آزمانک دگءِ ابیلءَ ۔آزمانکار:عمرعثمان
آزمانک دگءِ ابیلءَ
آزمانکار:عمرعثمان
آزمانکار:عمرعثمان
برکتءُ شاکر کوچگےءَ جہمنند اتنت۔ہردوکانی بروت نوک سبزتگ اتنت،کساس دوئیِں عمرءَ ہم سند اتنت۔ پانزدہءُ شانزدہ سالی شکر ورنا قدءُ بالادءَ دراجءُ شتنگ،ہڈّءِ پتن چو دشتاری مچءَ زرنگ اتنت۔ہر دو نزیکیں میتگےءَ پوریاگری کنگا اتنت۔
برکت سہبءَ مدام پادانی مزن دگءِ راستیں پھناتءَ بوت،داں وتی سیٹھءِ دوکانءَ سربوت۔برکت مزن شہرءَ رمضان حجامءِ کرا کارءَ ات۔
شاکر مزن دگءِ چپّی پلوءَ بوت، داں وتی سیٹھءِ گوشتءِ دوکانءَ سر بوت۔ شاکر مزن شہرءَ سیٹھ مقصودءِ کرا کارءَ ات۔ دوئینانی نیامءَ مزن دگءِ شاہیگانی کساس پانزدہ گزاَت، بلے میتگءَ داں بازارءَ سر بوت انت،ایشاں یکے دومیءَ گوں ہچبر دانکے حبر نہ کت۔
برکتءَ شریں وہدءِ بوتگت کہ ملا رمضانءِ گورا حجامی ہیل برتگت، بلے آئیءَ ہچبر موہ نہ دات،کہ آ کسانیں چکےءِ میداں اوں ٹاپ بہ کنت۔یک روچءِ ناگتءَ برکتءِ دلءَ اتک۔
’’منا چنت وہد انت،ملاءِ کرا کار کنگا آں،بلے روچے روزگارے نہ گشیت، بزور شکءُ مگرازءَ تو نوں دستءُ پادے بہ جن۔ منا ملاءَ بس،دو بالٹی آپ،دوکانءِ چنڈگ،کرسیانی ساپ کنگ،مودانی کنڈءَ دور دئیگءَوتی بچک کتگ۔ سہبءُ بیگاہ رُپتءُ روپ بہ کنءُ لوگءَ نارشتانی سر کن۔ اے وڑا داں کد من آئیءِ کارءُ چلوپگءَ کناں۔‘‘ برکت ترا وڑے کنگی انت،آئیءَ وتی دلءِ تہا گشتءُ لنٹانی سرا شہدیں بچکندے تالان بوتءُ راستیں دستءَ چہ سرءِ کچینت۔
مزن دگءِ دومی پھناتءَ شاکر میتگءَ رؤکءُ آؤکیں موٹر سیکلاں سواریں مردماں سلام دیان، جاگہے دستءَ برز کنان، جاگہے برواناں سرینانءُ جاگہے پہ ٹھک مہلوکءَ راضی کنان ات۔ آئیءِ دلءَ ہم پہ وتی بانداتءَ پاہارے چست بوت۔
’’شاکر داں چنت روچءَ سیٹھ مقصودءِ مُرگانی گندءُ گسڑاں چست کنے،آئیءِ دوکانءِ ایوکا سنگءُ پارسنگاں چستءُ ایر کنے۔آ روچءَ نواز نئیت ترا مُرگے ہلار کنگ پرمائیت، سنگءُ شاہیمءَ تئی دستءَ دنت، بلے ہردیں نواز دوکانءَ بیت،ترّی ئیں بُزئےءِ اوں ترا ارزشتءَ نہ دنت۔‘‘
جیڑان جیڑانءَ دوئیں وتی دوکانانی گڑی نشانءَ سربوت انت، کہ چہ ادا ہردوکانی کشک گیشوار بیت، یکے دومیءَ دزچمی چارانتءُ پہ نگاہ رکست کن انتءُ وتی کارءِ سرا رؤ انت۔
وہد چو مارءَ پوست لگوشان ات،برکتءُ شاکر دگءِ اے کشءُ آ کشءَ مدامی ہمک سہب درورے گھڑیالءَ وہدءِ سرا گندگ بوتگ(انچش اعجاز ٹھیکدار ہپتگے پنچ روچ تربتءَ قضا نہ کنت) ہردو ورنا مزن دگءِ چارو پاسو اتنت۔
