زندگی درد ءِ ھمُک یات نبشتہ نہ کُتہ
زندگی درد ءِ ھمُک یات نبشتہ نہ کُتہ
من تنیگہ وتی پریات نبشتہ نہ کُتہ
اْوست ءُ اُمیت ءِ تلب نگرھیں سنج ءِ بیگاہ
چینچو دلکشّیں ترا گوں منی رنج ءِ بیگاہ
مھر ءِ ھوشام زدگ زرد ءِ بھاراں گوں ھلاس
کِشک مٹّاتگیں وابانی دیاراں گوں ھلاس
واھگ ءِ مھرمیں باندات نبشتہ نہ کُتہ
من تنیگہ وتی پریات نبشتہ نہ کُتہ
بِل دمانے کہ زھیرانی چراگاں پیچاں
شپ تلاہ گونگیں اِمروز ءِ اے داگاں پیچاں
مَرگ مونجائیں گم ءِ دیدگاں راہ ءَ کشّاں
زند ءِ ارواہ ءَ دو بر اَچ دل ءِ آہ ءَ کشّاں
نوبت ءَ ھر گم ءِ آیات نبشتہ نہ کُتہ
من تنیگہ وتی پریات نبشتہ نہ کُتہ
ھَو دل ءِ ھستی ءِ شوھازگ ءَ دزگٹاں اِد ءَ
موجریں نوبت ءِ پھازگ ءَ دزگٹاں اِد ءَ
انگتہ اُمر ءِ سپر جاری اِیں تو گون نَئے
چو منی داب ءَ تہا پُرشتگ ءُ تو ھون نَئے
پتّو زرد ءَ منی سوگات نبشتہ نہ کُتہ
من تنیگہ وتی پریات نبشتہ نہ کُتہ
چونیں جنگجاھے ءَ مارا گم ءِ دریا گون اِنت
وھد ءِ ریپینتگیں ارماناں پد ءَ ،، آ گون اِنت
ھاک ءِ شیداھاں شریفؔ جند ءِ تلب ندر کُت اَنت
ساہ ءُ سر ھستی ءِ چاراہ ءَ اَجب ندر کُت اَنت
شھر ءِ نیام ءَ پہ دل ءَ شات نبشتہ نہ کُتہ
من تنیگہ وتی پریات نبشتہ نہ کُتہ
شریف مومؔن