گْوات کشیت گاری ءِ ءُ شاہ کِشکانی سِد اَنت۔ شے چاکر ءِ پربند
دستونک
شے چاکر
گْوات کشیت گاری ءِ ءُ شاہ کِشکانی سِد اَنت
مارا پرتو آرگ ءَ بنت ساہ کِشکانی سِد اَنت
تو کہ بوج ئے سیہ شپانی کور اِنزاریں دراں
چم وابیں بُرکھاں بنت ماہ کِشکانی سِد اَنت
پہ بھشتیں مولمانی زِر ھُلکّیں راھیاں
درد جُنز اَنت چو زمیں جُمب آہ کِشکانی سِد اَنت
ماں روا زند ءِ چو آپ ءَ بندگاہ ءَ نوبت ءِ
دیم ترّ اَنت راھیانی جاہ کِشکانی سِد اَنت
دْرچک زئیرانی گُباراں مُرگ چاتاں روک بنت
داں مہ روت ءُ مئیت چمّے بْراہ کِشکانی سد اَنت
تئی بھشتیں دامن ءِ نکشانی بندیگاں چہ در
پہ وت ءَ ما آیگ ءَ بئیں گْواہ کِشکانی سِد اَنت
یک سازیں چارگانی میم دْرپش اَنت منزلاں
تابتائیں دیدگاں پہ تاہ کِشکانی سِد اَنت
ھر شپ ءَ گِنداں دلے کہ روپگ ءَ اِنت گوھراں
ھر سباہ انچو سِدیت کہ لاہ کِشکانی سِد اَنت