یک روچءِ برکتءَ حیال کت۔’’داں کد ملاءِ دوکانءِ روپوکءُ نارشتانی گروک بئے،جاگہے چار کلدار بدلءُ باندات کن،وتی کوچگءَ جتائیں دوکانءِ پچ کن،حجامءِ دوکانءَ چے۔۔۔۔؟ یک مزنیں ،،، اناں راستی۔۔۔ کم از کم دو مزنیں آدینک،یک دو شکءُ مگراز،شیونگ فورم،اچھا اچھا راستی کلر کہ مرچاں کمائی ہمدا انت،درائیں ورناہاں وتارا لگوشتگ کہ یکے گشیت، ریشاں سہر کن،یکے گشیت،موداں ڈولدار کن،،، اڈے ملا تو کمو ناکامءَ منا ہمے کلرےءِ وا زراں بدئے،،،منی بلّے روچے دیما رؤت،ملا پورا قصاب ات، ہروچ منی پوستءَ جنت،من گشے شاکرءِ کارچءِ دپءَ اوں نیکہ آئیءِ مگرازے دپءَ،،،ہاہاہاہا‘‘ برکت مرچی تو شر سیٹھ ئے بڑّءَ کپتگے،کمے دلءَ حجالت بوت۔’’ہئو ڈے برکت،ہرچیزے کہ دوکانءَ کارمرز بیت،ایشاں نوں وا تو شر شیوارے،پدا یک دو ماہءَ رند عئید اوں پیداک انت۔ہمتءِ مرداں مددءِ خدا،مپتءَ وتی دل بگاہ کتگ، مرچی وتی گپءَ الم ایر کناں۔‘‘ برکت دلءَ مثلء پلءَ سرپت کہ آ وتی دوکانءِ پچ کنگا ملاءَ چہ ازن گیپت۔
مزن دگءِ دومی پھناتءَ شاکر اوں دلءَ گمانءَ ات۔’’اے پیما سیٹھ مقصود منا سرجمیں زندگی یلہ نہ دنت، من بس آئیءِ سنگءُ پارسنگانی شودوک، مُرگانی پٹءُ گسڑانی کورءَ ریچوک بہ باںءُ گورے روزان داریءَ شپءُ روچاں تیلانک بہ دیاں،پریشیءَ منی لنگری ہچبر ہلاس نہ بیتءُ من دائم ہمے دابے زند بہ گوازیناں۔‘‘ شاکر کلہے مہتل بوتءُ دگءِ دومی نیمگا برکتءِ چارت کہ آ بے سما کشکءَ گواز کنان ات۔شاکر چہ سماءِ دنیاءَ درنیاتکءُ یک برے پدا گوں وتا ترانءَ بوت۔
’’چش کن شاکر تو وتی میتگءَ ازگارےءِ کرا کمو زر وامءُ بدل بہ کن،،،، منی حیالءَ وامءُ بدلءِ ماتءُ پت تنیگہ نہ مرتگ انتءُ تو غریبی گنجائشءَ دستءُ پاد ہم جنئگا ات،چیزوکی الم رسیت۔۔۔ اڈے شاکر زراں چے کنے،،، مرگی دوکان باز انت،براہوی آں مارکیٹ گند اوں کتگ،،، گڑا شاکر کنے چے؟؟؟‘‘
آئیءَ دست کش ئے کیسگءُ برتءُ جپتیں تسبیح کش اتءُ گوں گلءَ درائینت ئے
’’شاکر جان! تو ہچ مکن، قصابی بہ کن۔۔۔ہاہاہاہا۔۔۔بس یک جوانیں کارچ ئے،الکاپیں ڈکّی یے،دگہ چے۔۔۔ سنگءُ شاہیمءَ آن محمدءِ پچگر۔۔۔ چوناہا مروچاں آئیءِ چکاں دوکان مالء ہُلّ کتگ،پدا واجہ دلءَ ہم حرابیں مردمے نہ انت،اگاں نہ منّیت،گڑا گشین ئیں کدی گوشتءِ زورگءَ کائے ترا ہڈءُ کنٹگ ئے زیادہ دیاں،،، اووووں،،، شاکر جان بروبرے۔‘‘
برکتءُ شاکر حیالی دنیاءَ سفر کنان، داں وتی مدامی گیشواری چیدگءَ سر بوت انت۔ برکتءَ وتی دیم چپّی نیمگاءُ شاکرءَ راستیں نیمگا ترینت،کہ اشتاپی یکے دومیءَ وتی نیمگا دلگوش بہ کنت،ہردوکاں اشتاپی وتی دیماناں ترینت،کہ یکے دومیءِ ابیلءَ کایاں،دوئیں مزن دگءِ نیامجیءَ سر بوت انت،کلوزرے چہ تیلی جیریکناں چکار،،، ہردوکانی پھناتءَ سک بوت۔برکت چو پادی بالءَ گواتءَ گون ندیمءِ درزیءِ دوکانءِ دیما آریا بوتءُ شاکر چو درتگیں کانگڑوءَ گواتءِ دستءَ لئیب کنان،اللہ بخش ماہیگیءِ کاپرءِ دیما سپٹوکی جنئگا ات۔ادارےءَ مہلوک مچ بوت،دوئینانی گوش بُناں حون درآہگا ات،ہردوکانی لنٹانی سرا باوستانی وشبو آتار اتنتءُ پُرمہریں بچکند تالان اتنت،،، بلے ارواح دور کلوزرءِ ٹیرانی دنزءُ دھوتانی تہا وتی چیدگاں شوہاز اتنت۔