آزمانک” گوھر کیمتی“ منظور احمد “
“آزمانک” گوھر کیمتی ،، منظور احمد “
گوھر ءِ رنگ ءُ دانگ بہ بیت یا ڈیل ءُ بالاد، ٹہل ءُ داب بہ بنت یا گران ءُ سنگینی، ھر ڈول ءَ وتی مَٹّ وت ات-دُور ءُ نزیک ھر کسی دل پہ گوھر ءَ بند ات ءُ ھرکسی چمّ پہ گوھر ءَ سَکّ اتنت-ھرکسی دپ پہ گوھر ءَ آپ دیگ ءَ، ءُ ھرکسی دل پہ گوھر ءَ دْریکگ ءَ ات-
گوھر ءِ نصیب گوں شپانکے ءَ ھور ات- شپانک ءَ گوھر پہ دلے دوست ات-ھند ءُ دمگ ءِ لوفراں شپانک ءِ ریپینگ ءِ باز پندل ساز ات-شپانک ءِ چُکّاں آہانی پندل پمہت اَنت بلے لوفراں وتی شیطانی یلہ نہ دات- آہاں چارِت کہ گوھر پہ رَد دیگ دست ءَ نئیت-آہاں گوھر ءِ سر ءَ اُرش کت-گوھر ءُ شپانک ءِ چُکّانی سِلاہ تھنا مُکّی یے،ھرّگی کارچے ءُ تَپرے ات-پمیشکا گوھر ءِ ورنائیں چُکّ کُشگ بوت اَنت ءُ گوھر گوں شپانک ءُ وتی سر ءُ نیم سر ءُ شیرمچیں چُکّاں دزگیر کنگ بوت-لوفراں گوھر ءِ دزگیر کنگ ھچ گران نہ کپت-
گوں گوھر ءَ ایدگہ لوفراں ابید آہاں وتی چُکّانی میچینگ، رودینگ،شُشت ءُ شود ءُ وارینگ ءُ چارینگ ءِ بار ھم گوھر ءِ سر ءَ لڈّ ات-گوھر ءِ سر ءَ وتی شیرمچیں چکانی میچنگ ءُ سر ءُ نیم سریں چُکّانی پلگارگ ءِ بندش جنگ بوت-گوھر ءِ چُکّ تلوسگ ءَ ،ءُ گوھر لوفرانی چکاں رودینگ ءَ مجبور ات-بے کس ات، لوفرانی چُکّ آپ ءُ لاپ، شرّ شر، دپ پُر ء کندگ ءُ گوھر ءِ چکّ برہنگ ءُ شُد ءَ چنگ ءُ چہ بیماریاں چارگی نہ اتنت-
وھد گْوزان ات-گوھر ءِ ،شپانک ءِ ءُ آئی ءِ چُکّانی واستا مستریں چکاّس ھما وھد ءَ اتک کہ لوفراں گوھر ءِ اندام ءِ عکس کشی ءِ قیمت ءِ جار جت-چہ نیادی ءَ ھر یک مردے گوں وتی کیمرہ ءَ سر ات-ھریکے گوھر ءِ عکسانی قیمت گیش چہ گیش دیگ ءَ اوشتاتگ ات-
نوں گوھر نیادی ءَ ات-لوفراں آئی ءِ اندام ءِ عکس کشی ءَ پد آئی ءِ اعضاہانی دست جنگ ءِ عکس کشی ھم بنات-برے یکے ءِ بگل ءُ برے دومی ءِ بگل ءَ عکس نیادی ءَ اتنت-گوھر چو آسک ءِ وڑ ءَ تولگانی لاشْت ءِ دپ ءَ کپتگ ات- لوفراں گوھر ءِ اندام درائی ءِ قیمت چو گُرک ءِ دپ ءَ پس تاجگیں گوشت ءَ وش تر بوھگ ءَ ات-اے کاروبار پہ گوھر ءِ چُکّاں نگیگی یے ات- لھتیں