گوں اندوھاں ، مھنازے ناں انجیرے
دستونک ۔۔۔۔ مجید عاجز
گوں اندوھاں ، مھنازے ناں انجیرے
جَکسیت کوھاں ، مھنازے ناں انجیرے
شھدادیں مُرگانی کُوکُو شَپدست اَنت
گیر کُدوھاں ، مھنازے ناں انجیرے
وھد ءِ گْوات ءَ لیلو لیل نہ چَنڈینتہ
چو کہ پُلوھاں ، مھنازے ناں انجیرے
ملگورانی تاب ءُ پیچاں مان اَڑیت
پہ نازبوھاں ، مھنازے ناں انجیرے
تاسے آپ ءَ بُڈّینتہ سد سال وفا
مَکر ءُ دْروھاں ، مھنازے ناں انجیرے
ارسی شَھمے کہ دیدوکاں تّراوَل کنت
سبزیت جوھاں ، مھنازے ناں انجیرے
چہ دنیا ءِ وشّی ، چہ امروز ءِ گَلاں
من آجوھاں ، مھنازے ناں انجیرے
پہ کِیّاھاں ہچّ نہ پَش کپتہ عاجز
گُڈّ ء سدوھاں ، مھنازے ناں انجیرے