گدار: لیڑی چیٹرلے ءِ آشک۔ مومن مستاگءِ چمشانک
گدار: لیڑی چیٹرلے ءِ آشک
( lady Chatterley’s lover)
ڈی ایچ لارنس
مومن مستاگ
باز چیز انچین ھست کہ آھانی پدّر کنگ مئے چاگرد ءَ گناھے۔ بلے آھانی پدّر کنگ المی انت چیا کہ اے بنی آدم ءِ زندمان ءِ بھر انت۔ اگاں کسے وتی گدار ءِ تہ ءَ زالبول ءِ گور ءِ نام بہ گیپت شہ اشی مردم اے سرپد مہ بیت کہ پلان نبشتہ کار سکّیں دپ کھبگیں ءُ سبکیں نبشتہ کارے۔ اگاں نبشتہ کار یک بنگپے ءِ بابت نبشتہ بہ کنت آ الم ھما چیزانی ناماں گیپت کہ ھما بنگپ ءِ چست ءُ ایر بنت۔ اگاں نبشتہ کار ءِ بنگپ وپت ءُ واب بوت۔ گڑا آ پونز ءُ گوش ءِ نام ءَ نبشتہ وَ نہ کنت بلکیں گور ءُ ران ءِ نام ءَ نبشتہ کنت چیا کہ اے نشانی انت۔ اے نشانی منی ءُ تئی انوگیں جوڑ کنوک نہ انت سداں ھزاراں سال انت ھمے چیز کارمرز بوھان ءَ آیان انت۔ ڈی ایچ لارنس ءِ گدار ” لیڑی چیٹرلے ءِ آشک” ھمے وڑیں بنگپانی سر ءَ انت۔ لارنس اے بنگپ ءَ پدّر کنان ءَ انچو جھلانکی ءَ روت کہ یک یکیں چیزاں ھورتی ءَ گوشان کنت۔ ھمے سبب انت کہ اے گدار ءِ سر ءَ سی ءُ یک سال بندش لگ ات۔ 1928 ءَ چاپ بوتگیں کتاب 1959 ءَ سرجم ءَ چاپ ءُ شنگ بوت۔
مزنیں نبشتہ کار وتی چاگرد ءَ سرپد بنت ءُ چاگرد ءِ کدُ ءُ بالاد ءَ زان انت۔ ھمے سبب انت کہ لارنس شہ وتی کتاب ءِ چاپ بوھگ ءَ پیسر 1927 ءَ مس پیرن ءِ نام ءَ نمدی یے نبشتہ کنت کہ:
“منی گدار “لیڑی چیٹرلے ءِ آشک” ءَ من ءَ دو دِلَگ کتگ۔ من زاناں کہ مردم اے گدار ءَ نا زیبا گوش انت بلے اے نازیبائیں گدارے نہ انت۔ من مدام ھمے جھد کتگ کہ جنس ءِ سیادی ءَ شرمندگی ءِ وڑا پیش دارگ ءِ جاگہ ءَ جوان ءُ روا جوڑ بہ کنان ءُ پیش بہ داراں۔ اے گدار ءِ تہ ءَ من اے جھد کتگ ءُ باز جھلانکی ءَ شتگ آں۔ منی نزّ ءَ اے گدار ھمے وڑیں زیبا نازرک ءُ گران ملّیں چیزے انچو کہ مئے برھنگیں زات۔ منی جاور ھمے وڑ انت کہ من اے گدار ءِ چاپ کنگ ءَ اوں ترسگ ءَ آں کہ بد بھتیں ٹائپسٹ اشی جوانیں گپاں ءَ در مہ کنت”۔
مئے لبزانک ءَ بازیں چیز ھست کہ نبشتہ کاراں شہ ترس ءَ چیر داتگ انت۔ چاگرد راستی ءَ برداشت نہ کنت ھمے راستی ءِ برداشت نہ کنگ لبزانک ءِ سر ءَ بلاھیں تاوانے۔
لارنس ءِ وانگ مردم ءَ تاھیر دنت چیا کہ لارنس گوں راستی ءَ بندوکیں نبشتہ کارے اے گدار ءِ وانگ اے سبب ءَ ھم وش انت کہ لارنس وانوک ءَ نہ تاچین ایت کارست ءُ واکیاتاں ارزانیں وڑے ءَ مردم ءِ مجگ ءَ نندارین ایت بازیں نبشتہ کار مردم ءَ را لبزانی پشت ءَ تاچین انت۔ ھر کس ءِ وتی دوستی یے۔ من ءَ چشیں گدارانی وانگ دوست نہ بیت کہ من ءَ بہ تاچین انت ءُ من سرپد بوگ ءَ وھد بہ زوراں۔ چندن ساچ گش ایت کہ ” گدار ءِ تام ءَ بگر ءُ بوان” لارنس انچیں نبشتہ کارے کہ مردم آئی لبزانی تام گپت کنت۔ اے گدار 272 تاکدیم انت بلے من 30 ساھت ءِ مدت ءِ تھا سرجم ءَ ونت چیا کہ اے گدار ءَ من ءَ شہ وت ءَ دور بوھگ ءَ نہ اشت۔ اے گدار ءِ وش ءُ تامدار کنگ ءَ لارنس ءِ مزنیں سِلا فلسفہ انت۔ لارنس زندگی ءَ گوں ھما چماں چار ایت کہ زندگی ءِ ھک ادا بہ بنت۔ ھما چیز کہ مردم ءِ ھمک روچی زندگی ءَ بہ انت بلے مردم مار ات اش نہ کنت لارنس ھما چیزاں مردم ءِ دیم ءَ انچو درانگاز کنت کہ مردم ءَ را گوں زندگی ءُ چاگرد ءَ مھر بیت۔
گدار گوں کونی ءِ پجّار ءَ بندات بیت کہ گدار ءِ بنکی کارست انت۔ کونی یک مالدار ءُ آزات پگریں لوگے ءَ ودی بوتگ۔ آ شہ کسانی ءَ انچیں چاگرے ءَ رد ایت کہ مھر دوستی وپت ءُ واب ءُ دنیا داری ءَ سرپد بیت۔1917 ءَ بیست ءُ سے سال ءِ اُمر ءَ آئی آروس گوں کلیفورد چیٹرلے ءَ بیت۔ کلیفورڈ یک مالدار ءُ ھستی داریں ورناھے ءُ یک دلیریں فوجی یے۔ شہ آروس ءَ یک ماھے پد کلیفورڈ جنگ ءَ روت ءُ واتری ءَ شہ ناپگ ءِ چیر ءَ دیم آنگری ءِ بدن پالج بیت ءُ نامرد ءَ گس ءَ کیت۔ کلیفورڈ ءِ تیوگیں زند یک کرشی ءِ باھوٹ بیت۔ کونی ءُ کلیفورڈ ریگبی ءَ رو انت ءُ جاھمنند بنت شہ جنگ ءَ پد کلیفورڈ ھورکیں نندگ ءَ سِزّریت ءُ وانگ ءَ بندات کنت ءُ یک سوبمندیں نبشتہ کارے بیت۔ آئی کرّا جوان جوانیں نبشتہ کارانی رو آ بیت۔ کونی درائیں نبشتہ کاراں بے اگل ءُ کم زانت سرپد بیت ابید شہ مائیکلس ءَ کہ رند ءَ گوں کونی آئی کسان ءُ بے تربّڑیں سیادی یے بیت۔ کونی پہ انچیں سیادی یے دلمانگ بیت کہ گوں سرجم ءُ سرپدیں مردینے ءَ بہ بیت بلے درائیں مرد آئرا ناسرجم گندگ ءَ کاینت کہ پہ زالبول ءَ ھچ وڑیں مارشت اش نیست۔ کلیفورڈ ھر وھد ءَ گوں وتی نبشتہ کاری ءُ اشکر ءِ کانانی کاراں دز گٹ بیت۔ کونی ءُ کلیفورڈ ءِ نیام ءَ دوری گیش بوھان بنت۔ شہ بے چاڑی ءُ ابیتکی ءَ کونی ءِ جان ءِ گوشت آپ بیان بنت۔ پہ کلیفورڈ ءِ چست ءُ ایر ءَ “نرسے” آرگ بیت کہ نام ئِے مسز بلولٹن انت۔ کلیفورڈ اول سر ءَ تکانسر بیت بلے مدام مدام ءَ گوں مس بلولٹن آئی وھد جوان گوزان بیت۔ دوئیں شپ ءَ تاش کن انت ءُ زرّ ھم ایر کن انت۔
کونی ءِ زندگی ءَ میلرس کیت کہ کلوفورڈ ءِ پارک ءِ پاسپان انت۔ میلرس آروسی ئیں مردے بلے نوں شہ وتی جنین ءَ زار انت۔ میلرس پیسر ءَ ھندوستان ءَ فوج ءِ تہ ءَ بوتگ۔ آئی کرنل ءِ مرگ ءَ پد آ انگلستان ءَ دیم دئیگ بیت ءُ ادا نوکیں زندے گوں پاسپانی ءَ بندات کنت۔ میلرس ترند ءُ راست گشیں مردمے۔ آئی ابیتکی بے تواری ءُ راست گشی کونی ءِ دل ءَ پہ آئی مھر چست کن انت۔
دوئینانی میان ءَ باز رند ءَ گند ءُ نند بیت دوئیں پارک ءِ یک کسانیں کُڈّکے ءَ گند نند ءُ وپت ءُ واب کن انت۔ آھانی میان ءَ باز رند ءَ وپت ءُ واب بیت بلے کونی انگت گوں آئی چو بیگانگانی وڑا پیش کیت ءُ یک دوری یے مار ایت۔
