من زاناں من ھچ نزاناں۔
من زاناں من ھچ نزاناں۔
وہاب مجید
بیگاہءِ وہد اِنت۔ من وتی لوگءِ کسانیں کتاب جاہءَ نِشتگ ءُ فرانسسز فوکویاماءِ “دی ہنڈ آف ہسٹری”ءَ وانگءَ آں۔ اناگتءَ منی چم دیمءِ کتابانی کباٹءِ شِلفاں کپ اِیت۔ ہما کتاب کہ من ونتگ آں آ گِستا ایر اَنت ءُ ہما کہ وانگی اَنت آ گِستا خانہانی تہا اَنت۔ بلے مرچی من سماہ کُت کہ منی گیشتریں کتاب یک ھاسیں پِگرےءِ شونءَ دینت۔ آ پگر ءِ سیادی گوں منی گوستءَ اِنت۔ نودربریءِ زمانگءَ بِگر داں روچے مروچی منی سنگتی گوں ہمے پگرءِ کتاب ءُ انساناں گوں بیتگ۔ اے پِگر اِنت راجدوستی، انسان دوستی، چاگردی بدلی، پروگریسو، ءُ دیمروہیءِ۔ وھدے کہ من وتی کتاباں چاراں تہ گِنداں کہ منی کسانیں کتاب جاہءِ گیشتریں کتاب ہمے پِگرءَ گوں سیادی دارنت۔
اے ہمے پِگر اِنت کہ چہ نودربریءِ زمانگءَ مناں گون اِنت ءُ ہدءِ ہمراہیءَ روچ پہ روچ مُہکم تر بوتگ۔ بلے پدا من ماریت کہ علم وا سکیّں مزن ءُ پراہ ءُ شاھگانیں دریاے۔ ءُ منی علم دریاءِ تاسے آپ نہ بیت اِنت۔
دُنیاءِ ہچ قوم، قبیلہ، مزہب، فرقہ ءُ مُلک کتابءِ وانگءِ ھلاپ نہ اِنت بلکینہ منی یک جنرل ابزرویشن ے کہ ہر کس کتابءِ وانگ ءِ سرا زور دنت۔ آ مزہبی مردم ے بہ بیت کہ ایتھیسٹ ے۔۔۔ فیمینسٹ ے بہ بیت کہ میل شاونسٹ ے۔۔۔ راجدوست ے بہ بیت کہ فاشسٹ ے۔۔۔ ہر کس کتابءِ ارزشت ءُ آہیءِ وانگءِ سرا گپ جنت بلے ایوک وتی “اسکول آف تھاٹ” ءِ کتابانی بابتءَ۔ وتی Biased ایں کتابانی۔ وتی قوم، قبیلہ، دین ءُ دودءُ ربیدگی کتابانی۔
علمءِ در برگءِ بُنیادی مکسد ءُ راہ بند راستی ءِ سر بوھگ اِنت ءُ راستیءَ تو داں ہما وہدی سر نہ بے کہ مخالف اسکول آف تھاٹءِ کتاباں مہ وان ے۔ دو ہلاپیں تھیوریانی وانگ ءَ گوں اے گپ پدّر بیت اِنت کہ کُجام تھیوری دلیل، رِیشنل، ثبوت ءُ عقل ءُ ہوشءِ بُنپدءِ سرا اوشتاتگ ءُ کُجام بے بُنیں ءُ انچاہیں کِسّہ آرگءَ اِنت۔
اگاں پراہمری اسکولءِ یک کسان سالیں نودربرے سادہیں کِسّہ ءُ شاہریءَ گوں وتی کتابانی وانگءِ سفرءَ بُنگیج بکنت گُڑا اے نیچرل اِنت۔ بلے انچو کہ سال پہ سال آ مستر بوان بی ءُ کالج ءُ شاہ دربرجاہءَ روت گُڑا باہد اِنت کہ آ وتی پسندءِ کتابانی ہمراہیءَ سادہءَ چہ مشکلیں سرھالانی سرءِ کتابانی وانگءَ ہم بِندات بکنت دانکہ آہیءِ world view گیشتر ریشنل ءُ پراہ ءُ شاھگان بہ بیت۔
ہستیں عہدءَ مارا unlearn ءُ relearn کنگءِ نوکیں تھیوری ے Alvin Toffler ایلون ٹوفلرءَ پجّار کناہینتگ بِزاں کہ وھدءِ ہمراہیءَ انسان وتی آوٹ ڈیٹیڈ اِیں علمءِ جاگہءَ ہما فیلڈءِ نوکیں پٹ ءُ پولی علمءَ وتی بکنت۔ بیست ءُ یکمی کرنءِ وانندہیں مہلوک ہما گُشگ بیت اِنت کہ آ ہمک روچ نوکیں علمءُ ہنرءِ دربرگءِ جُہدءَ بکنت ءُ وتی کُہنیں علمءِ بُن اشتءِ سرا نوکیں علمءِ ماڑیءَ مِکّ بکنت۔