چکاّں شُد ءِ نگیگی، لھتیں چکاں گوھر ءِ گوں دگراں عکسانی گندگ ءِ لھتیں چکاّں گوھر ءِ دزگیری ءُ بے کسیءِ نگیگی- لوفراں چکاّنی نگیگی مارِت-آہاں وتی چکانی ورگانی سرآروک آؤرت ءُ گوھر ءِ چکاّنی دیم ءَ ایرکت انت-گوھر ءِ لھتیں چکاّں سرآروکانی سرا اُرش کت، لھتیں ءِ دپ ءَ آپ دات بلے ودار اِش کت ءُ لھتیناں اے سرآروکان ءَ لگت جت ءُ پاد اتک انت-
گوھر ءِ ھما چُکّاں کہ سرآروکانی سرا اُرش کت،آہاں گشت : “مئے برات شومّ اَنت،ورگ ءِ وھد ءَ زھر کن انت-ایشاں چے دیستگ ، شُد ءَ چنگ اَنت بلے ورگ نہ ور اَنت-اگں ما وتی شپانکیں پت ءِ اُمیت ءَ بہ نندیں ما شُد ءَ مریں-،، آہاں لوفر” لالہ لالہ ءُ ابّا ابّا، ، گشت اَنت-
گوھر ءِ ھما شیرجتیں چک کہ آہانی دپ پہ لوفرانی سرآروکانی سرا آپ دیگ ءَ اتنت، آہاں وتی پاد آتکگیں براتان ءَ گشت” زرق ءِ لگت جنگ شر نہ انت، شمارا ورگی نہ انت، مہ ور ات بلے نہ ورگ ءِ دگہ بھانہ، دگہ راہ ءُ در ھم است-شمئے پادآہگ زاھری دژمنی ہے، زاھری دژمنی شر نہ انت-،، ایشاں چیروکائی لوفرانی کرّا سرآروک لوٹ ات- لوفراں سرآروک ءِ دیگ ءَ پیش وتی لھتیں شرط ایر کت-“شما وتی پت ءَ زھر بدئیت، وتی براتاں گوں ھچ سیادی مداراِت-شمارا ما گیشتر سرآروک دئیں، کمّو شُمئے کار ءَ نئیت-کمے صبر بکن ات-ھما روچ ءَ شما وتی شرط ءِ سرا ایراتک ات ما وتی قول ءِ سرا اوشتاتگیں-، ،گوھر ءِ اے چُکّاں ماں دل ءَ لوفر” لالہ لالہ ءُ ابّا ابّا کنگ بنا کت بلے دپ دوز داشت-
گوھر ءِ رنگ ءُ دانگ بہ بیت یا ڈیل ءُ بآلاد، اندام ءِ عکس بہ بنت یا گران ءُ سنگینی، گوھر وتی مٹ انگہ وت انت-دور یا نزیک ھرکسی دل پہ گوھر ءَ بند انت ءُ ھرکسی چم گوھر ءَ سَکّ اَنت ،ھرکسی دپ پرآئی ءَ آپ دنت ءُ ھرکسی دل پرآئی ءَ دْریکگ ءَ انت-گوھر ھر نیادی ءَ قیمتی انت-
ءُ گوھر ءِ چُکّ ؟…. لھتیں سرآروک ورگ ءَ انت،لھتیں گیشتر سرآروک ءَ دلمانگ انت بلے دپ ءَ دوز دارگ ءَ اَنت ءُ لھتیں ھما چُکّاں سرآروک لگت جتگ ءُ پاد آتکگ أنت ءُ زاھری دُژمنی زُرتگ،،
ماھتاک بلوچی اکتوبر 2011
٭٭٭٭٭٭
گوں طارق پشُکانی ءِ منتواری ءَ
٭٭٭٭٭٭
گوں طارق پشُکانی ءِ منتواری ءَ