ھَمدِلیں ھمسفر شپ اے گُمسار بیت غم مکن غم مکن
دستونک
اکبر بارکزئی
اکبر بارکزئی
ھَمدِلیں ھمسفر شپ اے گُمسار بیت غم مکن غم مکن
بام ءِ بانُک پدا شَوک ءُ سینگار بیت غم مکن غم مکن
تَلمَلیت دابے ءَ چوکہ بانوریں اِستار ءُ پَوراں مُدام
راہ مئے مثل ء دلدار ءِ گِیوار بیت غم مکن غم مکن
وَش نَیتکانی کَلپی ءُ پندل گری پاشک بنت، ءُ پدا
مئے سر ءَ مھربان ماھیں دِلدار بیت غم مکن غم مکن
درد ءُ دور ءُ غمانی موسم گْوزیت، مئے اے پُلّیں زمین
وَشدلیاّنی سوغاتاں وش بار بیت غم مکن غم مکن
روچے زوراک بد زِردیں رُزوا ءُ ٹِنڈِر ماں بازاراں بیت
گردن ئےِ بُلم بیت، “برسِردار،، بیت غم مکن غم مکن
سَبز ءُ آباد بیت، پُلّ ءُ گلزار بیت، شات ءُ آزاد بیت
مئے جھان اے پدا مِسک ءُ آتار بیت غم مکن غم مکن
الّم ءُ دلجماں من کہ کُٹّیتیں اے ساہ سوچیں سفر
منزل ءَ ما رَسیں ماہ ءِ دیدار بیت غم مکن غم مکن
لندن اکتوبر 2012