سرگوست: آئی ءِ اولی دیدار،نبشتہ کار: سکی ساوڑ،پنجاہ ءُ ششمی بھر
سرگوست: آئی ءِ اولی دیدار
نبشتہ کار: سکی ساوڑ
پنجاہ ءُ ششمی بھر
من بے سمائی آوانی نیمگ ءَ رھادگ اِت آں، منی سر ءِ ھوش شتگ اَت، من گل سبا ءِ کر ءَ سر بوت آں بلے آئی ءَ را ھچ نمانگار اِت دیم پہ زین جان ءُ آئی ءِ سنگت ءِ نیمگ ءَ شت آں، یک ءُ دو پیش ءِ پُشت ءَ چار اِت انت داں گِندگ بوگ ءَ نہ اِت اَنت ھمے وھد ءَ من توار جت ءُ لھتیں زاہ/ دژمان دات ، کوکار کرت ءُ گوشت” نوں تو وت ءَ را کجا چیر داتگ؟”.
ھمے وھد ءَ تچگانی توار منی گوشاں کپت اَنت کہ بچک ءِ یک گامے اد ءَ ءُ دومی گام ماں شش کدم( فٹ) ءَ دور کپان اِت اَنت، دیم پہ کور ءَ جھل ءَ، من بچک درست کرت بلے من نہ زانتگ اَت کہ ساھل ھمے بچک ءِ نام اِنت ، من توار جت ءُ گوشت” بدار پاداں تو دارگ نہ بہ ئے، من ڈارک زین جان ءِ کر ءَ شت آں داں آ پیش ءِ بُن ءَ نشتگ اَت ءُ وتی چم ئِے اندیم کرتگ اِت اَنت، من سر بوت آن ءُ گوشت” ھاں اڑے کھبگ تو نہ گوشت کہ ساھل منی براس اِنت ءُ پد ءَ تو اینچو سوگند ھم وارت، اے انگت بھانگ ءُ بھتام اَنت؟”
ھمے وھد ءَ آئی ءَ گریوگ بنا کرت ءُ گوشت” من ءَ مروچی ءَ پد توبہ اِنت من چشیں رَدی نہ کن آں”.
ھمے وھد ءَ منی شیتان ھراب بوت، من زِراب اِت آئی ءَ لگتے داں اد ءَ چست بوت ءُ اود ءَ چَگَل گپت، گوں دومی لگت ءَ پیش ءِ تہ ءَ لاش بوت، ھمے وھد ءَ گل سبا ھم سر بوت، زین جان ھم گریوگ ءَ لگ اِت، گل سبا ءَ گوشت” لالا اے پہ جَنَگ شر نہ بیت، سوچ ئِے، ھمے وھد ءَ من آئی ءَ دست ءَ گپت ءُ چست کرت، من گوشت” کھبگی چون اِنت؟”
آئی ءَ گوں گلوتگے ءَ پسہ دات” من ءَ توبہ اِنت”.
گوں توبہ کنگ ءَ ھوار منی شھمات ھم رَس اِت آ یکبرے پد ءَ پیش ءِ باھوٹ بوت ءُ گوشت ئِے” اللہ من مُرت آں”.
من گوشت” تو پہ مِرگ شر ئے”.
