سرگوست: آئی ءِ اولی دیدار۔نبشتہ کار: سکی ساوڑ۔شست ءُ نھمی بھر
سرگوست: آئی ءِ اولی دیدار
نبشتہ کار: سکی ساوڑ
شست ءُ نھمی بھر
نود من زین جان ءِ بارو ءَ ترا سرجمیں گپاں گوشان کن آں، کجام جاہ ءَ رَد بوت آں تو بہ گوش ملا اد ءَ تو رَد گوشگ ءَ ئے”.
من گوشت” تو یکبرے گپاں بہ گوش باریں”.
آئی ءَ ھرچ گپے زین جان ءِ بارو ءَ من ءَ گوشت آ درست راست اِت اَنت،ملا ءِ گپ یک ءُ ٹک اِت اَنت، من اے ھم جست کرتگ اَت کہ زین جان ءِ سَدیاری ءِ وجہ چے اِنت ءُ چوں ھلاس بیت؟ آئی ءَ ھمے گوشت” ایشی ءِ بس ھبرسندی بہ بیت سک شر بیت، دانکہ ھبرسندی ئِے نہ بوتگ اے کدی شر نہ بیت، یک گپے ترا گوش آں زین جان ءَ یلہ مہ دے، وتی نزر ءَ آئی ءِ سر ءَ ایر کن دانکہ آ بزانت کہ یک کنٹرول کنوکے من ءَ ھست، گڑا ھمے ترس ءَ کمو کنٹرول بیت بلے وتی آدت ءَ داں ھما وھد ءَ یلہ نہ کنت دانکہ ھبرسندی ئِے نہ بوتگ، منی سرجمیں گپاں نبشتہ بہ کن اگاں منی یک دروگے بوت گڑا پد ءَ من ءَ بہ گوش کہ ملا تو دروگ بستگ”.
من ءَ ملا ءِ درستیں گپانی سر ءَ باور بوت، من چاھے وارت ءُ چَہ ملا ءَ موکل کرت ءُ میتگ ءَ راھی بوت آں، سرجمیں راہ ءَ وتی ءُ زین جان ءِ زندمان ءِ سر ءَ جیڑان بوت آں، من ءَ زین جان ءِ سر ءَ زھر پیداک اَت ءُ وتی سر ءَ گریوگ، ملا ءِ ھمے گپ ءَ من ءَ گیش پروشتگ اَت کہ آئی ءَ ھمے گوشت زین جان داں ھما وھد ءَ شر نہ بیت کہ ھبرسندی ئِے نہ بوتگ، من گوشت اڑے نود تئی بھت ءَ مھر ءِ ھمسپر ءُ مھروان نیست، تو توری یکے ءَ را سجدہ بہ کن ئے آ ھم ترا دروہ اِیت یا تئی مھر ءِ دیمپان الم یک جیڑھے بیت ءُ تئی مھر آس ءُ انگرانی باھوٹ بنت.
سینکل چَہ بارگیں کِشک ءَ تچان اَت ءُ منی ارس شیپگران ات اَنت، منءَ ھمے روچ ءَ وتی سر ءَ سک بزگ پیداک اَت، گوں ارسیگیں چماں گس ءَ واتر بوت آں، دلشاد ساڑی نہ اَت کہ من آئی ءِ نیمگ ءَ بہ شتیں دانکہ کمو بہ سھڑ اِتیں،دومی روچ ءَ گل سبا ءِ مسکال آھت من واتر پون جت،زین جان ءِ توار گوشاں کپت، آئی ءَ گوشت” ھال کن جگر جوڑ ءُ وش ئے؟”
من پسہ دات” تئی مھرانی برورد اِنت انگت ساہ مان اِنت ،تو بہ دے ھالاں باریں چونیں مھر درآؤرتگ کہ گپ ءَ ئے؟”
آئی ءَ پسہ دات” من پہ وتی دوست زھیر کرتگ گوں آئی ءَ گپ کنگ لوٹ آں”.
