دستونک
مبارک قاضی
ماہءِماھیکانیءَ سنگرے کنگ لوٹ آں
شپچرانی شپدرنگءَ بندرے کنگ لوٹ آں

مرگ بلے برحق انت یک برے قضائے کئیت
زندمانءِ بنداتءَ آسرے کنگ لوٹ آں

بلئے باگ و بلبل نیست بلے نیست صوت و سوز
من اے کوہ و گیاباناں کھچرے کنگ لوٹ آں

آپ چمءِ ایمان انت آپ تاسءِ ارجان انت
آچ ءِ بے وفائیءَ انگرے کنگ لوٹ آں

ھؤ درشگ ببنت بلکیں زندگی ءِ نقص و نپ
من وتی دلءِ کھتاں جنترے کنگ لوٹ آں

بلکیں دل مسافر بیت یک دمے بہ ساساریت
زندءِ جنگ جاہ ءَ من رھسرے کنگ لوٹ آں