لچّہ: ھُداوند ۔ شائر: نئیم مومن .
لچّہ: ھُداوند
شائر: نئیم مومن .
او زید ءِ وش گْوشیں شانتل
بُبو تو کاسدے پہ من
برو کمو تو آزمان ءَ
بچار ساھتے ھُداوند ءَ
کُجانگو باریں دزگٹ اِنت
کُجام وشی ءَ دلگوش اِنت
نہ اِشکُن گریوگاں مئیگاں
نہ گندیت رتکگیں ھوناں
نہ ماریت مارا انسانے
ما بیوس ایں
ما پُرسیگ ایں
بگْوش کمو دلگوش کن
اد ءَ مئے مات زاراں اَنت
گْوھارانی سریگ کپتگ
برات مئے سانکلاں بند اَنت
چنچو زھگ چورہ اِنت
چنچو جن جنوزام اِنت
ھمک روچ جون ءِ سوگاتے
کپیت ماں جنگل ءُ کَوراں
تو راہ داتگ ھُداوندے
یزیدی لشکرے پہ ما
کُشیت مئے پُلگدیں بچّاں
زید ءِ وش گْوشیں شانتل
بدے ھالاں ھُداوند ءَ
بگْوش کمو نوں دلگوش کن
ھُداوند ھالکیں رھمان