ہر انسان ے وتی گوست، وتی کہول، چاگرد، وانگجاہ، مزہب ءُ دودءُ ربیدگ ءِ سببءَ یک ھاسیں پگر ءُ شخصیت ےءِ مالک بیت اِنت۔ یک ھاسیں چاگردی، مزہبی ءُ راجی پگرےءِ واہند بیت اِنت۔ ایشیءِ تہا ہچ ھرابی نیست۔ ھرابی ہما وھد پیداک بیت اِنت کہ ما ایوک وتی پگرءَ راست ءُ دومی قوم ، مزہب ءُ چاگرداں ایر بجن اِنت۔ راستیءَ سر بوھگءَ پہ مارا وتی دماگءِ بندیں دروازگ پچ کنگ لوٹ اَنت دانکے آہیءِ تہا صباءِ سارتیں گواتے بیت۔
نودربریءِ زمانگءَ جنیں آدمءِ بارہءَ منی پگر روایتی ءُ narrow بوتگ۔ بلے وہدءِ ہمراہیءَ مرچی منی پگر بدل بوتگ۔ مرچی من سرپد باں کہ جنیں آدم ہم مردیں آدمءِ وڈا “انسان” اَنت۔ آہانی مارشت ءُ جزبات است اَنت۔ سیاسی، چاگردی ءُ مالی ھکّ آھانی پیداہشی انسانی ھکّ اَنت۔ مروچیگیں بیست ءُ یکمی کرنءَ اے گپ ثابت اِنت کہ ہچ چاگرد داں ہما وہدی جوانیءَ دیمروہی کُت نہ کنت دانکے آ وتی پنجاہ درسد آبادی بزاں کہ وتی جنیں آدماں تعلیم، روزگار، سیاست ءُ ریاستءِ چِست ءُ ایرانی تہا برابریءِ موہ مہ دنت۔ ما دور مہ روایں ۔ بنگلہ دیشءَ بچارایں کہ اودا گوستگیں سِی سالاں جنیں آدماں علم ءُ ہنر دربُرتگ ءُ “اکنامک امپاورمنٹ”ءَ پد وتی مُلکءِ جی ڈی پی گروتھ ءُ ایکسپورٹ تیزیءَ گوں ودینتّگ۔
منی ھیالءَ ما پمشکا کتاب مہ وان اِنت کہ مارا ہر پیم وتی کُہنیں سیاسی ،چاگردی ءُ ادبی پگر دلءِ بندءَ دارگی اَنت۔ ما بدل بوتگیں وہد ءُ نوکیں پٹ ءُ پولی علم، دلیل ءُ ریشنلءَ وتی رہنما اُصول جوڑ بکنیں۔
مہے شاہر شاہریءِ کتاب وان اِیت۔ مہے افسانہ نویس افسانہ وان اِیت۔ ہمے پیم سیاسی ءُ مُزاحمتی ادب وانوک ایوک وتی پگرءِ کتاب وان اَنت۔ منی ھیالءَ اے ھرابیں گپّے نہ اِنت کہ ہر کس وتی شوک ءُ تبیتءِ کتاباں بوان اِیت۔ بلے اگاں آ ایندگہ سرھالانی کتاباں ہم کم کمّے بوان اِیت گوں گُڑا آہیءِ علم ءُ زانت گیشتر پراہ ءُ شاھگان بیت اِنت ءُ آہیءِ گپ ءُ نویسگءِ تہا ہم زیباہی ے کیت اِنت۔
ما گوں ہمے نیتّءَ کتاب ے بوان ایں ءُ کواّساں گوش بدار ایں کہ مہے علم بہ ودیت ءُ ما نوکیں چیزے در بہ برایں۔ بقولِ سُقراط “من زاناں من ہچ نزاناں”۔ پرچا کہ علم دریاے ءُ پٹ ءُ پول کار ہمک روچ اے دریاءَ وتی نوکیں علم ءُ تھیوریاں گوں گیشتر پراہ ءُ شاھگان کنان اَنت پمشکا انسان ہمنچو کہ گیش بوان اِیت آ گیشتر ماریت کہ آ ہچ نزانت۔ بلے نزانگءَ چہ زانگ شر تِر اِنت۔ وانگ شر تِر اِنت۔