بلوچیءَ ردانکءِ دیمروئی نہ کنگءِسوب

نبشتہ کار : مومن مزار

بلوچی زبان بلکہ ہزراں سال کوھنیں زبانے ما جھانءَ زانگءُپچارگ بیت۔

بلے اے زبانءِ نبشتھی عمر سک کسان انت۔

باز ایشیءِ نبشتھی عمرءَ ھبدھمی کرنءُباز ھژدھمی کرن گُشیت بلیں اگاں اے ردءَ چارگ بہ بیت گڑا مارا بلوچی زبانءِ نبشھہی عمر یکشلہ گندگءَ کیت آئیءَ را مرچی ھپتاد سال بیت بزاں 1950ء زمانگءَ بندات ئےگُشگ بیت۔

بلے اے عمر پہ بلوچیءِ وڑیں شاھیگانیںءُ کوھین زبانےءَ سک کسانیں عمرے زانگ بیت۔

نون ھمے کسانیں عمرءَ ماں بلوچیءِ ردانکی لبزانکءِ بابتءَ اداگپءُ تران کنین کہ ھپتاد سالءِ اے سپرءَ بلوچیءَ شعری لبزانکءَ انچو دیمروئی کرتگ بہ نسبتءِ ردانکی لبزانکءَ ءُ بلوچیءَ ردانکی لبزانکءَ پرچہ انچو دیمروئی نہ کرتگ؟

بلوچی ردانکی لبزانکءِ دیمروئی نہ کنگءِبازیں سوب بوت کنت تہ آیانی تھا چندے ایش انت۔

مئے تب ردانکی نہ انت:

یک سوبے ردانکءِ دیمروئی نہ کنگءِ ایش انت کہ مئے تب ردانکی نہ انت۔

بزاں ردانک انگتءَ بلوچءِ تبءَ نہ کپتگءُشاعری گیشتر تبءَ کپتگ۔

ذلفقار علی زلفی گُشیت کہ۔۔۔

“ھرچ ماھتاکءُتاکبندءَچست کن لچہ کارسدءِتھانودانت۔۔۔پداشونکارءَھم بچارگءَ وتی تاک بھا کنگی انت لچہ کارءَ جاھ مہ دنت تاکءَکس چست نہ کنت۔۔۔۔۔۔۔”

بزاں بلوچیءَردانکءِپدمنتگی یکے ھمیش انت کہ تاکءُماھتاکانی واھند چہ ردانکءَگیش شاعری چھاپ کن اَنت پہ وتئی تاکانی کشگءُبھا کنگءِ واستہ۔

ھمے درگتءَ دوبارگ ذلفقارعلی زلفیءِ گپاں دلگوش بکن اِت۔۔۔

“عبدالواحد بندیگءَ بگر داں جمیل امامءَ،عومرکیّاءَبگر داں منیر مومنءَھرچ شونکارءَجست گر کہ تئی تاکءَ لچہ کار پرچا گیشترانت،اگاں رو ریا مہ کنت جواب ئے ھمے بیت”واجہ وانوک لچہ کارانت۔”

ادا ھمے زانگ بوت کہ یکےمئے تب شاعریءِ نیمگءَ گیش انتءُ دومی گپ ایش انت پہ زور محلوکءِ تبءَ شاعریءِ نیمگءَ آرگءِ جہدے بوھگءَ انت ۔بلکہ اےجہد پہ بلوچی شاعریءَسیت مند انت بلیں سرجمیءَ بچارئے گڑا پہ بلوچی زبانءَ تاوان انت پرچکہ ردانک نہ بیت گڑا زبان سرجمیں لبزانکےءِواھند بوت نہ کنت۔

بلوچیءَشریں ردانکءِنہ بوھگ:

بازیں مردمانی ھیالءَ بلوچیءَ ردانکءِدیمروئی نہ کنگءِ یک سَوبے ایش انت کہ بلوچیءَ شریں ردانک ساچگ بوھگءَ نہ انت۔

منی ھیالءَ چوش نہ پرچکہ تئی زبانءِ نبشتہی عمر انچو نہ انت کہ ترا شریں ساچشت انچو زوتءَ بدنت کہ وانوک دلمانگ انت۔

پہ بلوچیءِ وڑیں زبانےءَ اول اے چیز المی انت کہ آئیءِ دامنءَ ھرچ وڑیں ساچشت ودی بہ بیت پرچکہ کوانٹیٹی   بیت کہ کوالیٹی بیت۔