من گوشت” گڑا گوں آئی ءَ گپ ءُ دیوان کن، من ھال دیگ ءِ چے زرورت اِنت؟”!
آئی ءَ کندگے جت ءُ پسہ دات” منی آ شریں دوست تو ئے پرتو زھیر کرتگ گنوک”.
من گوشت” نوں اے گنوک ءَ بے ھیال کن پرچاکہ نوں ھوش ء وت اِنت، رَد نہ کپ اِیت، پھل من یاریگری کرت نہ کن آن ءُ تو مھری مردمے نہ ئے کہ من گوں تو زند ءِ ھمسپری ءِ اومیتے بہ دار آں، اینچو سر ءُ سوج ءَ پد انگت تو وت ءَ شر کرت نہ کن ئے گڑا تئی شری کبر اِنت، تو اڑے اگاں وت ءَ کنٹرول نہ کرت شھر ءُ بازارنی تہ روزواہ نہ بوت ئے گڑا منی کبر ءَ لانت کن کہ نود تو دروگ بستگ ءُ مپت ءَ من ءَ بھتام جتگ ، اڑے یاد بہ کن پد ءَ تئی درستیں یار ترا راہ ءِ نیم ءَ دروہ اَنت ءُ ترا وتی نہ کن اَنت، آ بس وتی مکسد ءِ یار اَنت بلے ترا کَے سرپد کرت کنت، پرچاکہ تئی سرپدی دروگے”.
آ بے تواری ءَ منی گپانی گوشدارگ ءَ اَت، ھمے وھد ءَ آئی ءَ گوشت” دوست من نہ زان آں پرچا من رَدی کن آں، ھچ سما نہ بیت داں منی دست ءَ رَدی بیت، اے رَدی نہ زان آں پرچا گوں من ءَ بوت ھچ سما نہ بیت؟، بس اے رَندی من ءَ پھل کن من توبہ اِنت ءُ دست ءَ کران ءَ جن آں چد ءُ پد رَدی نہ کن آں، بس مروچی پھل کن “.
من کندگے جت ءُ گوشت” منی گپ ءَ دل ءَ میار بلے کھبگ کدی شر نہ بیت کربان آں”.
من وھدے چش گوشت بانک ءِ پون کٹ بوت،من دلشاد پونے جت ءُ گپ ءُ دیوان کرت، زین جان بارو ءَ گوشت کہ آئی ءَ پد ءَ رَدی یے کرتگ ، دلشاد ءَ کندگے جت ءُ گوشت” بابُل اد ءَ نان نیست، تو شاٹے جتگ ،انگت کہ آ شر نہ بیت گڑا وتی جان ءَ کَش دانکہ دگہ بنّامی یے مہ بیت،سوچ ئِے “.
من گوشت” دلشاد پل تو شر منی دیم سیاھی ءِ رَند ءَ کپتگ ئے، پیسر ءَ تو گوشت، بید ء شاٹ ءَ دگہ راہ نیست، شاٹ کہ بوت، نوں گوش ئے سوچ ئِے شر نہ بیت، تو ھما اکل مندیں مرد ءِ کسہ ءِ وڑ ءَ کنگ ءَ ئے، نوں من تئی یک گپے نہ زور آں، ھرچ پیسلھے کن آں وت کن آں جگر”.
آئی ءَ مزنیں کندگے جت ءُ گوشت” شر اِنت باریں تو پیسلھے بہ کن مارا تئی پیسلہ ودار اِنت واجہ”.
ما کمو مِڑ اِت ایں، پد ءَ پون کٹ کرت،بیگاہ ءِ وھد ءَ یکبرے پد ءَ گل سبا ءِ مسکال پد آھت من واتر پون جت، جوڑی ڈَڈی ءَ پد آئی ءَ گوشت” زین جان سک گریوگ ءُ گلگ دیگ ءَ اِنت نود ءَ پرچا من ءَ چش گوشتگ کھبگ کدی شر نہ بیت ، من زاناں انچیں مردمے آِں کہ آئی ءَ من اے وڑ گوشتگ”؟.
