ماں عمان ءَ بلوچی زبان ءِ باندات۔ نبشتہ کار: بلاول بلوچ
ماں عمان ءَ بلوچی زبان ءِ باندات
بلاول بلوچ
یک جولائی 2019 ء عمان ءِ نامداریں روتاک ” ٹائمز آف عمان”ءَ یک حالے شنگ بوتگ ات کہ آ ھما زبانانی بابت ءَ ات کہ آھانی باندات ماں عمان ءَ تھار انت ءُ آھانی ھلاسی ءِ روچ آتکگ انت.
پہ منی واستہ درد سری ھبر ایش انت کہ بلوچی زبان عمان ءِ ھما زبانانی ردا اوشتوک انت کہ آ وتی گار بوگ ءِ سیمسراں سربوتگ.
ڈاکٹر سید الجہدامی سلطان قابوس یونیورسٹی ءِ اسسٹنٹ پروفیسر ءُ پولکارے کہ آ گشیت کہ بلوچی ءُ دگہ ھپت زبان کہ چہ عمان ھلاس بوگءَ انت بائدانت ھمے زبانانی گپ کنوک وتی جندئے ماتی زباناں بگواھیءَ میل انت۔آ یک ھنچیں جہدے بکن انت کہ آہانی جھداں چہ آھانی زبان بمان انت ءُ گار ءُ بیگواہ مہ بنت۔
بلے بژنی ھبر ایش انت کہ بلوچ راج ءَ سما نہ کتگ.
سکیں پدردیں گپ ے کہ یک در بلوچیں زانوگرے بلوچ ءَ توار کنگءَ انت کہ منی واجہ تو یک بے بہائیں زبانے واھند ے بلے تئی بے بہائیں شہدیں زبان ھلاس ءُ گار بوگءَ انت بلے بژن انت کہ عمان ءَ جاھمنندیں راج دوست ءُ زبان دوستانی ھواریءَ جاھمنندیں بلوچ راجءِ گوشاں مورے ھم نہ وارت.
من یک ھبرے نبشتہ کنگءَ آں چہ ایشیءَ بوت کنت منی عمانی سیاد ءُ سنگت دل رنج بہ بنت بلے یک گواچنی گپے ایش انت کہ عمانءَ جاھمنندیں بلوچ ءَ وتی راجدپتر شموشتگ ءُ نوکیں پدریچ نزانت کہ منی راجدپتر چی انت….
عمان ءِ بلوچ وتی ءُ عمانءِ میانجیءِ راجدپتری سیادیءَ چہ پھک نا آشنا انت۔
عمان ءَ جھمنندین ورناھمے سرپد بیت کہ پت ءُ پیروک لوگ ءَ واب بوتگ انت عمانی حاکم آتکگ انت کہ بیا منی واجہ تو لائقیں مرمءِ ئے ترا پاسپورٹ دیاں۔
بلوچ ءَ وتی یک بے بہائیں زبان ے ھست انت کہ آ چہ کوھنءُ ودیمیں زباناں یکے زانگ بیت۔
بلوچ راج یک جتائیں کلچر ءُ دودمان ءِ ئے واھند انت.
منی عمان ءِ ھما ورنا کہ در بلوچی پوشاک گورا کنگ پھر بندایت ءُ دری زبان ءَ گپ کنت ءُ ھمے ثابت کنگ ءِ کوشست ء کنت کہ من چہ مکران ءُ سیستان ءَ نیتکگاں من ھمدا عمان ءَ جاہ منندآں اے بس یک احساس کمتری ءِ کہ لاشعوری ءُ بـے سمائیءَ مارا چہ وتی راجدپتر ءُ زبان ءُ پوشاکءَ گستاھے کتگ.
