کیوبا (اسپینش کوبا) ءَ ما چے دیست۔ انجنئیر التاپ بلوچ
کیوبا (اسپینش کوبا) ءَ ما چے دیست۔التاپ بلوچ
اولی بہر۔
دوھزار ھژدہ ءَ من کہ ہیٹی ءَ اتو گُڑا سنگتاں شور کُت کہ ہفتگے دراجیں دفتری موکل پیداک انت، تر ءُ گرد ءِ ھاترا نزیک تریں جاگہ امریکی اسٹیٹ فلورڈا ءِ شھر Miami، کوبا Cuba یا پاناما ءَ رَوئیں، امریکہ ءِ ھاترا من ءَ ویزہ نیست ات، کہ منی ویزہ امریکی ایمبیسی ءِ ویزہ سیکشن ءَ گیشتر پٹ ءُ پول ءِ ھاترا دراج کش کتگ ات کہ من چہ بلوچستان ءَ اتو ءُ بلوچستان چہ ایران ءُ افغانستان ءَ نزیک ات ( ایندگہ دُرسے پاکستانیانا پنچ سالے ویزہ داتگ اتے کہ منی انجینیر اتاں )۔
گڑا سنگتاں فیصلہ کت کہ میامی ءُ پانامہ ءِ بدل ءَ کوبا (کیوبا) ءَ روگ ببیت کہ انقلابی لیڈر فیڈرل کاسترو ءُ گوریلہ چے گویرا ءِ انقلاب ءِ برورد ءَ آجو بوتگیں ملکے۔
ءُ ہمک غلام ءِ واب انت کہ وتی زند ءَ آ باہدیں ائے ملک ءَ چًمے وت بگیندیت دانکہ پاد کبرا تچک بباں کہ انکلاب ءِ برورد ءَ جوڈ بوتگیں ملک چون بنت، (منی ھاترا وشیں ھالے ات کہ چے گویرا ءِ جہد ءَ بلوچ سیاسی جہد کاراں گیشتر سان زرتگ )
موکل بوگا ءَ یک روچے پیسر ما وتی بالی گراب ءِ ٹکٹ بک کت انت، ہیٹی ءِ پورٹ او پرنس (Port au Prince) ءِ کسانیں بالی پٹ ءَ چہ ہوانا (Havana) کساس دو گھنٹہ ءِ سپر انت۔
ہیٹی بزگ وت سک گریبیں ءُ کرپٹیں ملکے پدا دو ھزار ہشت ءِ ترسناکیں زمین چنڈ ءَ سسٹمے سرین پروشتگ ھو انفرااسٹرکچر گیشتر تباہ کتگ۔
چوناہا ہیٹی چو ایندگہ سینٹرل او ساوتھ امریکی ملکانی وڈا گیشتر وکت پرتگال، فرنچ ءُ اسپینش وڈیں ملکانی کالونی بوتگ، ءُ اسپینش ءُ فرنچ کہ مرچی وتا میان استمانی انسانی ھقانی پہرزوک گشنت سد سال پیسر انچیں زوراک بوتگ کہ ہیٹی وڈیں ملکانی زمین زادگے چُک چین کتگ انت، ءُ پدا افریکہ ءُ چا وتی ایندگہ کالونیاں گلام ایش اورتگ اباد کتگ کہ شکرکانڈیل ءُ ایندگہ کشت ءُ کشاری کُت بکن انت۔
نو کہ زوراک شُتگ انت کیریبن Caribbean یا لیھتن امریکی ملکاں گیشتر افریکی نسل، ہندوستانی نسل ءُ ارب نسل جہمند انت ءُ آباد انت۔
بازیں مردم باور کنت کہ فرانس، انگلینڈ، پرتگال، اسپین ءُ ایندگہ زورکیں ملک وت ما وتی جنگانی برورداں بدل بوتگ انت بلے منا تشے ھم باور نہ کنت، اندر ءَ ایشانی پالیسی انگت ہما انت بس در زاہر ءَ گلام کنگے رپت بدل کنگ بوتگ انت۔
افریکا، لیتھن امریکی ملک ءُ کامن ویلتھ والا ملکاں انگت ایشانی دست مانجائی است انت کہ پٹگ ءَ بازیں درور دست کپیت،
