لچّہ: جیڑ اِتہ من۔ لچّہ کار: منیر مومن
لچّہ: جیڑ اِتہ من
لچّہ کار: منیر مومن
جیڑ اِتہ من
کہ جتائیءَ تئی شھرے بہ کناں
ھلکءُ ھنکین ٹہ نت
کِشکءُ دگ, منزل ءُ بازار ءُ ندارہ
پدا مردم کاینت
مردمے کئیت تہ نیمون ہزاراں کاریت
سُتکگیں حاجت ءُ دمبرتگیں گِلّہ شنگ اَنت
پیرزالے کہ وتی کْوھنیں گُشانءِ لمبءَ
دُرسیں امروز ءِ گَماں گْرنچ بدنت
یک شِپانکےءِ رمگ گار بہ بیت
راجی داو یے بہ بیت
سر رچیت ھون ماں شیپانی تہ ءَ
چار گامءِ سرءَ سنگر لوٹنت
اسپر ءُ زھم ءُ کَماں، تیر ءُ کٹار
روک بیت آس
پدا آسِن ءُ شورہ شِنگ اَنت
اجگیں کاڑے کہ وداریگیں نگاہانی وتی
کنجلیں زھیراں بہ نندیت ءُ اِدا آپ بکنت
جاھے شَوکار ءُ مُگیمانی طلب چول جننت
جاگھے گُژنگیں زھگانی ابیتکیں دیدگ
چو کہ بے نوریں چراگاں ٹِمبنت
اے وڑیں شھرےءَ پتّو من چتور ایوک باں
ھَو اگاں
من تئی جتائیءَ سُروزے بکناں
بس منی دستءَ بہ بیت
پمّنءَ زھیروک بہ جنت
بِلّے زھیروک چو گِدانےءِ وڑءَ ساھگ بنت
لبز پیژگاہ بنت
پیژگاہءَ یک دْرچکے سبزیت
دْرچکءِ چیرءَا مُدام جِنگُل وتی رازاں ریچنت
راز پیژگاہءَ چہ درکاینت
دگہ میتگے گوناپ دینت
میتگءَ میتگے پِر بیت ءُ پدا شھرے ٹہ ایت
جیڑ اِتہ من
کہ جتائیءَ تئی شھرے بہ کناں