من آئی ءِ پندول پَٹ اِت ءُ موبائل در کرت، ھمد ءَ آئی ءِ تامرے جوڑ کرت ءُ گوشت” مروچی ءَ پد ناں من تئی دوست آن ءُ ناں تئی یار آں، اگاں تو نوں یک رَدی یے کرت گڑا پد ءَ تو زان ئے من چے کن آں؟ کج اِنت تئی یار؟ تو اد ءَ لٹ ورگ ءَ ئے ءُ آ وتی پادانی باھوٹ اِنت، اگاں آئی ءَ را گوں تو مھر بوتیں گڑا چش نہ تھتگ اَت، تو انگت وتی نازاکیں بالاد ءَ ایشانی امبازاں دے ئے، ترا لج نہ کنت روچے یکے تئی بالاد ءَ بہ چُک ءُ بہ روت؟ روچے یکے تئی رنگ ءَ سجدہ بہ کنت ءُ وتی تُنّ ءَ بہ پروش اِیت؟ تو وش ئے میتگ پہ میتگ تئی یارانی کسہ بہ بیت کہ پلانی ءِ سد یار اَنت؟ تو وش ئے گل سبا ءِ وڑ ءَ یکے تئی نام ءَ بہ بیت؟ تو وش ئے تئی کھول ءِ مردم دیوانانی تہ ءَ نشت مہ کن اَنت؟ تو وش ئے کَسے گوں ترا آروس مہ کنت ءُ ھمے بہ گوش اِیت ” اے کھبگے”؟ تو وش ئے وتی دزگھارانی تہ ءَ روزواہ بہ بہ ئے؟ زاناں ترا وپت ءُ وابی ءِ انچش شوک اِنت کہ وتی ازت ءِ سما نیست؟ ھمے وھد ءَ یکبرے پد ءَ من آئی ءَ را دست ءَ گپت ءُ پاد کرت، آ سک لرزگ ءُ ھیسکارگ ءَ اَت، من گوشت” من ءَ گوں تو مھر بوتگ، من گوں تو یک زندے گوازینگ ءَ دلمانگ بوتگ آں پرچاکہ مھر وپت ءُ وابی ءِ نامے نہ اِنت پمیشکا من ترا پھریزاِتگ اگاں باندا روچ تو منی مہ بہ ئے، تئی آروس گوں دگہ یکے ءَ بہ بیت گڑا آ ترا اے گپ ءَ گوشت مہ کنت تو پیسر ءَ یکے ءِ امبازانی باھوٹ بوتگ ئے بلے ترا بس پہ وپت ءُ وابی ءَ ابید ھچ سُد نیست، من نہ لوٹ اِتگ کہ منی وجہ ءَ تئی زند زوال بہ بیت ، اگاں تئی واھگ ءُ لوٹ وپت ءُ وابی اِنت گڑا بیا تئی واھگ ءَ مروچی سرجم کن آں”.
ھمے وھد ءَ منی دست ماں آئی ءِ بالاد ءَ کپت، داں آئی ءِ ھیسکارگانی توار بُرز بوت اَنت، من گوشت”ھاں نوں تو ھیسکارگ ءَ بس نہ کن ئے؟”
گل سبا ءِ ارس ھم گندگ بوت اَنت آئی ءَ گوشت” لالا اگاں زین جان ءَ ازتے ءُ ھوشے بیت مروچی ءَ پد بس اِنت ئِے، اگاں وتی ازت ءِ سُد ئِے مہ بیت گڑا کدی پہ گوشگ ءُ لَٹ شر نہ بیت”.
ھمے وھد ءَ یکبرے پد ءَ منی شھمات ماں آئی ءِ درپشوکیں چھرگ ءِ باھوٹ بوت، آ یکبرے پد ءَ زمین ءِ باھوٹ بوت، من گوشت “مروچی ءَ پد منی ءُ تئی مھر ھلاس اِنت، من ءَ تئی وڑیں سدیاری ئیں جنک ءِ درکار نہ اِنت”.
من چَہ آوانی کر ءَ رھادگ بوت آں، کور ءَ بال ءَ آھت آں، یک جاھے ءَ نشت آں چش مہ بیت زین جان ءِ یار واتر گند ءُ نندے ءَ بئیت، من ودار کرت بلے آ نیاتک، زین جان ءُ گل سبا واتر میتگ ءَ شت اَنت، من سینکل ءَ سوار بوت آں،دلشاد ءَ پونے جت ءُ جست کرت” تو کجا ئے؟”
آئی ءَ پسہ دات” من وتی مشین ءَ آں، تو بہ دے ھالاں تئی شکار چون بوت”.
من برانز گپت ءُ گوشت” من سُھتگ شکار، من تئی کر ءَ پیداک آں”.
منی بی پی سک بُرز اَت، سر سک درد ءَ اَت،سرجمیں راہ ءَ ارس ریچان ءُ روان اِت آں داں دلشاد ءِ مشین ءَ سر بوت آں، سینکل من زوت جیک جت، دلشاد منی دیم ءَ پاد آھت من سلام ءُ دروتی نہ ات آں ڈارک تچک بوت آں، دلشاد ءَ من ءَ دیست سک پریشان بوت ءُ جست ئِے کرت” اڑے نود تو سک دگہ وڑ ئے ھیر اِنت؟
من گوشت” تو اڑے من ءَ بل گپ مہ کن کہ ھچگی نہ آں”.