مثالءِ ھبرءَ بلوچیءَ ھرچ وڑیں چیزے ردانک ساچگ بوتگ بلیں آیانی تھا پرچا حنیف شریف،ناگمانءُاے آر داد وانگ بوھگءَ اَنت یاکہ منیر بادینیءِ انچو ناولانی تھا بھشتءُدوزہ،شالءِگُلیں بازارءُ بانور پرچا دوست کنگءُوانگ بوھگءَ انت بزاں اول تئی زبانءَرا ردانکی مواد پکار انت دیمترءَشریں چیز وت دیمءَ کاینت۔

ردانک وھد گیشتر لوٹیت:

لبزانکءِتھا ابید چہ شاعریءَ باقی درست ردانکی لبزانک گُشگ بیت۔ردانکءِبازیں تھرءُبَھر انتءُ ھر تھرءِ وتئی وتئی لوٹءُ گزر بنت پمشکہ ردانک باز وھد لوٹیت آ وانگءِ وھد بہ بیت یاکہ نبشتہ کنگءِ۔

ھمے گپءَ اے آر داد ھم جاھےءَ چوش گُشیت۔۔۔

“بلوچیءَ ردانکءِ دیمروئی نہ کنگءِ سوب ایش انت کہ ردانک وھد باز لوٹیت۔

ھمے واستہ مردم شاعریءِ نیمگءَ رونت کہ ھودا زوت نامدار بنت چیاکہ شاعری انچو وھد نہ لوٹیت”

اے راستے بلوچیءَ ردانکءِ دیمروئی نہ کنگءِ یک سوبے ھمیش انت کہ ردانک باز وھد لوٹیت بلیں لبزانکءِتھا دوھیں زانشت وھد لوٹ اَنتءُدوھینانی ارزشت منی ھیالءَ یک وڑ انت۔

ردانکءِ مردمانی واستہ چیرگیجےءِنہ بوھگ:

بلوچیءَ ردانکءِ دیمروئی نہ کنگءِ یک مستریں سوبے زانگ بیت تہ منی ھیالءَ آ ایش انت کہ بلوچیءَ ردانکءِ مردمانی واستہ چیرگیجءُپتر تنیدی تالان کنگ نہ بوتگ، آ گوشدارگءُ آیانی ساچشتانی بابتءَ گپءُ تران نہ بوتگ۔

چوشکہ بلوچیءَ پہ شاعرانی گوشدارگ ،ساڑاھگءُآیانی ساچشتانی سرا گپءُ باوست ھمروچ بوھگءَ انت بلے پہ ردانکءِ نبشتہ کاراں چوشیں روچےءَ تنیدی بلوچیءَ ٹک نہ داتگ۔

پہ درور شاعریءَ مبارک قاضیءُ منیر مومن یاکہ ایندگہ شاعرانی واستہ ھر ماہءَ یک پچیں دیوانے اڈ دئیگ بیت بلے پہ منیر بادینیءَ یک روچےءَ چوشیں دیوانے جمینگ نہ بیت کہ آئیءِ ساچشت چون انت۔

بائد انت  ازمی بابتءَ آئی ساچشت چارگءُتپاسگ بہ بنت بزاں شر انت یاکہ ھراب بلیں گپءُترانے وَ بندات بہ بیت بلوچیءَ پہ ردانکءِ دیمروئیءَ۔

پرچکہ زبانےءَرا آئی ردانکی لبزانک انچو دیمءَ بارت شاعری انچو دیمءَ بارت نہ کنت پدا اے بلوچی زبانءِ وش بھتی انت کہ ایوکءَ منیر بادینی ءَ کساس سدءَ چہ گیش ایوکءَ ناول داتگ ایندگہ آئیءِ ردانکی مواد بئے نہ انت۔

آسر:

بلوچیءَردانکءِ دیمروئی نہ کنگءِ بازیں سوب اَنتءُادا چیزے ھمےسوبانی سرا گپءُتران بوت۔

بلوچیءَ ردانکی لبزانک ءِ اگاں دیمءَ برگءِ جوانیں راھبندءُ کشکے زانگ بیت۔ تہ منی ھیالءَ آ پہ ردانکءِ مردمانی واستہ چیرگیجےءِ تالاں کنگ المی انت۔ گڑا ھمے ساچءِ سوبءَ آھانی ساچشتانی سرا گپءُ باوست بوت کنتءُدیمترءَشریں نبشتہ کار ھم بلوچیءَپہ ردانکءَودی بیت۔

پدءَ اے نیمگءَ بلوچءِ تب ھم آھان بیت ءُ بلوچی زبان ھمے کسانیں سپرءَ زوت وتارا دیمءَ شُتگیں زبانانی سرپءَ ھوار کت کنت۔