آ گپ ءَ اَت، من گوشت” اے وَ راستے، تئی ھیال ءَ زین جان کھبگے نہ اِنت؟”
آئی ءَ پسہ دات” ارررررر لالا تو چونیں گپ جنگ ءَ ئے؟! چش مہ گوش شر نہ اِنت، اے رَندی پھل ئِے بہ کن دگہ برے چش نہ کنت”.
من برانز گپت ءُ گوشت” انچوش سما بیت شما درست یک وڑیں کھبگ اِت بلے من چشیں بےگیرتے نہ آں، من ءَ گوں آئی ءَ مھرے بوتگ ءُ یک زندے گوازینگ لوٹ اِتگ، من پہ دگہ مکسدے ءَ مھر نہ کرتگ، من ترا گوں زین جان ءَ ھوار ستکگ، اگاں مروچی ءَ پد تو آئی ءِ سپارش کرت تئی ھیر نہ اِنت پون ءَ کٹ کن گرک بو”.
من سک بزانز گپتگ اَت، مجگ ھچ کار ءَ نہ ات چے بہ گوش آن ءُ چے مہ گوش آں؟! بانک ءَ ھچ نہ گوشت ءُ پون کٹ کرت، وھد جنزان اَت،شپ روچ بوان اِت اَنت ءُ روچ شپ، من روچ پہ روچ وت ءَ سھڑینان ات آں دانکہ آئی ءَ چَہ وتی مجگ ءَ بہ کَش آں، اندازگ دہ روچ ءَ پد دلشاد چَہ کراچی ءَ واتر آھت، من دلشاد ءِ نیمگ ءَ شت آں، آئی ءَ من ءَ دیست سک کند اِت ءُ گوشت” ھاں اڑے تئی پیسلہ چے بوت انگت گندگ بوگ ءَ نہ اِنت؟”
من ھم کندگے جت ءُ پسہ دات” پیسلہ زَر ءُ مالے نہ اِنت کہ من ترا پیش ئِے بہ دار آں، پیسلہ یک کدمے، من کدمے زرتگ ءُ زین جان یلہ کرتگ، منی پیسلہ ھمیش اِنت نوں سرپد بوت ئے؟”
آئی ءَ من ءَپنچے دات ءُ گوشت” تو اڑے نان ءِ شومے ئے کسم اِنت، زین جان کدی یلہ کنگی سامانے کہ تو یلہ کرتگ؟ شوم مہ بو بیا مروچی بانک ءِ نیمگ ءَ رو ایں، ماپی بہ لوٹ ءُ وشان بو، روزگار ءَ کدی پادمال مہ کن بلے تو چٹیں سرگّوے ئے واللہ”.
من گوشت” جگر من ءَ اے شومی کبول اِنت، دگہ ھال کن سپر چون بوتگ”؟
آئی ءَ پسہ دات” سپر وش بوتگ”
ما شریں وڑے ءَ گپ ءُ دیوان کرت، دلشاد ءَ من ءَ وشیں ھالے دات ءُ گوشت” نود من جنکے دیستگ ءُ ھبرسندی ءِ گپ برتگ، ان شاءاللہ منی کار بیت”.
من وھدے اے گپ اشکرت سک وش بوت آں، جنک ءِ بارو ءَ ھم جست کرت، مگرب ءِ وھد ءَ چَہ دلشاد ءَ موکل کرت ءُ گس ءَ آھت آں، وھد جنزان اَت، زین جان ءِ سر ءَ من مردم داشتگ اَت ، ھمے میان ءَ دو ماہ گوست ، دلشاد ءِ ھبرسبدی پکا بوت، منی گوں زین جان ءَ ھچ ھال ءُ اھوال نیست اَت ، ما پد گوں یکے دومی ءَ ڈیک نہ وارتگ اَت، من وت ءَ را باز کنٹرول کرتگ اَت، ھمے میان ءَ منی براس ءِ آروس ءِ تیاری بندات بوت، ما آروس ءِ تیاری ءَ اِت ایں کہ گل سبا ءِ مسکال آھت.
روان اِنت