آ بزگ پریشان اَت کہ نود ءَ را چے اِنت، آئی ءَ پد ءَ من ءَ جست کرت، منی شیتان ھراب اَت ، من راست بوت آں زراب اِت دلشاد ءَ شھماتے، بلے دلشاد بزگ ءَ دگہ ھچ نہ گوشت، بس ھمے گوشت ئِے” کھبگی آ کنت شھمات من ور آں، ھمے وھد ءَ آئی ءَ من ءَ گلاسے آپ دات، من دو گلاس آپ وارت ءُ تچک بوت آں، اندازگ دہ دمان ءِ کچ ءَ بے توار بوت آں، بلے چمانی ارس یلہ اِت اَنت، ھمے وھد ءَ دلشاد ءِ ماس ءَ چاہ آؤرت اَنت، دلشاد ءَ گوشت” اڑے برباد پاد ءَ چاہ بہ ور”.
من وتی ارس پھک کرت اَنت ءُ چاہ ورگ بنا کرت، من گوشت ” تو اڑے چاہ نہ ور ئے”.
آئی ءَ گوشت” من ءَ شھمات وارتگ ءُ برابر آں ، تو بہ ور”.
من گوشت” تو چاہ ءَ بہ ور، شھمات ءِ ھیر اِنت”.
آئی ءَ گوشت” مسکرا کن آں من چاہ وارتگ”.
من اندازگ شش ءُ ھپت کوپ چاہ وارت، نیم ساھتے ءَ پد کمو ھوش کرت، من کندگے جت ،دلشاد امباز کرت ءُ گوشت” اڑے پھل کن من بے اوپار بوتگ آں ترا شھماتے جتگ”.
آئی ءَ گوشت”پرواہ نیست پل، تئی شھمات من ءَ نہ تور اِیت، تو بس وت ءَ پریشان مہ کن، نود نوں ھالاں بہ دے جیڑہ چون بوتگ کہ تئی بی پی برز اِنت”؟
من سرجمیں کسہ آئی ءِ دیم ءَ آؤرت اَنت، آئی ءَ گوشت” نود من ترا پیسر ءَ ھم گوشت، اد ءَ مھر نیست، بس وتی کار ءَ شر کن ءُ بیا بلے تو گوشت مھر پلگاری یے، نوں بہ گوش مھر پلگاریے یا سِلکاری یے؟ بابا اد ءَ مھر نیست، اگاں مھرے ھست گڑا آ مھر زمین ءُ زمین زادگانی اِنت بلے بنی آدم ءَ دیری مھر زندگ ءَ زندگ زمین ءِ دلبند ءَ کل کرتگ پمیشکا مروچی مھر زمین ءِ امبازانی باھوٹ اِنت اگاں کَسے ءَ مھر ءِ درکار اِنت گڑا گوں زمین ءَ مھر بہ کنت،تو انگت وت ءَ را پہ سدیاری ئیں جنکاں برباد کرتگ ءُ کنگ ءَ ئے؟ منی گپ ءَ زور ئے مروچی ءَ پد زین جان ءَ سوچ ءُ مھر ءِ نام ءَ مہ گر گھتر اِنت”.
من گوشت” تو اڑے راست گوش ئے بلے اے دل انگت سرپد نہ بیت جھندم اِنت”.
آئی ءَ گوشت” دل ءَ سرپد کن”.
من گوشت” تو اے گپ ءَ سوچ، بیا نوں مارا ھمے زین جان ءِ یار ساھل گندگی اِنت”.
آئی ءَ جست کرت” چوں شوھاز ئِے کن ایں”.
من زین جان والیں موبائل در کرت ءُ گوشت” آئی ءِ داتگیں موبائل ایش اِنت، لمبر ئِے مان اِنت، بیا پون ئِے کن ایں”.
من چَہ وتی موبائل ءَ پون جت، آئی ءَ پون چست کرت، من گوشت” من ءَ پرتو کارے ھست بلے پون ءَ کٹ مہ کن ، من آئی ءِ ءُ زین جان ءِکسہ کرت اَنت ءُ گوشت” تو کجا ئے من ءَ تئی کر ءَ آیگی اِنت” ؟
آئی ءَ گوشت” اے درست دروگ اَنت من ءَ دو روچ بیت من مشکے آھتگ آں”.
من وھدے برانز گپت گڑا آئی ءَ پون کٹ کرت.
روان اِنت
Comment
Send