ما پورٹ ھو پرنس ءِ کسانیں بالی پٹ ءَ بالی گراب ءَ سوار بوتاں،
جہاز چو پاکستانی فوکر جہاز ئے وڈا پھنکا والا گرابے ات بلے کمو مزن ات،
کساس دو گھنٹہ بال ءَ پد بالی گراب ءَ Havana ءِ بالی پٹ ءَ ایر دات۔
بالی پٹ در زاہر ءَ مزن ات بلے ایندگہ ملکانی چو کہ نزیکیں ملک کہ من دیستگ ھو گوستگو بزاں برازیل ءِ Rio de Janeiro Santos یا پامامہ سٹی ءِ Tocumen International Airport ءِ وڈا نہ ات، دبئی یا قطر ءِ بالی پٹانی پیما برازیل ءُ پامامہ ءَ وتی بالی پٹ گیشتر کمرشل کتگ انت،
ڈیوٹی فری شاپ انچو برانڈڈ سامان آں پُر انت گشے مزنے نیادی ئے اتکگے۔
بلے Havana ءِ بالی پٹ سبک گام ات، تہار ات، ءُ انچو سما بوت کہ اوشت ءِ آماچ ببیت۔
ایمیگریشن افیسرز دُرس شریں مردم ات انت، چوناہا کیریبن یا لیھتن امریکی ملکانی اسپیت پوست سکیں شریں مردم انت، پدا Cuba ءَ مرچاں گیشتر ٹورزم (میڈیکل ءِ پڈا کوبا نام در آرگا انت) تر ءُ تاب ءَ آوکیں مردماں گیشتر وش اھت کن انت۔
بالی پٹ ءَ ما گوں انگلش جن ءُ مردئے ءَ دوچار کپتاں کہ مئے ھوٹل ءَ داشتگ اتے گوں مئے گاڈی ءَ ہمراہ ات انت، ھوٹلے راہ ءَ گشگا ات کہ آ دو ھزار ہشت ءَ چہ ہمک سال دپتری موکلاں ہمدا کیت ءُ وکت گوازینت۔
آئی گشگ ات کہ تیز روکیں دنیا ءَ چہ کوبا سک گستا انت، ھاموشی انت ءُ مردم انگت کمرشل نہ بوتگ انت،
بالی پٹ ءَ دیم پہ ھوٹلے راہ ءَ مارا ھم سما بوگا ات کہ ہمک مردم گشے اوشت ءِ اماچ انت، گاڈی نود درصد نوزدھ سد ءُ ششت ءِ امریکی گاڈی انت، ماڈی انچو کہن انت گشے جنوزام ببنت، دمک، روڈ ءُ کہنیں ماڈی کہ نوزدہ سد ءِ بندات یا پیسر ءَ اسپینش کالونیل سرکار ءَ ھڈ کتگ انت انگت ہما وڈ مک انت،
دگ ءُ مردماں انچو سما بیت گشے لیاری ءِ ہشت چوک ببیت، بلے فرق ایش ات کہ لیاری ءَ گشے مردم تچگا بباں، بلے Havana ءَ سُرگا نہ انت مورے گاماں جنزگا انت گشے بڑے بار لڈتگ انت۔
بالی پٹ ءَ در آھگے شرت ءَ دنیا دگے وڈے بدل بوتگ ات، انچو سما بوگا ات کہ مارا بالی گراب ءَ دو ساعت نا بلکہ سد سال پشت ءَ برتگ۔۔
دلا اتک گڑا انکلاب ءُ آئی برورد؟
کمیونزم کج انت، مارکیسٹی لیکھانی برورد کج انت؟
فیڈرل کاسترو کہ انکلاب ءَ پد کساس چل ءُ پنچ سال سروک بوتگ، نو ہفت سالاں برز انت آئی برات راول کاسترو سروک انت دیمروی کج انت؟۔۔
منی چم تچگا اتاں کہ ایشانی سروکی ءُ انکلابے برورد گندگ ببنت، بلے کوبا گشی تہارونکی ءَ مانشانتگ ات۔
منا انچو سما بوگا ات کہ انکلاب کاسترو براتاں تہنا وتی ھاترا آورتگ، ایشاں وتی لس مھلونک ءُ چے گویرا رد داتگ انت۔۔۔
روان انت۔