لنککانی زیمر۔نبشتہ کار: اے آر داد
لنککانی زیمر۔
نبشتہ کار: اے آر داد
نبشتہ کار: اے آر داد
۔۔۔۔
مرچی اوں سہب ءِ سرءَ چمانی پچ بیگءَ گوں ، چاہ ءُ سگریٹےءِ دلکشیں موسمےءَ گوں ھوار ً سید نمدی ً ءَ مپتائی ( رسول بخش مپتائی ) ءِ نامءَ سید ھاشمی ءِبنگیجی گپانی وانگءَ پد منءَ ڈاکٹر حنیف شریف یات اتک۔ مپتائی ءَ گوں حنیف شریف ءَ چوشیں سیالیءُ نزیکی یے نیست بلےھمے کہ نمدیءِ تہءَ داکترءِ نام گرگ بوت منی دلءُ ھیال حنیف شریفءِ نیمگءَ شت۔
ً مرچی سباہ ءَ داکتر کہ نادراھانی جستءَ آتک من آئیءِ کیتوءَ یک پوشے دیست۔ نزاناں چتور منی دلءَ گوشت کہ چو بیت کہ اے پوش منی نامءَ انت بلے من آئیءَ جست کت نہ کرت کہ چوش کنگ رد انت پرچا کہ ایشیءِ بزانت ایش نہ انت کہ ھرنمدیءُ پوشے کہ داکترءِ کیتوءَ انت ً منیگ ً انت۔
سید نمدی تاکدیم 27 ۔
یک روچے خوشحال (منی بچ )منءَ گوشگءَ ات ً ابا حنیف شریف گوشگءَ بیتگ کہ ملا ہدایت الرحمن ءَ دارو خانہ بند کتگ آزاناں نہ زانت کہ زمانگءَ چہ اے آرداد ءُ سرفراز محمد ایشیءَ ورگ ءَ انت۔ ً منی دپءَ چہ دراتک یار اے کبیس ءَ کسے سرپد بہ کنت زاناں دگہ مسال نیست ات کہ تو منی نام گپتگ۔
حنیف شریف منءَ چہ پیش آ خالد دادءِ سنگت بیتگ ۔ ہمائیءَ گوں پدی زر تیاب ءَ کرکٹ اش کتگ۔
من اے وھدءَ ڈگری کالجَ کیچءَ وانگءَ اتاں۔یک روچے دیست مرچیگیں فدا احمد چارراہءِ سرءَ بچکےءَ سرئے ساتگ ات ءُ انتظار حسینءِ ً جنہم کہانیاں ًدست ءَ انت ،منی نیمگءَ پیداک انت۔من اے وھدءَ کمیں پرشتءُ پوشیں چیز نویسگءَ یاں۔حنیف شریف منءَ زانت۔
حنیف کسانیءَ چہ جُستے ات۔
کیچءَ آزمانگءَ بیدے غنی پروازءَ اے دگہ دراہ شئیر نبیسگءَ ات انت۔حنیف شریف منی ہمرائیءَ داں حیات شوکت ءِ دیروءَ کیت۔اے دیوانءَ منءَ ریاض ( زھیر چمروک )یات کنت۔ درائیناں شئیر ونت حنیف شریف منءَآزمانکءِبارہءَ جست کت۔ توءُ نزیر ناسر پرچا چوشیں چیز نویس ات۔ ریاضءَ گوشت تویار اشکن ،چی گوشگءَ ئے۔ من گوشت اشیءَ بل وتی جستءَ کنت۔ھمے حنیف شریف ءَمدان مدانءَ وتی گستا ٹولی یے جوڑ کت۔کیچءَ نوکیں دورءَ رجانکءُ ردانکءِچاگردے کہ کسےءَ ساز اتگ ات آحنیف شریف ات۔ حفیظ رؤف، اومر کیا، مقبول ناسر ، عابد علیم ،اسلم جاوید دراہ آئیءِ ھمراہ ات انت۔ نوں مزنیں پھٹان (حیات شوکتءِ دیروءِ نزیکءَ بیتگ)ءِ ھوٹلءِ بدلءَ اشاں وتی بُندر اسلم شاہ مارکیٹ ءَ کسانیں پھٹانءِ ھوٹل کتگ ات۔کسے بورخیسءَ رجینگءَ انت، کسے سارترءَ، ءُ کسےءَ فاروقیءِ گلگدارے پہ رجینگءَ دست ءَ انت۔ قاسم فراز ھم ھمراہ انت، وت ءُ حنیف سنگت انت بلے اشانی نیامءَ ھو، اناں، ءِ ھم کسھے جنزان ات۔ حنیف شریف کہ بندات کنت قاسم آئیءِ درائیں گپانی سرءَ ،ھو ، نہ کنت۔
