گُشنت مردم بدل بیتگ زمانگ۔مبارک کازی
آدینک
لچّہ کار: مبارک کازی
گُشنت مردم بدل بیتگ زمانگ
چہ هدّ ءَ بُرز رپتگ زانت ءُ زانگ
بلے اے دل هما اِنت کہ هما اِنت
منارا جُست کنت اِے سُهب ءُ بیگہ
کدی باریں زر ءَ اوژناگ کنت روچ
کدی بیت دْرین ماه ءِ چارگ ءَ جنت
کدی اِستال کاینت گلزمین ءَ
کدی الهان کنت کؤش چو کپوت ءَ
کدی بیت موتک بنت نازینک ءُ هالو
کدی بیت مُرگ بنت باگاڑ ءُ بالو
کدی بیت کوه کرپاس ءَ بدل بنت
تئی بچکندگ منی شئیر ءُ گزل بنت
کدی جمبور بیت آسے ماں آپ ءَ
گروک چہ دیدگاں نودی شلان بیت
کدی ناشی چو سرگْوات ءَ بِہ کَشیت
کدی انجیر چو ناه ءَ بہ پشّیت
کدی انسان پدا چو شادو ءَ بیت
کدی انسان سرپد بیت وتارا
اِے دنیا جوڑ بیت نوکیں جهانے
کدی اِے زند گندیت اِے مراداں
کپاں من مردمانی دست ءُ پاداں
گشنت مردم بدل بیتگ زمانگ
بلے اے دل هما اِنت کہ هما انت
کدی باریں بدل بیت