استاد عبدالمجید گوادری ءِ سیمی سالروچ
استاد عبدالمجید گوادری ۔ نبشتہ کار: علی عیسیٰ

استاد عبدالمجید ءَ ۱۹۳۷ ءَ گنجیں گوادر ءَ یک ھانوادہیں لوگے ءَ وتی چم پچ کتگ انت آئی ءِ پت ءِ نام حاجی ناگمان انت چہ بن ءُُ بھہ ءَ باھو دشتیاری نندوک بوتگ انت واجہ ءِ پیرک ءَ چہ باھو دشتیاری ءَ لڈ ءُُ لوگ کتگ ۔
اے کٹمدان ءِم ردم مروچاں گوادر کلاچ کراچی ءَ جاھمنند انت ۔چیزے سال آئی ءَ کراچی ءَ ونتگ ءُُ دینیات ءِ استاد مولوی خیر محمد ندوی بوتگ ،وھدے لوگ ءِ ذمہ داریانی بوگ ءُُ روزگاری ءِ پریشانیانی سبب ءَ آئی ءَ درانڈھی ءَ بے وس بوت داں اے وھد ءَ آ مزن ھور ءَ انت بلئے کار ءُُ ھزمت ئِے انگت وانینگ انت ۔
ستاد عبدالمجید ءِ زانت ءُُ سما ءَ گوادر ءِ ھما وانندئیں رژنا پگریں ورناھانی نند ءُُ پادا ءَ ردوم زرتگ کہ آیاں چہ نواب یوسف علی مگسی ءُُ عبدالعزیر کرد ءُُ سنگتانی چست کتگیں راجی زرمشت ءَ اسر زرتگ ،ھمے ورناھاں ۱۹۴۶ ءَ گوادر ءَ انجمن اصلاح بلوچان جوڑکت ءُُ ھمے انجمن ءِ بارہ ءِ نامداریں ندکا رواجہ گنگو فیسکی نبشتہ کنت کہ ’’ بیستمی کرن ءِ میانجی ءَ اولی بر ءَ بلوچستان ءَ رژناپگریں بلوچانی انجمن جوڑ کنگ بیت انت۔
ایشانی تہ ءَ چہ درستاں مستریں انجمن اصلاح بلوچان انت کہ سید ھاشمی ءَ جوڑ کتگ ۔ استاد عبدالمجید ھمے رژنا پگریں چاگرد ءِ پیداوار انت آئی ءِ دل ءَ راجی لھڑ ءُُ باھند زاھر انت کہ ھمے زرمشت ءَ ودی بوتگ انت آئی ءِ شائری کدی بنگیج کتگ زانگ نہ بیت البت من ءَ ھمنچک یات انت کہ ۱۹۶۲ ءِ زمانگ ءَ آئیِ وتی مستریں بچ محمد انور ءِ ھوری ءَ کھدہ انور جماعت ءُُ من ءَ ابید چہ چہ اسکول ءِ وھد ءَ بیگاہ ءَ وتی لوگ ءَ وانینتگ ات آ وھدی آئی ءِ گور ءِؒ شئیرانی یک سرجمیں دپترے ھست ات اے دپتر ءِ شئیرانی تہ ءَ یک شئیرے نورز کان ءُُ آئی ءِ ھمراھیں ھپت کنگریں شھیدانی نام ءَ ات اپسوز کہ اے دپتر ءِ ھمرائی ءَ اے شئیر اوں ھم زوال بوتگ انت ۔
آئی ءِ نام پرشتگیں راجی سوت چکیں بلوچانی ۱۹۶۲ ءِ زمانگ ئیگ انت جرنل ایوب ءِ پوراگربیں حکومت ءِ دور دوران انت ھک ءِ لوٹوکانی واستہ کید ءُُ بند انت دار ءِ کشگ انت گل زمین ءِ آزمان زلم ءِ سیا تھاریں جمبراں مانپوش اتگ بلئے آئیءِ یلیں بچاں سرمچاری ھم برجاہ داشتگ ات استاد عبدالمجید ھمے گلیں باندات ءِ پلیں زھگاں راجی سوت ءَ ساجو کنت ۔آئیءَ ایشیءِ زیمر ھم وت جوڑکتگ ۔