ً استاد ! ً اے استادءِ ربیت ھم حنیف شریفءِ آرتگیں موسمے، ھما اولسرءَ منءَ استاد گوشیت۔باریں دلءَ چی یے مان ات بلے ایشیءَرَواج گپت۔
حنیف شریف اولی مردم ات کہ منءَ گوشت ئے تو بلوچیءَ ایم اے بکن ، ھمودءَ مزن شھدربرجاہءَ بہ وانین۔ وانینگ وَ منی کسانیءِ اشکے ات اشیءَ ابید من دگہ ھچ نزاناں۔۔
2001ءَمنءَ حنیف شریفءَ وتی ہمرائیءَ شالءَ برت۔ من آئیءِ کوٹیءَ بی ایم سیءَ داشت۔وت برے جاھےءَ نشتءُ وپت منءَ بلے وتی سرءِ بان ءَ کتگ ات ئے۔من آئیءِ دیمءَ چیر نہ اتاں۔یک بیگاھے منءَ گوشت ئے۔ً استاد ! شراب ورے۔ً اگاں رسیت بقول محمد بیگ جگراں ِدران ئے۔ ً من ءُ آسرءُ رند کوٹی یےءَ پترتیں۔ اودءَ کس نیست ات باریں کجام داکترءِ کوٹی ات ، بلے چو زانگ بیتگ ات کہ نوک ملکءَ چہ اتکگ ات۔ آئیءِ گوشگ ھمیش ات کہ اے چہ ملکءَ پہ وتءَ ڈنی داروکارنت۔ آ بریف کیسےءِ دیمءَ نشت ءُ نمبرانی اے کپَ ءُ آکپ کنگءَ بریف کیس پچ بوت چاراں کلیمورءِ بوتلے مارا سُوکلو دیگءَ انت۔ ً تو استا د ھمدءَ بہ نندءُ ور، ھمے بزان تئی وتی کوٹی انت۔ً
استاد اصغر حسین ھم منی ہمرائیءَ چکاسءَ اتکگ ات۔آئیءَ پہ آرگنے باریں کجاچہ درگیتکگءُ آرتگ ات ئے۔من بباں کمار، آرگن گون بہ بیت اصغر حسینءَ، حنیف شریفءِ کمالءِ واہ ،واہ، چو چاپءُ نازینکءَ پدی نیمگءَ گون بہ بنت۔ کجام بلوچ انت کہ مہ جنت۔ استاد ! ایمن کلیانءَ بگر، نوں حنیفءِ کوٹیءَ پادءِ ایر کنگءَ جاگہ نیست۔دراہ کسے کہ ڈنءَ چہ اتکگ ات ھمدءَ داشتگ ات ئے۔ مارا تھتءِ سرءِ واپینتگ ات ئے وت بنءَ وپتگ ات ، اگاں مردم باز بیتگ ات انت گڑا وپسگءَ دگہ جاھے شتگ ات۔
ھمے موسمءَ منءُ حنیف شریفءَ نشتءُ بی ایس اوءِ کار رھبند ( آئین )بلوچیءَ ترینت۔ واجو ھم ھمے موسمءَ ھمودءَ ات ۔ً درد ًءِ آشک ات۔ من آدردءِ باسک کت۔دردءِ کہ اولی تاک ءَ من امبر ءُ حنیفءِ کنجے ھم ایر کرتگ ات ،اے تاک آئیءَ شالءَ وتیگءُ درآمدانی گورءَ برت ءُ پہ پھرءُ شانے گوشت ً بچار ات بلوچیءَ چوشیں تاکے درکپگءَ انت۔ً
داں من پہ چکاسءَ شالءَ اتاں ،شپءَ ماشئیرءُ لبزانکءِ سرا گپ جت ،سہب ءَ منءُ قاسم پیپر دیگءَ شتیں۔ قاسم یونیورسٹیءِ دپءَ ایرکپت من گام جنانءَ ڈگری کالجءِ نیمگءَ رھادگ بیتاں۔
