انجنئیر التاپ بلوچ ءِ سرگوست: کیوبا (اسپینش کوبا ) ءَ ما چے دیست؟ (چارمی بھر)
کیوبا (اسپینش کوبا ) ءَ ما چے دیست؟ (چارمی بھر)
انجنئیر التاپ بلوچ
انجنئیر التاپ بلوچ
کیوبا ءَ کہ اتکگ ئے گڑا کمو راج دپتر ھم زانگ بہ بنت, دانکہ دیمترءَ کہ مردم جاگھانی چارگ ءَ روت گیشتر مَہ اڑ ایت۔
کیوبا لیتن امریکی بازیں زروان آں چہ یک زروانے یک نیمگے امریکی ریاست فلوریڈا انت، یک نیمگے گلف آف پانامہ انت یک نیمگے ہیٹی ءُ ڈومینکن ریپبلک انت چارمی نیمگا اٹلانٹک زر انت, کش ءُ کرا بازیں کسانیں زروان انت۔
زر تلگ انت انچو ساپ انت کہ جھل ءِ سنگ ھم درا بنت،
ابادی کساس یازدہ ملین بیت، ءُ گیشتر آباد تریں شھر Havana انت کہ کساس دو ملین ءَ چہ برز آبادی انت ئے ایندگہ آبادی شست ءُ نہہ مزن کسانے شھر ءُ میتگان انت۔
گیشتر آبادی اسپینش نسل انت پدا افریکہ ءَ چہ آورتگیں سیاہ پوست انت، زبان اسپانول یا اسپینش انت۔
مستریں پیداوار تمباکو، شکر کانڈیل، کافی، چاول، ءَ ایندگہ ٹرپیکل فروٹ انت،
سک ھور بیت سک سرسبز انت۔
بلے سوشلسٹانی آھگ ءَ پد امریکی بندشانی سوب ءَ چہ دنیا ءَ سستگ یک کر انت۔
کیوبا چو ایندگہ لیتن امریکہ ملکانی پیما Guanahatabey ءُTaino نسل ءِ مردمانی ہنکین بوتگ، اولی براں 1490 ءِ دک ءَ کہ واجہ کولمبس ہندوستان ءِ شوہاز ءَ در کیپت گڑا انچو گشنت سرے ما ہمیں ہنداں کپیت۔ (بازینے گشیت گار نہ بوتگ کزدم اتکگ) چوناہا امریکہ تہنا انوگیں یو ایس نہ انت اے کلیں ہند ءُ دمگ امریکہ گشگ بنت،
بزاں گورچانی، زرباری، روچ دراتکی، برکتی نیامی اے کلیں ہنداں ءَ کساس پنجاہ ملک بنت، ایں ملکانی تہا 37 کسان ءُ مزنیں زروان ھم ھوار انت کہ کیریبن گشگ بنت اے زروان ءَ نی تہا بازیں انگت فرانس ءُ انگلینڈ ءَ گون انت ءُ عجبیں گپ ئے کہ فرانس والا زروان ءَ رَوگے ھاترا شینجن ویزہ لوٹیت۔
بازیں زروان امریکہ ءُ جہانی سیریں مردماں ھم بہا زرتگ ات ءُ ہماھانی انت، گیشتر زروان سک ڈولدار ءُ گیشیں ھورانی برکت ءَ سبز انت تیاب دپ سک ڈولدار انت۔
نوں مردم پدا کیوبا ءِ نیمگا کیت۔
گڑا بزاں 1500 ءَ پد کیوبا ءِ گیشتر بھر اسپین ءِ دست ءَ روت بندات ءَ کولمبس زی ایشرا Isla Juana ءِ نام ءَ دینت بلے اے نام نامدار نہ بیت ءُ ہندی نام Coabana مردمانی دپءَ بیت کہ دیمترا بدل بیت ءُ کیوبا یا اسپینش کوبا جوڑ بیت۔
1511 ءَ اولی اسپینش آبادی Diego Velazquez de Cuellar ءِ سروکی ءَ کیوبا ءِ زروان ءَ ایر دیگ بیت۔
انچو گشنت کہ ہمیں دوراں کہ کیوبا ءَ دری مردم آباد بوان بنت یک مزنے گرمُپک ءِ نادراہی یے کپ ایت چریں وائرس ءَ گیشتر ہندی مہلونک اسر مند بنت ءُ مرگ ءِ ارجان بنت.
