد ءَ تھنا ترا کرایہ دستءَ بہ بیت دگہ ھچ چیز اناں۔
کراچی ءَ وھدے سر بئیت نوں ایزی پیسہ اکاؤنٹ یا جیز کیش ءِ وسیلہ ءَ وتی زراں کشائین ات ۔
چَہ یوسف گوٹھ ءَ دیم پہ دراھیں میتگ ءُ بازاراں پبلک ٹرانسپورٹ ھم است انت۔ جُھد بہ کن ات کہ اگاں بازیں بارے گون نیست وت ءُ یک کیپے گون انت بس ءَ سفر بہ کن ات۔ اگاں بیمناک اِت کہ حب چوکی ءِ بس ءَ ھم دزی رندی بیت، گُڑا صدر یا ٹاور ءِ بس ءَ بہ گرات ءُ چَہ ھما راہ ءَ لیاری ءُ ملیر یا دگہ ھند ءُ دمگاں بہ رو ات۔
بلوچ نہ بائد وت ءَ انچو نابود بہ کنت کہ کسے ھم آئی ءَ پُل ات بہ کنت ۔ وت ءَ سپر ءِ وھد ءَ ھمنچو ھژار بہ کن ات کہ کسے مہ زانت تو چَہ کُج ءَ پیداک ئے ءُ ترا چیزے گون انت۔
اگاں شما وتی زر بینک اکاؤنٹ ءَ مان کُتگ انت ءُ کراچی ءَ اے ٹی ایم ءِ وسیلہ ءَ کشگ لوٹ اِت، گُڑا جُھد بہ کن ات کہ انچیں میتگ ءُ بازارے ءَ اے ٹی ایم ءَ کارمرز بہ کن ات کہ اودءَ دُز ءُ ڈنگ مہ بنت، چوشکہ صدر، چُندریگر روڈ ، طارق روڈ، کلفٹن ءُ دگہ میتگ ءُ بازار۔
چیک بُک اگاں ترا گون انت گھتر انت کہ اے ٹی ایم ءِ جاگہ ءَ ھمائی ءَ کارمرز بہ کن ات۔
بینک ءَ روگ ءِ وھد ءَ وت ءَ انچو سینٹ ءُ ھنتر مہ مُش ات کہ آ بزان انت تو چَہ درملک ءَ اتکگ ئے ءُ پُلگ بِہ بئے۔
اگاں لوگی جنینے سپر ءَ ھمراہ انت، اے ٹی ایم ءِ کارمرزگءِ وھد ءَ آ تئی ھمراہ بہ بیت، تاں تو راہ ءَ چَہ ٹریفک پولیس یا دگہ پولیساں باز تنگ کنگ مہ بئے۔
کسے ءَ کہ تو پجّانیارئے آئی ءَ وتی دل ءِ گپاں مَہ دئیت ءُ ھاس رکشہ یا ٹیکسی والایاں۔ پجایاروکیں رکشہ یا ٹیکسی یا سوزوکی والا کہ بنت گھتر انت، پُلگ نہ بئیت۔
اے جیڑہ چَہ ائیرپورٹ ءَ آیوکاں ھم بیت انت گھتر ھمیش انت کہ کریم ، اوبر یا انڈرائیو ءِ گاڑی ءَ بہ لوٹائین ات کہ ایشانی زمہ وار ادارہ وت بنت۔
انوگیں وھدءَ کراچی ءُ کوئٹہ ھردوئیں دُز ءُ ڈنگانی باھوٹ اَنت۔ وت ءَ وت بہ سنبال ات کہ شمئے تاوان جند ئیگ انت ۔
سپر وش بات