حنیف میڑینگ ءُ جنگ دیگءَ ھم زبر ات۔ کدی کدی کہ رزاق نادر بی ایم سی ءَ ات گڑا حنیفءَ وتی جستانی گرنچ بوجان کت انت۔ برے برے وَ جست اش ھمے رنگءَ ایرکت انت کہ اگاں مردم ھیال مہ کنت دیمءِ مردم بے ازت بیت۔ ً استاد تو رزاق نادرءِ شاعریءِ بارہ ءَ چی گوش ئے۔ً رزاق نادر ھم اڑگءَ کم نہ ات ۔ دو رزاق کہ دیم پہ دیم بہ بنت بزاں موسم نہ کتگینءَ کنت۔ اشیءِ ھالءَ قاسم فرازءَ جست بگر ات۔
یک روچے من ءُ حنیف ،قاسم ھمراہ اتیں افضل مرادءِ گورءَ شتیں۔ آئیءَ گوشت مرچی بیگاہ ءَ ما اردوءَ عطاشادءِ سرا دیوانے کنگءَ ایں شما ھم چیزے بگوش ات ءُ بوان ات۔من وَ تیار بوتاں، حنیف نبیسگءُ گوشگءِ وڑءَ نہ ات۔ ما آئیءِ کوٹیءَ اتکیں۔حنیفءَ گوشت اے کاگدءُکلم انت تو داں چیزے نبشتگ بکن من کمیں وپساں۔ من زانتگ ات آ نہ وپسیت آگاہ انت۔بلے چارگ لوٹگءَ ات من اے کمیں دمانءِ تہءَ عطاءِ سرا چونیں چیزے نبشتگ کناں۔
منءَ کلاکےءِ تہءَ وتی بلوچی پیش دارگی ات ً عطاشاد مابعدجدیدیت ً اے سرھالءِ سرءَ من اردوءَ نبشتانکے نبشتگ کت۔ اے نبشتانکءِ تہءَ من اے گپ ھم نبشتگ ات انت کہ اردوءِ مردم عطاشادءَ کِمار نہ کن انت۔ اے دیوان ءَحکیم بلوچ ھم گون ات۔ من کہ نبشتانکءِ وانگ بندات کت، برو حنیف شریفءِ اوگام، واہ استاد ،واہ استاد۔ من نہ زانت چی بیگءَ انت ۔ ھمے استادءِ سرا من آئیءِ باز برءَ وش نہ بوتاں ۔ یار تو منءَ بس داد بگوش۔ بلے آئیءَ کے داریت۔ غنی پھوال ءِکاگدے گوں من ایر انت نبشتگ کنت کہ اے حنیف گوں من دارگ نہ بیت ، من اشکتگ کہ تو اشیءَ داشت کن ئے۔
حنیفءِ کہ بی ایم سی بند بوتگ ات کیچءِ بدلءَ گوادرءَ اتکگ ات۔ لبزانک ، شھزانتی ،تب زانتی بازیں سرھالانی سرءَ گپ بوتگ ات۔ اے دیواناں آصف ،امبر ، نزیر داود ، فرید فراق، دگہ بازیں سنگتے گون ات ۔یا ما نزیرداودءِ اوتاگءَ نشتیں ،یا گوادر کلبءَ ، یا ھوٹلءَ ،چاہ ءُ پُراٹاءِ موسم ءَما گپءَ اتیں ھم ،جنگءَ اتیں ھم، رمزان ات کہ شعبان حنیف گوں ما ھمراہ ات
من حنیفءِ دیمءَ چیر نہ اتاں ۔من وتی بازیں کسھے گوں آئی کتگ ات بلے آئیءَ دو گپ مدام گوشتگ ات یکے ھمے کہ تو اشک کت نہ کن ئے۔ ھمنچو تو وتی ھمریشیں مردمانی دیوانءَ زِرنگ ءُ تگڑائے ،اینچو جنکانی دیمءَ بوتین ئے بادشاہ بوتگ ات ئے۔ دومی ھمے کہ کوکار کت کن ئے بلے جنگ کت نہ کن ئے۔حنیف تہءَ چہ زئیپیں دلےءِ ھدابند انت۔