بازینے پیسر ءَ اسپین والا چُک چین کننت ءُ کُشنت۔
اسپینش کہ کیوبا ءَ قبضہ کنت گڑا شکر کانڈیل، تمباکو ءُ کافی ءِ کشت ءُ کشاری ءِ ھاترا افریکہ ءَ چہ ھم مزنے کچے ءَ غلام کاریت۔
پانزدہ سد ءَ بگر داں 1850 ءَ کیوبا سک دیمروی کنت۔
مزن مزنے ماڈی کوٹ ءُ کلات ھڈ بنت کہ انگت است انت۔
رم ءُ کیوبن سگار ءِ مزن مزنے فیکٹری ءُ کارجاہ جوڈ بنت۔
1868 ءَ اولی براں کیوبا ءِ ہندی مردم اسپین ءِ ھلاپ ءَ چست بنت ءُ مزاہمت کنت۔
اے جنگ داں دھ سال ءَ Jose Marti ءِ سروکی ءَ برجا مانیت۔
اسپین کمو وھدے ھاترا جنگ ءَ پروش دیگ ءَ سوبمند بیت بلے دیمترا امریکہ ہم جنگ ءِ تہا دور کنت، 1898 ءَ امریکہ ءِ آپی گراب USS Maine کیوبا ءِ نزیک ءَ اسپین ءِ دست ءَ ڈُبینگ ءَ پد امریکہ ھم جنگ ءَ سرجم ءَ ھوار بیت۔
دیر نہ گوزیت جنگ ءَ اسپین پروش وارت۔
1902 ءَ Treaty of Paris ءَ پد جنگ بندی بیت ءُ کیوبا چہ اسپین ءِ دست ءَ در کیت ءُ آجوئی گپت۔
ہمیں سال ءَ کیوبا گونتانامو ءَ امریکہ ءَ را لیز ءِ سرا دنت کہ بنندیت آئی پاسپان ببیت، (کہ انگت امریکہ ءِ کِرا انت)
نوزدہ سد ءُ شش ءَ بگر داں نوزدہ سد ءُ پنجاہ ھو دو ءَ تک مزن کسانیں حکومت کاہنت ءُ رونت،
مزنے بدلی 1952 ءَ پد بندات بیت کہ کیوبا ءِ پیسرگیں صدر واجہ Fulgencio Batista وتا ڈکٹیٹر لیکیت ءُ کیوبا ءِ سرا قابض بیت۔
واجہ Batista ءِ دور سک ترند بیت، ءُ سک کرپٹ ھم بیت۔ Batista ءِ یک سالے حکومت ءَ پد سوشلسٹ فیڈرل پاد کیت ءُ گوریلہ جنگ بندات بیت۔ 1955 ءَ ارجینٹائی ڈاکٹر چی گویرا، فیڈرل کاسترو ءَ گوں دوچار کپیت ءُ کیوبا ءِ آزادی ءِ بھر بیت، Batista امریکی ءَ سک نزیک بیت ءُ فیڈرل کاسترو سوشلسٹ پگرے ءُ روس ءِ نیمگا بیت اے جنگ داں1959 برجا مانیت ءُ فیڈرل کاسترو Batista ءَ تاچینت ءُ حکومت ءِ کنٹرول ءَ وتی دست ءَ کنت۔
فیڈرل کاسترو ءِ نزیکی سویت یونین ءَ بیت ءُ سرد جنگ ءِ نیام ءَ کیوبا سک امریکہ ءَ بیوار کنت۔
(بلے گشنت کہ چی گویرا روس ءِ کیوبا ءِ پالیسیاں سک ایر جنت سکیں تچکیں مردے بیت، ھرچی کے دلے بیت دپ ءَ ھم ہما بنت ہمیں ھاترا آزادی ءَ پد دیراں گوں فیڈرل کاسترو ءَ ہمراہ نہ بیت)
