دستونک
مولم چراگ
آپ ءَ سازاں بالادے ءُ تُنّیگی ءَ گْواز کن آں
درستاں پیسر پولاں ترا رندءَ وتءَ شوھاز کن آں

وھد ءِ پُراں ھاکاں دْرنزاں سبزی دشت ءِ زھیرونکے
قطرہ قطرہ مومے باں ءُ آس ءَ را امباز کن آں

مئے رنگ محبت یکّینیں بیا چمّاں واباں مانداریں
نُوں روچ ءِ نِیلّیں بْرانزانی دل تاموری ءَ ساز کن آں

تو ٹھلیں گودی باگانی من کوھانی شَھزادہ آں
عشق ءَ سرجم ایربَراں تئی وشبوہ ءَ دْرنگاز کن آں

اوست گُبارے مانپوشگ بیت سِتک چراگے بالین ئِے
پورہ پورہ نیام ءَ چے من دریا یے مِگراز کن آں

ٹپّ وتن آدینک دل ءِ درد ءِ کُمارے بےمٹّیں
مولم بْرمشاں آگاھی ءِ قبرستاں آواز کن آں