کہ گہیں سراں نہ برْاھیت رگانی ٹنگرینگ۔ نبشتہ کار: ڈاکٹر رحیم مِہر
کہ گہیں سراں نہ برْاھیت رگانی ٹنگرینگ
نبشتہ کار: ڈاکٹر رحیم مِہر
نبشتہ کار: ڈاکٹر رحیم مِہر
واجہ بشیر بیدار وتی نبشتانکےءَ سید ھاشمی ءِ بیرانی ءَ پد ماں کراچی ءَ بلوچ وانندہ گل (۱۹۷۹) ءِ برجمینتگیں دیوانےءِ سرشون ءَ نبشتگ کہ دیوانءِ گڈ سرا ھما زمانگءِ گل ءِ سروک ءَ (رازق بگٹی ) سید ھاشمیءِ بابتءَ ھمے گوشتگ کہ آئیءَ آشوبی شاعری نہ کرتگ بلکیں بانوری شاعری کرتگ۔اے یک لس تاثرے کہ سری زمانگءِ سیاسی ءُ ھما لبزانکی مردمانی گورا است بوتگ کہ وڑے نا وڑےءَ کجام ھم سیاسی ءُ لبزانکی لیکہ ءَ گوں بندوک بوتگ انت ۔سید ھاشمی چوشکہ سیاسی ءُ لبزانکی لیکہاں بندوگیں کارستے نہ بوتگ، آئی ءَ وتی ازم درشانی لیکہی بنیات ءَ نہ کرتگ پمشکہ گوں لیکہاں بندوگیں مردمانی گورا آئی ءِ قدر ءُ بستار آ نہ بوتگ کہ لیکہاں بندوگیں کارستانی بوتگ ۔ اے درگتءَ استاد صبا دشتیاری وتی کتاب ’’ ساچان ءُ سہاتو ’’ ءِ پیش لبزءَ ھمے رنگیں رویہہ آنی بابتءَ یک واکہہ یے کوٹ کنانءَ نبشتگ کہ من وہدے نوک ماں شال ءِ شھدربرجاہ ءَ اتکگاں تہ بلوچی ءِ یک نودربرے منی گورا اتکگ ءُ من آئرا پہ وانگ ءَ سید ھاشمی ءِ شعری دپترے داتگ، وہدے اے نودربر گوں کتابءَ وتی بھرگ ءَ شتگ تہ ھما زمانگءِ نامی ئیں استادےءَ سید ءِ کتاب کہ دیستگ تہ چہ بچکءِ دست ءَ چامپتگ ءُ چگل دیان ءَ گوشتگ :خبردار کہ اے مردءَ بہ وان ات کہ اے مردءَ بلوچی لگانڈو کرتگ ءُ جِنّاتی زبانءَ شعر گوش ایت۔ گوشگ ءِ مراد ایش انت کہ گوں سید ھاشمی ءَ داں زمانگے ھمے رنگیں رویہ ءُ کینگی یے است بوتگ آئی ءِ سوب ھمیش بوتگ کہ سید گوں رواجیں سیاسی ءُ لبزانکی لیکہاں وتا ءُ وتی ازم ءَ دور داشتگ ۔
گوستگیں روچاں حفیظ بلوچ ءِ داتگیں پوسٹ کہ واجہ صدیق آزات ءِ نگدی ھیال ءِ بنیات ءِ سرا ات ، ھم ھمے کُنّت ءُ کست درشانی ءَ ابید دگہ ھچے نہ ات ۔پرچیکہ صدیق آزات ءِ نگدی ھیال یک اسٹیٹمنٹے ءَ ابید دگہ ھچ بسات ءُ بستارے نہ دارایت ۔ دومی حفیظ بلوچ ءِ اے گپ کہ سید ھاشمی ءِ گورا راجی درد ءُ تورشتانی درشانی رنگ نیست ، ھم سپا رد انت ۔ راست انت کہ سید ھاشمی بلوچ راجی سیاست ءِ عملی بہر نہ بوتگ بلئے آئی ءِ شعری درشان ءَ سرجمیں بلوچ راجی ءُ ربیدگی ءُ لس بلوچ ءِ زند ءِ جھگیری کاملیں رنگے ءَ کرتگ۔ اے درگت ءَ استاد صبا دشتیاری ءِ نبشتانک ’’سید ھاشمی ءِ قومی شاعری ’’ استاد عابد آسکانی ءِ ’’ سید ھاشمی ءِ آشوبی شاعری ’’ وانگ کرز انت ۔ زیکیں سیاست ءُ لیکہی بنیات ءَ لبزانک ساچگ ءُ ترپلیں ءُ جزباتی رنگےءَ شعر گوشگ ءِ دنز ءُ آڈھور انچو کہ جہل کپان انت تہ سید ھاشمی ءِ شاعری ءُ آئی ءِ فکر ھمنچو پدرا ءُ روشنا بوھان انت ۔ راستی ایش انت کہ سید ھاشمی ءِ شعر گوشگ ءِ ازم ءُ آئی ءِ ایندگہ لبزانکی کتہ کاری دنیگہ سرجم ءُ برجمیں رنگے ءَ پد جنگ نہ بوتگ انت ۔ ھمنچو وھد گوزان کنت ، دنز کپان بنت تہ سید ھاشمی ءِ ازم ءُ ھنر گیش روشنا بیان وتی پدرائیں رنگءَ دیما کیت ۔
جور ءُ مارجین اِت پہ گُلیں دوستاں
پہ دپاں جوریں کوپڑا پا اِت