کیوبا (اسپینش کُوبا) ءَ ما چے دیست؟ (دومی بھر۔)
کیوبا (اسپینش کُوبا) ءَ ما چے دیست؟ (دومی بھر۔)
نبشتہ کار: انجنئیر التاپ بلوچ
مئے ھوٹل بالی پٹ ءَ چہ کساس نیم کلاک ءِ راہ ات، دگانی سرا گاڈی ءُ موٹل نہ بوگءِ سوب ءَ ما زوت سر بوتاں،
ھوٹلے ماڑی سک کوھنیں ماڑی یے ات کہ اسپینش آرکیٹیکچر ترز ءَ نوزدہ سدے ءِ وھد ءَ جوڈ بوتگ ات،(منی گمان ات بلے رندا زانگ بوت کہ اژداھُمی کرن ئے ماڈی ئے).
ھوٹلے راہ ءَ ھم گیشتر ماڈی ہمیں پیم مِک اتاں، بازینے پروشگ ھم بوتگ ات بلے گشے راہءِ نیم ءَ کار یلہ دیگ بوتگ کہ نبی ,کیوبا میان استمانی جتگیں بندشانی سوب ءَ ٹیکنالوجی ءَ سک پشت ءَ انت۔
باور کنے انگت شریں انٹرنیٹ ھم نیست (پدا دلا اتک مئے مُلکاں زنے کجا است)
ھوٹلے تہا مرمرانکیں لیٹ روک ات انت، گشے روژنائی ءِ بدل ءَ تہاری شنگ بکن انت، ماڈی ءِ تہا انچیں بوہے شنگ ات کہ کہنیں بانے سان بزوریت، ءُ شاہدی بدنت کہ ماڈی سک کہُن انت بلے در زاہر ءَ بروبر ات
رنگ ءُ روگن ات ساپ ءُ سِلا ات کہ ھوٹل ببنت۔
ما کہ آھگ ءَ پیسر ھوٹل بک کنگا اتاں گڑا مئے لوٹ ہمیش ات کہ ھوٹلے ماڈی اسپینش آرکیٹیکچرے ترزے ماڈی ئے ببیت، شھر ءِ نیام بزاں Down town ءَ ببیت ءُ تیاب نزیک ببیت۔
کیوبا ءَ ہوٹل گران و نیاں بلے ارزان ھم نینت، بلے انچو گشاں کہ ھورانی سیزن بزاں تَری ءِ سیزن ءَ ارزان بنت اے سیزن ءَ ٹورست کم بنت بلے شپی مکسک سک باز بنت۔
کیوبا ءِ دو موسم انت ڈرائی یا ویٹ دگے سکیں سردی ءُ گرمی نیست۔
ڈرائی سیزن بزاں ہما سیز کہ ھور نہ بیت، چوناہا تہنا کوبا نہ تیوگیں سینٹرل امریکی، کیریبین ءُ داں ویسٹ افریکہ ءَ برو گیشتر ملک Tropical انت ءَ موسم ہمیں وڈ انت
کُوبا ءَ تَری پنچ ماہ برجا مانیت گڑا یکوئی ھور انت کہ ھور انت، ھشکی ءِ دوراں ھم ھور بنت بلے سک کم۔
مئے ھوٹلے ایندگہ آسراتی دُرس بکنگ سائٹ ءِ سرا ایر اتاں ءُ ھوٹل ہما پیم ات کہ ما آھگ ءَ پیسر عکسانی تہا دیستگ ات۔
گاڈی کے مارا بالی پٹ ءَ چہ زرتگ اتے ءُ ھوٹل ءَ سرے کتگ ات ھوٹلے جندے گت۔
مئے سامان ھوٹلے کارداراں دست گپتاں ءُ وش رو، اسپیت پوست ءُ بارگ بندیں جنکے کہ عمرے کساس سی سال ببیت مارا وش اھتے کُت ءُ کوٹیانی چابی ایش دست ءَ داتاں۔
