آزمانک: آسر
آزمانک: آسر
موکل (چھٹی)ءِ کاگد من ءَسر بوت گلءَ بال بوتاں۔پُرّیں پنچ سال اِنت ملک ءَ نَشُتگاں۔ بازیں پُرس ءُ سُوراں پشت کپتگاں۔
سہبءِ سہت نُہہءَ بالی گراب بالی پٹ ءَ ایر کپت ،من چہ بالی پٹ ءَ در اَتکاں زمین ءِ ہاک ءِ وشبوہ من ءَ ملار کنگءَ اَت۔ سروں دور دات سجدہ ءَ کہ یکّے ءَ چہ پُشتہ توار جت:
’’ لعل جان ! اولعل جان!”۔
پاداَتکاں چاراں منی کستریں برات دوستین اِنت ۔آئی ءَ من ءَ امبازاں زُرت ءُ گشتـ :
’’ خیر اِنت ،سجدہ ءَ کپتگئے ؟”۔
” اِے منی ءُ زمین ءِعشق ءِ جیڑہ اِنت ، تو باریں گاڑی یے آؤرتگ؟”۔
’’ ھئو گاڑی یے آؤرتگ ، براں گاڑی دیم ءَاُوشتاتگ”۔
ما گاڑی ءَ سوار بوتاں لوگ ءَ اَتکاں،سرجمیں روچ ءَ مردمانی روگ ءُ آھگ ءَ لوگ ءَ چہ در آھگ ءَ موہ نہ رَست ۔ شپ ءَ در کپتاں دْرستاں ساریءَ من دیم وتی دوستی ئیں سنگت باران ءِ لوگ ءَ کُت۔
باران ءَ چار سال بیت کہ سُورئِے کتگ ، ھمایے سور ئِے کتگ موبائل ءُ اِے دگہ آسراتیاں دُور بوتگ کہ مردم آئی ءِ حال ءَ بہ گیت۔
بارانءِ لوگ ءِ دپ ءَ سر بوھگ ءَ گوں دَر ٹُک اِت ،آئی ءِ مات ءَ دروازگ پچ کُت، سلام ءُ تیار جوڑی ءَ پد من باران لوٹ اِت۔
آئی ءَ گشت:’’باران انگت ءَ چہ کارءَ نہ یتکگ”۔
من اَبکہ بوتاں کہ آئی ءَ کدی بیگاہءِ شش ءَ آ دیم کار نہ کتگ ۔ سیٹھ ءَ مدام منّت کتگ کہ بجل کار بہ کن ترا گیشیں زَر دیاں ، آئی ءِ مدام پسو ھمے بوتگ”من پہ لاپ ءَ کارءَ نیاں ، زندگ بوھگ ءَ کارءَ آں”۔
بارانءِ مات ءَ باز منّت کُت، بیا لوگ ءَ بہ نند آ کیت، من عشاء ءِ نمازءِ نیمون ءَ در کپتاں۔باران ءِ لوگ ءِ دَمک انگت ءَ نہ گوازینتگ اَت، دیم ءَ چہ لاگریں مردے پیداک اَت ، آئی ءِ کوشانی زمین ءَ گسّگ ءِ توار منی گوشاں کرّ کنگ ءَ اَت۔نزّیک ءَ سر بوت ءُ گیمُرتگیں چم ئِے شانک دات اَنت منی نیمگ ءَ، رُوک رُوک ءَ چارگ ءَ لگ اِت۔من امارات ءَ چہ اَتکگیں مردم ،کیسگ پُر اِتاں چہ زَرّاں ، دوئیں کیسگ مُہر داشت اَنت ءُ وت ءَ چہ آئی ءِ نگاہاں دُور کنگ ءَ پاد تیز کت اَنت۔ منی گوشاں توارے اَتک:
’’لعل جان ! تو لعل جان نہ ئے؟”۔
من چَکّ جت چاراں ھمے لاگریں مرد من ءَ توار جنگ ءَ اِنت۔ من اُوشتاتاں ۔
’’ جی ھئو من لعل جاناں ،چیا خیر اِنت ؟”۔
’’ من ءَ دْرست نہ کنئے ؟من باران مراد تئی سنگت “۔
من تچانءَ آئی ءِ نزّیک ءَ اَتکاں ءُ گلائش کُت۔
’’اَڑئے باران تو چوش ئے ، تئی چمّ تہ ءَ شتگ اَنت ، ریش تو کدی زندگی ءَ نہ داشتگ، نوں ریشاں گوں تئی دیم گندگ نہ بیت، تو اَنچو لاگر ئے چارگ نہ بئے”۔
باران ءَ منی گپ کپّی کُت ءُ درائینت:
’’ بریں لوگ ءَ حال ءُ احوال کنیں”۔
لوگ ءَ شُتیں چاہ ءُ آپ ءَ پد من درائینت:
’’ حال کن چون اِنت ترا تو چو ملور ملورئے ءُ وت ءَ دنیا ءَ چہ سِستگ ءُ یکّر کتگ”۔
باران ءَ دْراجیں گینے کش اِت ءُ گشت ” لعل جان!من ءَ سُور ءَ سک چیر ترّینت،منی سُور بوھگ ءَ اَت گڑا دُور دُور ءَ چہ سیاد ءُ مردم اَتکاں ،آہاں گشت ” تو سور جنگ ءَ ئے ترا چینچو زَر ہَست؟”۔من گشت” لکھ کلدارءِ کمیٹی (بِستی)یے گپتگ، پنجاہ ہزار وام کتگ”۔آ ہاں گشت “اِے لکھ ءُ پنجاہ چے بنت ، دگہ لکھ ءُ پنجاہ وام بہ کن ، ترااگاں مردم عزت دِیگی اَنت “۔
من سیٹھ ءِ گْورءَ لکھ ءُ پنجاہ ہزار وام زُرت، سُورءَ سیاداں مدام گوشت ءُ بریانی وارت، ڈھول ءُ چاپ ءُ ناچ بوت۔
مرچی منی سورءَ چار سال بیت ،دو چُکّ ءِ پِتاں، من اَنگت ءَ گوشت ءِ جند نہ دیستگ، گوں ڈال ءُ آپِشک ءَ گُزران کنگ ءَ آں ،واماں دِیگ ءَ آں۔
اصغرلعلؔ