منی ورناھیں براتاں من اے سرپدی دیگ لوٹاں کہ
عمان ءُ بلوچ میان ءَ یک کوھنیں راجدپتری سیادی یے ھست انت۔
آسیادی معاشی ءُ سیاسی کمک بنیادءَ چہ بندات بوتگ۔ عمان ءَ بحیثیت بلوچ ترا اے شرپ بکشاتگ ایشی یک تاریخی پشدر ے ھست انت۔
مرچی بلوچ بزگ انت لگتمال انت یک روچے ھست ات کہ بلوچ وتی سرڈگار واجہ ءُ کماش وت ات۔
ساحل ءُ معدنیاتانی کستر ءُ مستر وت ات۔
گڈا آ وھد عمان ءِ جاور چو مرچیگیں بلوچستانءِ دروشمءَ ات انت کہ آ بزگ ءُ وار ات انت گریبیءُ بزگیءَ آھاں مئے بلوچ حاکمانی کرا پناہ زرت ءُ چہ بدواھاں وتی جان رکھینت۔
عمان ورنا حاکم سید سعید بن احمد ءَ عمان ءِ زوراکجں باغی محمد بن سلیمان الیاروبی تنگ کت. عمان ءِ حاکم ءِ ھلاپ ءَ مزاحمت ءِ کتگ۔ آخرکار سید سعید بن احمد تنگ بیت ءُ دیم پہ بلوچانی ملک بلوچستان ءَ مدت ءُ کمک ءَ روت کہ بلوچ حاکم منا پناہ بدانت۔ بلوچانی حاکم 1783 گوادر ءَ عمانءِ حاکم ءَ دنت کہ تو ادا بنند ءُ اے تئی انت وتی لاپءِ آسءَ بتوسین ۔
بلوچ ءُ عمان سیادی نزدیکی چہ بلوچ کمک ءَ بندات بوگءَ انت۔۔
اے ھما دور بوتگ کہ علامہ اقبال پاکستانءِ واب ندیتگ۔۔
آ وھدی کہ بلوچ ءُ عمان ءِ سنگتی بندات بوتگ بلوچ یک وت واکیں ءُ آزاد یں زمین یے واجہہ بوتگ۔
اے ھما کمک و مدتانی سبب انت کہ عمانی عرباں بلوچ وتی برات لیک اتگ انت۔
ءُ پدا اے تاریخ توکءَ ایر انت کہ بلوچ ءِ کمک ءُ مدت ء َعمانءَ وتی بازیں کلات چہ باغیاں پچ گپتگ ءُ وتی دستءَ کتگ انت۔
بازیں وھدءَ داں مسقط کلات واجہ ءُ واھند درا بن جمعہ بلوچ ءُ سمائیل کلات واجہ اسماعیل بلوچ بوتگ۔
عمان ءِ دیمروئیءُ پھازگ ءَ بلوچ ءَ بازیں کرد بوتگ ءُ بازیں قربانی بلوچاں داتگ۔
مرچی اگاں عمان ءَ یک نام ءُ توارے مارا بلوچاں ھست، یک پجار ے ھست اے مارا چہ بلوچ ءُ بلوچی ءُ بلوچستان ءِ سوب ءَ رستگ۔
عرباں چہ پد گیشتریں آبادی بلوچانی انت کہ عمان آباد انت۔
بلے انگتہ بلوچی چہ عمانءَ گار ءُ بیگواہ بوگءَ انت۔
اے یک بژنی ھبرے پہ مئے بلوچاں.
بلوچی ء یل کنگ بزان کہ تو وتئی جندءَ بیگواہ کنگءَ ئے.
بلوچی وانگ ءُ ھبر کنگ ءُ بلوچی پوشاک سرا بائدانت کہ بلوچ پھر بہ بندایت ءُ وتی زبان دارگ واستہ بائدانت کہ عمان بلوچ تپاکیءَ گوں جھدے بکن انت تاکہ آھانی زبان ماں عمان ھِ بیگواھیں زبانانی لڑءَ ھوار مہ بیت.