کیوبا (اسپینش کوبا) ءَ ما چہ دیست؟پنچمی بھر
کیوبا (اسپینش کوبا) ءَ ما چہ دیست؟
پنچمی بھر
ھور ءَ تیوگیں شپ گوَارتگ ات، سُھب ءِ سرا من کوٹی ءَ ڈن در اتکو داں درچکانی تاک جھل ءَ بالکونی ءَ شنگ اتاں۔
انچو سما بوگا ات کہ ترمپ چو ترونگل ءَ تاکانی سرا گورتگ انت، ۔
جمبر انگت سیاہ ءُ بز اتاں سرا اتاں گوات ورگا اتاں۔
جھل ءِ اسپیتیں کوکر تیزی ءَ گوات ءَ را گون اتاں روگا اتاں، گشے سپاہی ببنت وتی وتی لین آں اوشتگے تیزی ءَ ببنت دانکہ دگے درِدے گوارگے پَریٹ بندات ببیت۔
دور یک پیر مردے روپگے گون اتے درچکانی تاکاں روپگا ات زنے آھائی کار ہمیش ات۔
درچک دُرس تر اتاں ءُ بُنڈ گیشیں ھوراں سیاہ ترینتگ اتاں بلے تاک شُشتگ سبز تریتگ اتاں گوات ءَ گوں لیب ءَ اتاں۔
مُرگ اتاں کہ دَرا نہ اتاں بلے گُشے ساز بباں، آھانی جہل ءُ بُرز بوکیں چّلی چّلی ئے توار گوشاں تاہیر بکشاھگ ءَ ات۔
موسم انچو دل کش ات کہ بیان نبی۔
ہمین ساعتاں آ منا گیر اتک۔
آھائی پرپُکیں لنٹانی بینگیں لزت باتن ءَ سرریچ بوان بوت، انچو گشے باتن ءَ کرنٹ گواز بکنت جانے پُٹ پاد آھگ ءَ اتاں۔
ہمیں نیام ءَ کمرہے در ءِ ٹُکگ ءَ منا گشے واب ءْ چہ جھسرینت پاد کت۔
دیم چکرینت داں در ءَ لگوکیں کانچ ءَ آ دیم ہوٹلے روم سروس والا مردک ہوشتاتگ۔
منا یاد اتک کہ بستر ءَ چہ پاد آھگ ءُ ڈن ءَ آھگا ساری من کچن کال کتگ ات کہ منا کافی ئے بدے۔
ھولا۔۔
ھولا من پسو دات،
آئی اسپانول ءَ منا ھلو گشت کافی من ءَ دات ءُ واتر بوت۔
مئے ھوٹل کہُن ات بلے سک پہریزگ بوتگ ات، اسپینش دوراں باریں ھوٹلے بوتگ کہ لوگے بلے سک ڈولدار ات،
مزنے کوٹی، بالکونی پشت ءَ مزنیں گارڈنے کہ بنگالی چَڑ رستگ ات ءُ بَزیں درچک کہ تہنا ہمدا استاں۔
دوشی منا گوروہ ءُ جیسز گشگ ءَ اتاں کہ سہب ءَ تیاب دپ ءَ رَواں۔
بلے اے موسم تیاب ءِ روگے موسم نَیت۔
من کافی دست گپت گوروہ ہی کمرہ ٹُکت بلے پچ نہ بوت۔ منی دلا واب ات۔
ھور ءُ ڈن ءِ ندارگ آں منا گیشتر ٹکگ ءَ نیشت۔
من کوٹی ءِ در یلہ کت پدا وتی کوٹی ءَ اتکو کہ بالکونی ءَ ڈن جہل ءَ درچکانی تاک رتکگ اتاں، بنڈ سیاہ تریتگ اتاں ءُ پیر مرد ات روپگے گون اتے جہل ءَ رتکگیں تاکاں روپگ ءَ ات ءُ مُرگ اتاں کہ ساز اتاں۔
کوفی سک ترند ات، ھوٹلے روم سروس والاءَ منا براون شُگر ئے چار پیکٹ داتگ ات من سہ پیکٹ مان کت بلے انگت ترند ات، کیریبن ءَ من گیشتر براون شگر یا بینگ دیستگ کہ کوفی آں مان ایش کنت، مئے ہندی چاہ سک کم انت بلکہ نیست، لیپٹن تاہدُک رسیت بلے وش نیاں۔
مئے کارگس آں مشین لگوک انت کہ کافی بین بزاں پتکگیں کافی مانے کناں، مشین دروشیت ئیں، پِٹ پِٹ ءَ کافی در کیت کوپ ئے تہا رچیت۔
مرچی اگاں تیاب نبیت گڑا Batista ءِ دورے دراجیں وینٹیج ٹیکسی آں باڈہ کناں دیم پہ کوہاں رَواں کہ جمبر سرے ساچان اتاں۔
روان انت