من یک چیزے مارگ ءَ اتو کہ کالونیل تاگتانی دوراں باریں ایشاں چونے ازباب کارمرز کتگ کہ سداں سال گوزگ ءَ ابید ھم ماڈی ہما پیم مِک انت ءُ اگاں پہریزگ ببنت بارے دگے چنت سال ہمے وڈ برجم بنت۔
پدا دلا اتک کہ اے دُرسے کوٹ ءُ کلات ءُ ماڈی گلام کتگیں انسانانی ھوناں گوں بستگ انت بلکہ ہمیں ھاترا چو مھر انت ایشانی زگریں ھون ھوار انت۔
کُوبا ءَ آوکیں گیشتر ٹورسٹ ہمیں شازدھُمی کرن ئے ماڈیانی چارگا کاہنت کہ اسپین ءَ وتی دوراں ھڈ کتگ انت، ءُ ایمن بوتگ کہ اھانا کس ادا چہ در کُت نہ کنت۔
بزاں بقول میاہ لال نزوریں ملکانی گرگ ءُ وتی کالونی کنگ آ دوراں فیشنے بوتگ کہ تمردیں ملکاں کتگ۔
مروچی آھانی داتگیں زبان ءُ ہمیں ماڈی پش کپتگ انت جند ایش در زاہر ءَ درا نہ بنت بیدے ،امریکہ، کینڈا ءُ اسٹریلیا، کہ اسپیت پوستاں اودے جہمند دُرس کشتگ انت یا انچوش کتگ انت کہ بزاں ھلاص انت وت نو مالک انت۔
ما دو بج ءَ ہیٹی بالی پٹ ءَ نان ءُ بئیر وارتگ ات۔
جہازے تہا مارا آپ ءُ تام ایش نہ دات کہ منی دلا ارزان ٹکٹیں جہاز ہمیں پیم بنت، نو کساس شپے نہہ بج ات گُشن ءُ تُن دوہیں گران ات انت۔
ما وتی سامان کوٹی ءَ ایر کتگ ات انت، دست ءُ دیم شُشتگ اتاں کہ ڈن ءَ شپ گردی ءَ نان ءَ آپ ورگا برواں۔
منی دلا من شمارا انگت ھال نہ داتگ کہ منی ہمراہ کے انت،
ما کہ پلان جوڈ کنگا اتاں گڑا مئے پاکستانی ہم کار ھوار نہ بوت انت۔ چوناہا مئے ہمراہ نہ بوتگ انت کہ مئے موڈے مردم نہ انت، بلے ایندگہ وقتاں ھور تور انت۔
ھاجی آں، ملاہا، باریں دگے چے چے آں،
ما پدا بقول آھانی موالی آپ ءُ تام والا۔ (یک انجئینرے بوتگ رینش ءِ چو ملا لیاقت ولی ءَ پیما دلے سرا ایر بوتگاں وت نہ وارتگے بلے مُدام کہ نیادی ءَ شتگ منی ھاترا کریٹے بئیر ئے الم آورتگ گوں نہ زانی چیا بلے من ئے سک دوست بوتگوں)
گڑا آھاں ٹکٹ کت پہ اسٹیٹ ءِ ھاترا من گوروہ کہ ہندوستانی ئے ات ءُ جیسز (Jesus) کہ وینزویلا والہے امریکہ ءَ پناہے زرتگ، ( انچو گشاں کہ وینزویلا ءِ کساس پنجاہ درسد ء٘ چہ گیشتر مردم دراہنڈھ انت گیشتر امریکہ ءُ ہمسائگیں ملکاں شتگ انت، تو گشت کنے کہ وینزویلا لیتن امریکی ملکانی افغانستان انت)
ما ھوٹل ءَ چہ در اتکاں دیم پہ رستوران ئے پٹگ کہ ورگ بِرسیت۔
گوروہ پیسرا باز براں اتکگ آھارا دُرسے ٹکانہ ءُ شگنز یات ات انت۔
روان انت۔۔۔۔