عطاشاد۔ نبشتہ کار: تنویرمِرزا
عطاشاد
نبشتہ کار: تنویرمِرزا
13 نومبر 1939 کیچ تُربَت تا 13 فروری 1997 شال
عطا شاد بلوچی شاعری ءِ سیمی دَورءِ مزنیں نامیں شاعرے زانگ بیت۔نوکیں شاعری ءَ نوکیں ھیال، نوکیں پکر، نوکیں مارشت ءُ جوزہانی دَر اَنگازی ءَ وتی مٹ وت بوتگ۔
وانگ ءُ زانگ:-
عطاشاد چہ کیچ اسکول تربت ءَ ہشتمی جماعت پاس کنت۔ دَہمی جماعت چہ پَنجْگُور اسکول پاس کنت۔انٹر ءُ بی۔اے چہ شال ءَ پاس کنت۔1964 ءَ چہ پنجاب یونیورسٹی ءَ ایم اے کنت۔
عطا شاد ءِ شاعری:-
شاعری ءِ بندات 1955چہ اردو زبان ءَ کنت۔پدا وتی ماتی زبان بلوچی ءَ شاعری کنت۔ عطا شاد ءَ وتی شاعری ءَ اَبرم جمالیاتی رنگ ءَ پَدّر کرتگ ءُ بلوچی شاعری ءَ اَگاں ڈَولداری ءُ جمالیات ءِ نام گرگ بہ بیت گڑاں عطا شاد ءِ نام اَلم گرگ بیت۔ عطاشاد ءَ وتی شاعری ءَ را ماھکان، مہنا، رولہ، سمین، کیف ءِ پیمیں ڈولداریں پوشاک گْورا داتگ، چوشکہ:
بْیا کہ استاراں جتگ پُل ماں شپ ءِ گیوار ءَ
ماھکان ءَ چو وتی آپء رواں شنگینتگ
کریم دَشْتی گُش اِیت کہ عطا شاد ءَ وتی شاعری ءَ چہ درہیں شاعراں گیشتر چہرگ(استعارہ) آورتگ۔عطا شاد کُل چہرگی شاعرے۔عطا شاد ءِ چوشیں دستونکے نیست کہ آئی ءِ تہ ءَ چہرگ نیاورتگ۔ بلوچی زبان ءِ مزن نامیں شاعر 13 فروری 1997 ماں شال ءَ بیران بوت۔
دستونک
مَک ءَ را مِسک مَہ گُش جَور ءَ آسمی نہ گُش اَنت
چراگ ءِ شپکدگ ءَ روچ ءِ حاکمی نہ گُش اَنت
کدی بَل اِیت منی آجوئی ءِ دل ءِ دریا
اے مَوج ءِ آھِری ءَ ماہ ءِ دَروری نہ گُش اَنت
دل ءَ دو بھر بہ کن آچش ایت ءُ داگ بہ دَنت
چوشیں طلب کُشیں اھد ءَ را چاکری نہ گُش اَنت
عطاؔ بِہ جزم کہ دنیا ءُ دین ءِ سوداگر
پکیر ءَ پیر گُش اَنت شاعر ءَ ولی نہ گُش اَنت
(تنویرمِرزا)