یک روچے دوئیں ناگت ءَ پارک ءِ تھا دچار کپ انت ءُ بزیں درچکانی تھا وپت ءُ واب کن انت۔ دوئیں یک جاگہ شہ ابرمی لزت ءَ آشنا بنت(Orgasm)۔ کونی ءِ ھاترا اے جتا ءُ بے دروریں تجربگے بیت۔ کونی کم کم ءَ گوں میلرس نزینک بیان بیت۔ لھتیں گند ءُ نند ءَ پد کونی مار ایت کہ منی لاپ ءَ میلرس ءِ زھگ انت۔ کونی سک وش بیت کہ میلرس یک زندگیں مردمے ءُ سرجمیں مردینے۔ آ مار ایت کہ میلرس شہ اے کم زانت ءُ کم اگلیں نبشتہ کار ءُ کاروباری ئیں مردم ءَ سد بالا انت۔ آ دوئیں انچو نزینک بنت کہ وت ءَ را یکے مجگے (دماغ) سرپد بنت نیکہ دو جتائیں مردم۔ میلرس پہ وتی جنین ءَ کانودی کاگدیں دیم دنت کہ من ترا سئیں دئیگ لوٹاں۔
کونی پہ سیل ءُ سوادے وینس ءَ روت۔ لھتیں روچ وینس ءَ گوز ایت۔ یک روچے پہ کونی نمدی یے کیت. “میلرس ءِ جنین آتکگ ءُ گوں میلرس پہ زور یکجاہ بوھگ لوٹ ایت ءُ پہ سئین ءِ دئیگ ءَ رازی نہ انت۔ میلرس ءَ وتی کوٹی یل ءَ داتگ ءُ شتگ۔ بلے انگت پاسپانی ءَ یلہ ئِے نہ داتگ”۔ اے نمدی ءَ مس بلولٹن پہ کونی ءِ نام ءَ دیم دنت۔
پدا کلیفورڈ ملیرس ءِ جنین ءَ گلین ایت چیا کہ آئی جنین کونی ءُ میلرس ءِ بابت زارپاشکی کنت۔
کلیفورڈ لھتیں روچ ءَ پد میلرس ءَ شہ پاسپانی ءَ کش ایت۔ میلرس پہ کونی نمدی یے دیم دنت کہ من لندن ءَ روگ ءَ آں۔ کونی نمدی یے پسو ءَ یک جاھے ڈسّ ءَ دنت کہ پلان جاگہ ءَ گون من گند ءُ نندے بہ کن۔ میلرس گوں کونی گند ءُ نندے کنت۔ کونی ءُ آئی گھار ہلڈا دوئیں پندلے ساز انت۔ ءُ یک دگہ مردینے نام گر انت کہ کونی را ڈنکن ءِ زھگ لاپ ءَ انت۔ کونی پہ کلیفورڈ نمدی یے دیم دنت کہ منی سئینان بدئے بلے کلیفورڈ آئی گپاں نہ زور ایت آئی جند ءَ ریگبی ءَ لوٹائین ایت۔ کونی ریگبی ءَ روت کلیفورڈ ءِ ادا وتی سئینان لوٹ ایت۔ کلیفورڈ آئی سئیناں نہ دنت۔ کونی کلیفورڈ ءَ وتی ءُ میلرس ءِ بابت ءَ گوش ایت بلے کلیفورڈ انگت آئی سئیناں نہ دنت۔ کونی پدا واتر ایت ءُ وینس ءَ روت۔
گدار ءِ ھلاسی گوں میلرس ءِ نمدی یے بیت کہ پہ کونی دیم ئِے دنت۔ میلرس یک پارکے کار ءَ انت ءُ کونی گوں وتی گھار ءَ آئی لوگ ءَ انت۔ دوئیں پہ وتی وتی سئیناں ودار انت ءُ ھمے امیت ءَ نشتگ انت کہ یک روچے الم یکجاہ بنت۔
گدار ءِ ھلاسی مارشت ءُ جزبگاں چست کنت مردم انچو مار ایت کہ من شہ وتی لھتیں ھمراھاں گستا بوت آں۔ میلرس ءِ کوٹی پارک ءِ پلّ ءُ درچک مس بلولٹن ءُ کونی ءِ زیبائی اے انچیں چیز انت کہ اشانی جتائی مردم ءَ تور ایت۔ من ءَ اے گدار اے چیز ءَ دوست بوت چیا کہ لارنس گپاں دراج نہ کنت ترا ھما دمان ءَ دلجم کنت کہ من اے گوشگ لوٹ آں۔ ھمے چیز یک نبشتہ کارے ءِ مزنیں سومندی انت۔ لارنس سوبمندیں نبشتہ کارے بوتگ ءُ آئی نبشتگیں مواد ابدمان انت۔