(پَٹّ ءُ پول! مشکت ءِ شعر ءُ مُلا پازُل )پولکار :اسحاق رحیم پلیری
(پَٹّ ءُ پول! مشکت ءِ شعر ءُ مُلا پازُل )
” پولکار :اسحاق رحیم پلیری،،
بلوچی کلاسیکی شاعری ءَ اگن ما گوں ھیرتی ءَ بہ چاریں تہ مئے راجدپتر ءِ گیشتر مڈی ھمے شعرانی تھا مارا دست کپ انت- بلے دومی نیمگا اگن ماوتی راجدپتر نویس ءُ پٹ ءُ پولکارانی کتہ کاری ءَ بہ چاریں تہ آھاں اے نیمگا ھاسیں دلگوشے نہ داتگ ءُ نہ مرچیگیں راجدپتر نویس ءُ پٹ ءُ پولکار اے نیمگا دلگوش گْور کنگا اَنت نئیکہ ھمے پہلوان ءُ گشندہ اہمیت دیگ بوتگ انت کہ چہ کرناں اے راجدپتر ءِ مڈّی آھاں پہازان ءَ آورتگ ءُ مارا سر کرتگ انت بلے اگن اے پہلوان ءُ وشگوش مہ بوتیناں تہ مئے راجدپتر ءِ یک مزنیں بھرے بیگواھی ءِ مجاں اندیم بوتگ ات البتہ اے ردءَ لھتیں سال انت کہ واجہ فقیر شاد گوں دلستکی ءُ ھید ریچی ءَ یک مزنیں جہد ءُ کوشستے کنگاانت کہ من واجہ ءِ اے جہدءَ ساڑاھان ءُ واجہ فقیر شاد ءَ بلوچی زبان ءِ یک مزنیں ھستی یے سرپد باں کہ آئی ءَ بلوچ راج ءِ یک مزنیں ھزانگے چتگ ءُ نزارتگ انت ءُ کتابی دروشم ءَ دیم ءَ آورتگ اَنت-
منی اےنبشتانک یک شعرے ءِ باورا انت کہ واجہ بشیر احمد بلوچ ءِ شوھازاتگیں مُلا پازل ءِ شعرانی دپتر ,, شپ چراگ،، ءُ واجہ فقیر شاد ءِ پٹ ءُ پولی ملا پازُل ءِ شعرانی دپتر ,,درپپشوکیں سھیل،، ءِ تھا ملا پازُل ءِ نام ءَ ھوار انت کہ درپشوکیں سھیل ءِ تھا اے شعر ءَ “مشکت ءِ شعر، نام دیگ بوتگ بلے اے شعر دوئیں کتابانی تھا یک وڑءَچاپ کنگ بوتگ کہ چہ اے گپ ءَ ھمےزانگ بیت کہ اے شعر چوناھا بشیر احمد بلوچ ءِ شوھازکرتگ ءُ فقیر شاد ءَ چہ “شپ چراگ، ءَ زرتگ پرچاکہ اے شعر شپ چراگ ءِ تھا ناسرجم انت ءُ ھمے پیم درپشوکیں سھیل ءِ تھا ھم گوں ناسرجمی ءَ چاپگ بوتگ کہ اےردءَ واجہ فقیر شاد ءِ ھچ وڑیں پٹ ءُ پولے پہ اےشعر ءَ گندگ ءَ نئیت اگن فقیر ءَ اے شعر شوھاز بہ کرتیں تہ بہ گندئے دوئیں کتابانی تھا شعر ءَ دگری ءِ گندگ ءَ اتکگ ات-,, شپ چراگ،، ءُ درپشوکیں سھیل، دوئیں کتابانی تھا اےشعر کل 46 گال انت کہ ناسرجمیں رنگ ءَ چاپ کنگ بوتگ منی پٹ ءُ پول ءِ رد ءَ اےشعر ءِ کسّہ چوش انت کہ اے شعر ءِ تھا چہ تمپ ءَ یک گراناز نامیں جنینے مُرگے قاصد کنگ ءُ مشکت ءَ دیم دیگ ءَ انت- گراناز آ وھدءَ کسان ات کہ مرد ءَ سانگ کرت ءُ مرد مشکت ءَ بھرتی بوت دیر گوست بلےمرد نہ یتک گڑا گراناز ءَ دلءِ دارگ ءَ دم برت ءُ ھمےشعر پربست ءُ دیم دات شعرءِ تھا مرد ءِ جواب ھم است بلے من چو زانت نہ کناں کہ اےشعر پربندوک کئے انت البتہ من دوئیں شعراں وانوکانی دیم ءَ کاراں دانکہ وانوک وت بہ چار اَنت کہ اے شعر پازُل ئیگ انت یا ناں؟ “شپ چراگ، ءُ “درپشوکیں سھیل، ءِ تھا اےشعر 46 گال انت بلےمن ءَ اےشعر 79 گال دست کپتگ شپ چراگ ءُ درپشوکیں سھیل ءِ تھا چاپ بوتگیں شعر :
جی سواری دانش وریں طوطی
برجءزھران ءِ وش گُشیں طوطی
سُنٹ تئی لال ءُ چم دوئیں موتی
گم زدیں پیگاماں بہ بر دْروتی
قضبہ ءَ داں خابورہ ءِ شھر ءَ
عارباں قمری باز مدئے مھر ءَ
آپ کن چہ گلزاریں سویق باغیں
جوزکیں سمبوک ناستگاں شاگیں
یک شپے آرام اِت مُسّنا اِنت
بو سعیدانی ھند ءُ جاگاہ انت
مائل انت پرتوکوٹ غریب ترزیں
پرکا ءِ ماڑی ءُ حصار بُرزیں
پر کھیب نکشیں بانزُلاں شنگیں
صیف ماں دیمءَانت بھشت رنگیں
روی گلزار انت چوکہ بوستان انت
لائک عشق ءُ سئیل ءُ دوستان انت
لانچ کن چہ امبویں بنند جاہ ءَ
ایر کپ ماں جنت انوریں راہ ءَ
پر گْوزاں بے چہ آسمی چاہ ءَ
در مگوریں کاڑانی مراگاہ ءَ
پر عقاب سُھریں دیدگاں ایر آر
پیداکیں گنجیں مطرح ءِ بازار
مطرح جاگاہ اِنت ھتّلیانی
حلحل ءُ زرّیں منگلیانی
نی چد ءُ دیم ءَ انت کوٹ سپاھانی
مشکت ءِ وشّیں زید ستاھانی
زیارت کن سلطانیں سعید ءَ را
عادل ءُ لھڑ بکشیں سخی ءَ را
جزماں کہ نکشیں جوزکے پْروش ایت
ادلس ءُ شاران ترا پوش ایت
او کپوت سبزیں مُرگ سخن سنجیں
راہ تئی دریا ءِ زر انت لُنجیں
میل کن چو سھب ءِ رُستگیں نود ءَ
ایر کپ ماں گنجیں گوادر ءِ زید ءَ
بمبئیں دوست ءَ را سلام سر کن
ھلوتاں زاریں چہ دل ءَ در کن
مارا مجنون ءِ عشق ءِ درور کن
ماھتاک سچکان 2012
٭٭٭
گوں طارق پِشُّکانی ءِ منتواری ءَ
٭٭٭
گوں طارق پِشُّکانی ءِ منتواری ءَ