اتالو کلوینو (اٹالو کیلوینو) ءِ گِدارے کہ نہ دیستگیں شہرانی کسہ اِنت۔
اتالو کلوینو (اٹالو کیلوینو) ءِ گِدارے کہ نہ دیستگیں شہرانی کسہ اِنت۔
“italo Calvino”
نبشتہ کار: چندن ساچ
نبشتہ کار: چندن ساچ
اتالو کلوینو کہ باز ایشی ءِ نام ءَ ٹالو کیلوینو ھم نبشتہ کنت۔ 1923 ماں کیوبا ءَ پیدا بوتگ ءُ اٹلی ءِ شہر سان ریمو ءَ رستگ ءُ مزن بوتگ۔ 1987 ءَ بیران بیت۔
اتالو ءِ گِدارے دیر انت کہ دیم ءَ گْوَستگ ات۔ گومن وانگ نہ بوت۔ چہ بندات ءَ منی کار ھمیش بوتگ کہ منی زور جَنئگ ءَ ابید ھم، ھر کتابے ءَ کہ من ءَ نہ مَرّینتگ۔ یل داتگ۔ مروچی ھم انچش کناں۔
من وھدے اورحان پامُک ءِ کتاب نوکیں گِدار ءِ ازم کہ ونت آئی ءِ وانگ ءَ پد کتاب وانگ یک نوکیں عشقے ءَ سر کش اِت۔ اورحان ءِ ھمے کتاب ءَ اتالو کلوینو ءِ یک گِدارے ءِ نام ھم است اَت۔ آئی ءَ اِے ھم گوشتگ ات کہ اِے ھما کتاباں چہ یک کتابے کہ ایشی ءِ وانگ ءَ پد منی تُن وَد اِتگ۔
کتاب ءِ نام Invisible Cities ات۔ بل ایشی بزور آئی ءَ کہ ھپتگے پیش وھدے من وتی ناول ءُ آزمانکی کتاب کہ گِیشینت اَنت۔ گڑا ھما ناول کہ من پہ وانگ ءَ گستا کُت اَنت آیانی تہ ءَ ھمے گِدار ھم گون ات۔ اورحان پامُک ءِ کتاب ءِ وانگ ءَ پد سئیمی گِدار ھمیش ات کہ من دست ءَ کت۔
پمن اِے کتاب ءِ وانگ یک انچیں دنیایے ءِ سپر اَت کہ من برے برے واباں دیستگ یا تہنائی ءَ گوں وت جیڑ اِتگ کہ دنیا ءَ باریں چشیں شہر ءُ بازار ھم بوتگ؟
من ءَ بورخیس باز دوست بوتگ ءُ انگت دوست بیت۔ بورخیس ءِ ازم ءِ سر چمگ ءَ سر بُوّگ گران انت۔ بورخیس ءَ وان ئے گڑا مردم نوکیں دنیایانی، کوھنیں گیدی کسہانی، کوھنیں تاریخی کتابانی شوھاز ءَ در کپیت۔ بورخیس ءِ دوچار کپگ ھم پمن نوکیں سپرے ءِ بنگیج ات۔
اتالو کلوینو ءِ گدار ءِ وانگ ءَ پد دل ءَ اومان کت کہ ابن بطوطہ ءُ مارکو پولو ءِ سپرنامہاں یک رندے پدا بوان۔
اتالو کلوینو ءِ اِے کتاب نہ دیستگیں شہرانی کسہ انت۔ ھر شہر چہ دومی شہر ءَ پر لذتیں ندارگانی شہرے۔ ہر شہر ءِ وتی کسہے، وتی دود ءُ رھبند اَنت۔ وتی جلواھناکی ءُ زیبائی۔
اے گدار ءَ نامداریں بادشاہ قبلائی خان ءُ مارکو پولو گپ ءَ انت۔ مارکو پولو شہرانی کسہاں آران انت ءُ قبلائی خان گوش داران اِنت۔ یکیں کتاب ءَ تو چنچو شہر گندئے، چنچو دود ءُ ربیدگاں، چنچو پُر اسراریں رنگانی تہ ءَ گار بئے۔ چونیں تاھیرے بکشیت۔
گِدار چش ھم نبشتہ بیت۔ کسہ چش ھم آرگ بیت۔ اِے وڑ ءَ تو ھما وھد ءَ جیڑئے کہ تو اتالو کلوینو گدار ءَ وانگ ءَ بہ بئے۔
9 نومبر 2022