بلے گشنت کہ آزادی ءَ پد سکیں تہاریں دورے بیت روس ءُ امریکہ کیوبا ءَ جنگجاہیں جوڈ کنت ءُ کیوبائے سرا مزنے میان استمانی بندشے لگوک بیت۔
یک دورئے انچیں کیت کہ روس وتی نیوکلیئر میزائلاں کاریت کیوبا ءَ جنت کہ اگاں امریکہ ءَ کیوبا تاوان دات یا ارش کت بزاں چمدا روس امریکہ ءَ میزائیل جنت، جاور انچو نگیگ بنت کہ سہمی مزنیں جنگ ءِ ترس ھم چست بیت۔
بلے پدا روس وت نزور تریت بیوار بوان بیت دانکہ کُٹیت۔
انچو گشنت کہ اے نیام ءَ سی ائی اے فیڈرل کاسترو ءِ کوش ءِ سے سد ءَ چہ گیش کوشست کنت بلے سوبمند نہ بیت۔
فیڈرل کاسترو کساس پنجاہ سال کیوبا ءِ سروک بیت، ءُ گڑی وھداں حکومت ءَ وتی کستریں برات راہول ءِ دست ءَ دنت۔ (آہ دوراں کہ ما شتگ اتاں راہول سروک ات )
چے گویرا کیوبا ءِ آزادی ءَ چیزے وھد پد کیوبا ءُ رستگیں دُرسے اگدہاں چہ دز کش بیت گار بیت پدا ھال کیت کہ بولیوا ءَ شُتگ آزادی ءِ جنگ ءَ ھوار انت دیر نہ جنت ھال شنگ بنت کہ ہمودا سی آئی اے کمک ءَ جنگ ءُ شہید کنگ بوتگ۔
نو کیوبا مئے دیما انت، کہ بٹیسٹا ءِ دورے گاڈی انت ،انڈسٹری نیست، مشین ءُ انفرااسٹرکچر، نیست بلے مردم %98 درسد واندگ انت، دنیا ءِ تہا میڈیکلے پڑا سک نام در آرگا انت۔
ٹورزم ءُ حاص میڈیکل ٹورزم ءِ پڑا سک دیمروی کنگا انت۔
امریکہ ءَ گوں ھم کم کم راہ ءُ در پچ بوان انت۔
بلے انگت ڈالر ءِ بدل ءَ یورو ئے تلب گیشتر انت۔
کس امریکہ ءِ نام ءٔ نہ گپت بلے لہتیں اسکول امریکی صدر ابراھم لنکن ءِ نام ءِ سرا انت ایشی سوب ایش انت کہ ابھراھم لنکن ہما مرد بوتگ کہ غلام ئے آزاد کتگ انت، ہمیں سوب ءَ کیوبا ءِ ھم غلام آزاد بوتگ انت بزاں یلہ کنگ بوتگ انت گوں۔
مزہب گیشتر نیست چیا کہ فیڈرل کاسترو چرچ ءُ مزہب ءِ ھلاپ بوتگ۔
بلے اسپینش دورے بازیں شوکیں کھیتولک چرچ انگت مک انت۔
برزا بازے چیز گونڈ گرگ بوتگ کہ نبشتہ دراج مہ بیت۔
ما باز دیراں ریستوران ءَ نشت دارو وارت ءُ اسپینش ساز گوشداشت۔
گورو گشگا ات رّونے Havana ءَ شپ گردی کن نے بلے منی موڈ بوگا نہ ات۔
گڑا کساس یک بج ءَ ما تتران ھوٹل ءَ سر بوتاں۔۔۔
روان انت