حنیف ءَ ہردیں آزمانکے نبشت داں منی گورءَ نہ ونت ئے پہ چاپءُ شنگءَ دیم ئے نہ داتگ ات۔ برے برے کہ مادور اتیں آئیءَ ٹیلی فونءِ سرا چہ شالءَ وتی آزمانک ونتگ ات۔اگاں من بگوشتیں انگت ایشیءِ سرا کمیں کار کنگی انت ، گڑا ناں نہ کتگ ات ئے۔ وت ھم زانتگ ات ئے، اے آئیءِ وتی مزنی ات کہ منءَ چہ سرءُ سوج اش گپتگ ات ۔
پدا باریں چے بوت۔ نیامءَ مزنیں مدتے گوست۔ یک روچے مارا ھالءَ گپت کہ حنیف شریف دزگیر کنگ بوتگ۔ماسنگت پریشان بوتیں۔غنی شریف اے موسمءَ چو تیرءَ اوشتاتگ ات۔ گوادرءَ ماشاعرءُ ندکاراں روانکے کشت۔ھمے دیوانءَ ناصر سہرابیءَ گوشتانک دات کہ بچارات مرچی کجام مردم ادءَ اوشتاتگ انت۔ اے کےءَ چو لاچار کتگ انت کہ ادءَ بیا انت۔منءُ انور صاحب خان داں پیشکانءَ شتیں اودءِ سنگتاں سرپدی دات کہ اے ردءَ گوں ما ھمراہ بہ بنت۔
منءُ حنیف شریف ءَ یک گپےءِ سرا باز گپ درجنی ( بحث )کتگ ات آھمیش ات کہ لبزانک باید انت آزاتیں درشانی یے بہ بیت کسےءَ گوشگ مہ بیت کہ چو نبشتگ بکن ، چو مکن۔آئیءِ درکپگءَ پد من ءُ آ ،حفیظ رؤفءَ لہڑی سجی ھاوس ءَ باز گپ جت ۔من گوشت حنیف ! اے راجءُ زمین منءَ ھم دوست انت بلے لبزانک باید لبزانک بہ بیت۔ آئیءَدگہ جوپہءُ کارےءِ ھاترا چلوپگیءَ گوشگ مہ بیت۔
حنیف وت ھم نوکیں لبزانک ، نوکیں شئیرءُ آزمانکءِ منّوگر ات بلکیں مئےدرائیں سنگت ھمے نوکیءِ موسم ءَواب گندگءَ ات انت۔
حنیف کہ دزگیریءَ پد یلہ بوتگ ات آئیءِ گوشگ ھمیش ات کہ مارا راجی جنزءَ پہ لبزانک نبیسگی انت۔ من اے گپءِمنّوک نہ اتاں من گوشتگ ات کہ لبزانک ءَ بل کہ وتی رنگءَ سما کنتءُ نبشتگ کنت۔
حنیف شریف آزمانک ءُ فکشنءِ مردم انت۔ آئیءِ تب ءُ ساچ ہمدئیگ انت،بلے جاوراں آئیءِ موسم مٹ کتگ۔ پدا کہ لڑات ءُ ڈنءَ شت۔ بازوھد گوزگءَ پد وٹس ایپءَ گوں آئی ءَگپءُ ھبر بوتگ ات۔
من گوشت مرچاں تئی بازیں گپءُ ھبرے شنگءُ تالان انت۔گندے ھمے موسمءَ من ھوار ببا ں ،من ءُ تو دیم پہ دیم بہ ببئیں گڑا گپ جنگ وش انت۔
انوں تو دیرئے، ءُ پدا ایوک ئے۔ ایوکیں مردم دلءِ تبءَ ھررنگءَ بہ لوٹیت گوازی کت کنت کہ دیمءَ کس نیست۔ برو آئیءِ ٹھک استاد ! من ترا بے ھیال کت نہ کناں۔ ً استاد تو چکّرے اینگو بیا ترا من میکس بئیر واریناں۔ من کندان ءَ گوشت پہ لنکہے بٹءَ سوئی دیر انت۔ اودءَ بیایاں پدا ترا گوں منی عکس شنگ بہ بنت منءَ ملکءَ کے کاریت۔
حنیف شریفءَ گوں منی کسہ باز انت۔ دگہ چہرانکےءَ آئیءَ گوں پدا دیوانے کناں۔ آ اینچکءَ واب بیت۔ نزانت داد مھلہ پاد اتکگءُ آئیءِ چہرانکءَ نویسگءَ انت۔
19 مارچ 2022۔