لبزانک و نبیسوک …. ارشاد عالم
لبزانک و نبیسوک …. ارشاد عالم
ھنچو گشنت کہ نبشتہ کار ماروک و پہموکیں مردم بنت دل ئے مارشت و تورشتاں براھداریں لبزانی دروشم ھا کماہنت و وانوکاں سر کن انت ھمک مردمے مارگ و جزبگ الما ایدگہ مردمانی مارشتاں گوں وڈے ناں وڈے ڈیک ورنت شاعرے کہ شعرے پربندیت وتی مارشت و تورشتاں درنگاز کنت الما ھمے رنگیں گوشداروک۔ وانوک الما بیت کہ ھمے رنگیں مارشت و تورشتاں دوچار کپتگ پمیشکا ھر کس الما لہتیں شاعر ئے شاعری ھا دوست داریت یا کہ آزمانک و ناولاں دوست داریت کہ رنگے ناں ناں رنگے ھا آئئ ئے تب ھا سیل انت۔
ھما شعر یا آزمانک و ناول کہ آئ ءِ تہا وشی ۔ تاھیر۔ زانشت مہ بیت آ ساچشت تاں دیراں وتا زندگ داشت کت نہ کنت۔ لبزانک سک نازرک انت۔ ڈولداری لوٹیت۔ ھورت چاری لوٹیت۔ نبیسوک پمیشکا ماروک انت کہ چپ و چاگردا آئ ءِ نگاہ سک انت اگاں مہلوکے چم دو انت نبیسوکے چم چار انت ھرچی گندیت ماریت۔ وتی تہئ و اندری مارشتاں وھدے براھداریں لبزانی پوشاک گورا دنت گڈا الما وانوکانی ھلکہے پہ وتاجوڈ کنت۔
ھما نبیسوک کہ آئ ءَ وانوک ھست الما ایدگہ پدریچ اوں چہ ھمائئ ھا اسر و سان زورنت و نبشتہ کن انت چوش اوں بیت کہ چہ ھمائئ ھا کہ سان و اسر زورگ بوتگ رندی نبیسوک شرتریں نبیسوکے بہ بیت چوش کہ میر گل خان نصیر بلوچی ئے نوکیں دورے بنداتی شاعرے زانگ بیت بلے آئئ ئے شاعری ئے تہا ڈولداری ھنچک نیست چوش کہ آئئ ئے رندگیری کنوکیں و سان زوروکیں شاعر جی آر ملا و بشیر بیدار ئے شاعری ھا ڈولداری و نازرکی گندگ بیت اے دوہیں شاعرانی شاعری چہ میر گل خان ئے شاعری ھا گیشتر توانا و دل ھا ایر کپوک انت و اے جوازت ھا دارنت کہ آوکیں-پدریچانی تہا اوں زندگ دارگے توان ھا دارنت چونائئ ھا لبزانک ھما انت کہ وتارا ھر دورا زندگ بداریت ھر دورا نوک بہ بیت ھر دور ھا کسے کہ وانیت اش آئئ ھا وشی و تاھیرے بدنت۔ زانت و زانشتے بدنت۔ وانوک ھا جیڑگ ۔ سما کنگ و پگرے بہ پرماھیت۔