کیوبا (اسپینش کوبا) ءَ مہ چے دیست۔ (ھشتمی بَھر)
کیوبا (اسپینش کوبا) ءَ مہ چے دیست۔ (ھشتمی بَھر)
نبشتہ کار: انجنئیر الطاف حسین بلوچ
نبشتہ کار: انجنئیر الطاف حسین بلوچ
ما ناھاری کت، کوفی ءِ ورگ ءَ دم بالا بوت، چاریں نیمگا سنگاں گوں بستگیں مزنیں ماڈی ات انت کہ مِک اتنت۔
دانگ دانگیں رنگ برنگیں کُہنیں دورے گاڈی ات انت کہ سواریانی ودار ءَ دمکانی کُنڈ ءَ اوشتاتگ انت۔
بلے نہ گیشیں ھارنا نی توار ات کہ تکانسر بکنت، نہ مردمانی رش ءُ کش۔
کدی کدی مئے ھندی بسانی وڑیں ھارن ءِ توار گوشاں کپگ ءَ ات کہ ھمیں امریکہ ٹیکساں جتگ اتاں۔
بلے مردم گار اتاں۔
انچو گشے جمعہ یا یک شمبے ببیت۔
ریستوران ءِ وئیٹر اتک مئے بِل ئے گپت گپے نہ کُت شت۔
پاد آھگ ءَ پیسر منی چّم مزنیں ماڈی ئیں ءَ کپتاں کہ گشے واشنگٹن ڈی سی ءِ وائٹ ہاوس ببیت۔
من گورو گشت کہ اے ماڈی چارگی انت۔
من دیستگ تو جیسز ءَ بزور برو بچاریں، منا کمو لوگ ءَ گپ کنگی انت۔
آئی دل ءَ نیَت، من جیسز زرت دیما پہ ہمیں ماڈی ءَ رھادگ بوتو۔
دور ءَ چہ کسان ات، بلہ نزیک ءَ سک مزن ءُ پراہ ات۔
ماڈی ءِ برز ءَ کیوبا ءِ مزنیں بیرکیں لگوک ات ءُ جہل ءَ گوں مزنیں لبزاں CAPITOLIO نبشتہ ات۔
ماڈی اسپیتیں سنگ ءَ گوں جوڈ کنگ بوتگ ات کہ ایندگہ اسپینش دورے ماڈی آں چہ جتا ات۔
گیٹ ءِ دیما دو مزنیں بُت مک ات کہ کساس بیست میٹر مزن اتاں کہ زہم ءُ اسپر ئے دست ءَ ات ایشانی تہا یکیں جنین ءُ یکیں مردینی بتے ات، گشے آسن ءِ گاٹ بباں۔
بورڈئے سرا نبشتہ ات کہ ماڈی ءِ جوڈ کنگ اسپین ءَ چہ آزاتی گرگ ءَ پد 1926 ءَ امریکی کمک ءَ بندات بوتگ ہمیں ھاترا گشے وائٹ ہاوس ببیت۔
سہ سال ءُ چیزیں ماہ آں 500 ءَ گیش مردماں کار کتگ ءُ بزاں 1929 ءَ اے ماڈی سرجم بوتگ۔
بندات ءَ ہما دورے کیوبن کانگریس ءِ ھاترا ہما ماڈی کارمرز بوتگ، بلے 1956 ءَ فیڈرل کاسترو ءِ آھگ ءُ سوشلسٹ انکلاب ءَ پد وھدے کانگریسی سسٹم ھلاص کنگ ءُ سوشلسٹ نظام آرگ بوتگ اے مزنیں ماڈی اکیڈمی آف سائنس اینڈ ٹیکنالوجی لائبریری جوڈ کنگ بوتگ ات۔
اے ماڈی تہا چہ ڈن ءَ دو سری زیبا ڈولدار، پراہ ءُ شاھگان انت،
انچو گشنت کہ وائٹ ہاوس ءَ چہ ایشی گُمبُد کساس یک میٹرے مستر انت۔
ہما دوراں اے ماڈی کساس ہبدہ ملین امریکی ڈالر ءَ جوڈ بوتگ
جیسز منا ھال دیگا ات کہ دوہمی تبک ءَ یک بیست ءُ چار کِرٹ ئے Dimond بزاں ارجل ئے اِیر انت، ھیرانی ءِ گپ ایش انت کہ اے ارجل ءَ چہ Havana ئے گوں کیوبائے ایندگہ شھراں دوری ماپ کنگ بیت، بزاں اے بلڈنگ Havana ءِ دل انت
ماڈی سک مزن ات بازیں دری ٹورسٹ چارگے اتکگ ات انت، ما ایندگہ ہال ءُ گیشتر تہے نہ شتاں کہ گورو کال کنگا ات۔
ما ماڈی ءَ چہ در اتکاں۔
ڈن ءَ گورو مئے ودار ءَ ات، ازمان جمراں پتاتگ ات، کمو کمو ترمپ بندات بوگا ات ءُ گمان ہمیش ات کہ نو کجام ھم ساعت ءَ ترندیں ھور ایر بدنت۔۔
ڈن ءَ مھلونک انگت سک کم ات، ایندگہ ملکاں اے پیمے جاگہاں ڈنی سامانانی مارکیٹ ءُ نیادی باز بنت، بلے کوبا ءِ سرکار بندشانی چیرا انت، انگت دری سامان سر نہ بوتگ انت۔
روان انت