لہتے مردم ۔ منیر مومن ءِ لچّہ
لہتے مردم
گوں گماں یار بوتگیں مردم
پدّر اَنت گار بوتگیں مردم
مرچی چو جَنگلے ءَ بیوانک اَنت
شہر ءُ بازار بوتگیں مردم
یک ادایے ءَ بوتگ اَنت شیدا
باز شیوار بوتگیں مردم
پارسا بوتگنت پتوچنچو
تئی گُنہگار بوتگیں مردم
چیدگ اَنت بے گناہیں باندات ءِ
حوناں گُلنار بوتگیں مردم
***
ماہ ءُ استالاں چم پیشدار اَنت
گوں تئی زُلپاں گْوپتگیں مردم
کشکاں جلواہ ہزار گْرنچ ءَ اِنت
کپتگیں پُلّ ءُ سرپتگیں مردم
پہ توار ءَ تئی مہتل ءُ چاڑ اَنت
رپتگیں ءُ نہ رپتگیں مردم
***
جنتر ءَ وہد ءِ دُرشتگیں مردم
گیر کاینت شمُشتگیں مردم
زیمرے ءِ وڑا مئے ہمراہ اَنت
شئیرے ءِ رنگ ءَ گُشتگیں مردم
نوک نوکیں کرار بادین اَنت
شیشگیں وہد ءِ پُرشتگیں مردم
روچے روچے ترا اوں یات بیئنت
زندہ باتنت تئی کُشتگیں مردم
***
مرگ ءَ پد چُنت روچ زندگ بنت
بید ء داوا ءَ مُرتگیں مردم
کد بئیت اِنت ھتم اے ھنکیناں
کد بیائنت آ بُرتگیں مردم
مُرتگینانی یات وہدے کئیت
سک پشل بنت نہ مُرتگیں مردم
باریں پرچا منارا دوست نہ بنت
تئی زہیر ءِ نہ زُرتگیں مردم
***
منیر مومن