دستونک
( بالاچ گُل )

گم ءِ آس ءَ دلے تھنا سُچان اِنت
کنان اِنت وشیاں مانا سُچان اِنت

تئی یاتانی جمبر شنزگ ءَ آں
کہ مرچی چونے آزمان ءَ سُچان اِنت

مئے چماں آس روک اِنت بیت کرنے
مئے چماں کسے بے نان ءَ سُچان اِنت

ابیتکی ءَ وتی ھرجان کرتگ
شپ ءِ نیم ءَ کہ دیوان ءَ سُچان اِنت

وتی لوٹوکاں اینچو گم مہ دے دوست
اے گران ئے وھد ءَ ارزان ءَ سُچان اِنت

بلوچ ءَ را نہ بیت لوگے پہ نام ءَ
وتی آ پُرشتگیں بان ءَ سُچان اِنت

توامیں زندگی پہ درد گوستگ
توامیں اُمر بے مانا سُچان اِنت