گوانک۔ اسلم قادر ءِ پربند ندر پہ باسکاں
گوانک
بیا بدئے دست ءَ ، لیکپیں کوہ ءَ ،
پہ وتی ڈیھ ءِ حاتر ءَ مرچی ،
توپک ءَ زورین ءُ قطار بندیں ،
نوک کنیں کوھنیں قصہے مرچی ،
حمل ءُ جیھند ءِ توار برزانت ،
چاکر ءَ ہند ءِ سرزمین لرزینت ،
جی پہ دادشاہ ءُ جی پہ بالاچ ءَ ،
جی پہ گوھرام ءِ سسہ ءُ ساچ ءَ ،
داں مہ بیت آجوہ ڈیھ مئے ماتیں ،
ما بلوچی ءِ نام ءَ چون کرزیں ،
من وتی ڈیھ ءِ لاڈیں بچیگاں ،
چوں کناں بیھال گرمیں سجیگاں۔
کوہ گیابان ءُ سرمگیں جنگل ،
ترند ءُ تیز گامیں آ تچوک آسکل ،
ناہ الینی ءِ وش تامیناں،
چوں کناں بیھال کیچ ءِ آمین ءَ ،
درس منا ڈیھ ءَ داتگ انت وشی ،
چوں تئی چانوہاں دل اوں کش ایت ،
سئی ببو دژمن بشتگ من چادر ،
چوں بیت پہ تو گنجیں اے گوادر ،
زاناں من روچے حاک سرا شانئے ،
تو چہ داسپاناں شر منا زانئے ،
ما حلب زرت ءُ دہلی ءَ سر کُت ،
دژمن ءِ دل چہ روتگاں در کت ،
درشت انت حال مئے کوریں فرھنگ ءَ ،
پشت نہ بیت اے راج ھچ وڑیں جنگ ءَ ،
دژمناں ٹُنگیں کُڈُکے جوڑ کُت ،
نام بلوچانی بے سراں ھوڑ کت ،
ما گدانانی واجہیں ازل ءَ ،
چوں پکیرانی پنڈگاں زوریں ،
ڈیھ منی جنگ ءِ سیمسریں انگت ،
ڈیھ منی عشق ءِ دیرگیں سنگت ،
ڈیھ منی عشق ءِ توکلی مستیں ،
سمُل ءِ عشق انت ڈیھ منی استیں ،
ڈیھ منی عزت ، ڈیھ منی شھداد ،
ڈیھ منی مھرُک ، ڈیھ منی مہناز ،
ڈیھ منی شیریں ، ڈیھ منی فرہاد ،
ڈیھ منی شئے ءُ ڈیھ منی حانی ،
ڈیھ منی روک آنت، ھر دو چمانی ،
ڈیھ منی عومر ، ڈیھ منی ماہو ،
ڈیھ منی سسی ، ڈیھ منی پُنو ،
ڈیھ منا درسیں ترانگاں گیج ایت ،
دژمناں روکیں انگراں بریج ایت ،
بیا منی راج ءِ جام درُک بیا ،
بیا منی مند ءِ ملا فاضُل بیا ،
جی ظہور شاہ ءُ پہ عطاشاد ءَ ،
بیا منی قاضی ،بیا مبارک بیا ،
بیا منی ممتاز ، شُت منی شوھاز ،
راج ءِ وتی نام ءُ ننگ ءَ تو پاھاز ،
راست بوت بیدار تئی شُبینگ چوں ،
دُژمناں چماں داشت بینگ چوں ،
بل منی پُچاں دنز ءُ حاکیناں ،
دژمن ءِ سکیں چماں تراکیناں ،
جی منی مند ءِ سرمچاراں گِند ،
پہ وتی لج ءَ وارتگ اش سوگند ،
جی گوھارانی جذبہ ءُ ہُلاں ،
جی پہ ماتانی شھدیں نازینکاں ،
تُمپ گُشئے مرچی آس گواران انت،
سرمچارانی راہ ءَ چاران انت ،
کئے نہنگ ءِ نوں ھار ءَ داریتیں ،
نوں چتور کیچ کور چم چاریتیں ،
بستگ انت ورناہاں کفن مرچی ،
زاناں کہ بدواہ بنت دفن مرچی ،
جی منی گنجیں زعمران باتئے ،
دژمن ءِ واست ءَ مرگ ءِ سوغاتئے ،
نہ ترا بیم ءُ نا ترا تُرسے ،
بیا کنیں بدواہ ءَ وتی پُرسے ،
جی پہ پنجگور ءِ سیاہ چکیں ڈناں ،
قصہاں جُھد ءِ درس تئی من انت ،
کئے نوں مرینیت جنگ ءِ مھری ءَ ،
بیا رویں چاریں پُلیں زہری ءَ ،
وڈھ ءُ خضدار ءُ نال ءُ منگوچھر ،
بوتگ انت راج ءِ واھگ ءِ مانتر ،
نوشکی ءِ بازار آس گواران انت ،
چو گشئے مثل ءِ پُل بہاران انت ،
بیا بچار شال ءِ دمک ءُ بازاراں ،
آس درنزانیں برفیں کوہساراں ،
بیلیاں آشوبی سرا زُرتگ ،
کئے گشیت ملک مئے روبہاں برتگ ،
چوں شمشاں من سیوی ءِ شھر ءَ ،
چاکر ءِ ہند ءُ چاکر ءِ دھر ءَ ،
انگت مستاگ انت پُلیں بانداتئے ،
پہ وتی راج ءَ وشیں سوغاتئے ،
پہ سرجمیں پربند ءِ وانگ ءَ ادءَ کلک بہ کنئے