دستونک: داں زدگ نالیں کپوتاں درد چُمبان اَنت تئی
دستونک ۔۔۔۔ مجید عاجز
داں زدگ نالیں کپوتاں درد چُمبان اَنت تئی
شپ خماریں دیدگاں انگار رُمبان اَنت تئی
کَشّ اِتگ ھوشام ھینّاریں بگندئے جیھراں
پہ ھلاھوشی کہ سر شوٝداں گُلُمبان اَنت تئی
ٹیٹلیں آھوگ زھریچکیں بھاراں کُشتگ اَنت
کہ بلوریں چمّگانی ارس کُمبان اَنت تئی
مان کاھنت ماں دل ءَ چو کہ دو شاہیں تیرکواں
سُوچّنیں کئی سوزماں ارواہ ءَ سُمبان اَنت تئی
داں زمیں جمبے اِشاں پہ کَترھے مھتل مہ کنت
سر نتابیں سر بتگ پدرنداں رُمبان اَنت تئی
بے انانی ءَ مہ چنڈین ئِے مبادا کہ پْرش اَنت
عاجز ءِ الماسیں ارس اَنت کہ چُلُمبان اَنت تئی