استاد ءِ رند تر ءِ پربندانتی تہ ءَ زبان گنگ انت بلوچانی وتن مئے وتن دست بدست کدم کدم روان بہ بئیت ،دیر انت منزل مئیگ ءُُ شمئے ءُُ دگہ لھتیں شئیر بوتگ انت کہ زوال بوتگ انت ۔آئیءِ یک پربندے کہ ۱۹۶۶ گوادر انت انچو ش کہ چہ سرگال ءَ زانگ بیت اے پر بند ۱۹۶۶ ءِ گوادر ءِ ھما ڈاہ ءُُ شور ءِ بارہ ءَ انت کہ ایشیءِ آسر ءَ گوادر ءِ باز ھانوادہیں سیاسی ءُُ سماجی کارکن ءُُ ازت مندیں اسپیت پوشیں مردم سرکشی ءِ نیمون ءَ گرگ ءُُ بندیگ کنگ بوتگ انت ۔
استاد مجید چاگرد ءِ ھمک بد ءَ را ایر جنت ءُُ آئیءِ سرا شئیر نبشتہ کنت ۔اے زمانگ ءَ بزاں ۱۹۷۳ ءَ آئیءِ دومی پر بند ’’ ٹپ ءِ جنوک‘‘ انت ایشیءِ تہ ءَ نواب اکبر بگٹی ءِ کارپداں ایر جنت کہ آئی ءَ ھما دور ءَ وتی ھمراہ دروات انت نیپ ءِ جائزیں حکومت ءِ ھلاسی ءِ شازش ءَ ھور بیت ءُُ بلوچانی کو ش ءَ وتی دست ھم ھونین کتگ ات ماسٹر عبدالمجید ءِ انداز ءَ اے شگان ترند ترکتگ گوش ایت
مردے بلوچ ءِ باسکے ات
شیر بلوچستانے ات
گوں کپت بلوچ ءِ دژمنان
کپتگ نہ وشیں راہے ءَ
ٹپاں دلون زیمی کتگ
ٹپ ءِ جنکو دزبرادر انت
بیران بلوچ ءِ کے بگپت
کشتگ وتی زوراکے ءَ
اے پر بند ءَ رند داں یک مدتے ءَ آئیءِ نوکیں پر بند مئے دیم ءَ نہ اتکگ ات ایشی ءِ سبب آئیءِ جند ءِ گم ءُُ گڑتی ءُُ دزگٹی بوت کن انت پرچکہ اے دوران ءَ آئیءِ مستریں بچ محمد انور نادراہی یے ءَ گورجتگ ات پد ءَ آئیءِ پت ھم بیران بوتگ انت ۔
آئی ءِ نوکیں شئیرانی تہ ءَ پنت گریبانی میتگ ،گریبائی عید ،چو نہ بیت ءُُ دگہ انچیں پر بند انت کہ آئیءِھمے پگر ءِ پدری ءَ کن انت ۔ اگرچہ آئیءِ شائری امیت ءُُ ھمت زگریں باہندانی شائری انت بلئے آ بے بنیں وشمنی ءِ آماچ نہ انت۔
گلزمین ءِ پاسپاں گرکانی ھمراہ بیتگ انت
رسترانی آسر ءَ گنجیں دیار بنجاہ بیت
استاد عبدالمجید گوادری ءَ وتی شئیرانی تہ ءَ بلوچ ءِ گال باز آورتگ اے گال یک نیمگے آئی ءِ راجدوستی ءَ پدر کنت بلئے دومی نیمگ ءَ اے یات کنگ لوٹ ایت کہ آئیءِ گور ءَ ’’ بلوچ‘‘ یک بے دروریں کردارے ءِ نام انت اے کردارے بے وسیں انسانانی پشت ءُُ مھر ءُُ دوستی ءَ ربالو انت ۔
بلوچی ءِ شھزانیں لچہ کار سید ھاشمی ءِ ’’ شاہ جورسالو‘‘ ءِ بارہ ءَ راست گوشتگ کہ بے کچ ءُُ بلوچ دست ءِ دل انت ھمے پیم ءَ استاد عبدالمجید ءِ شائری ءِ بامرد( ہیرو) بلوچ ورنا انت ءُُ آ چہ وتی اے بامرد ءَ سدک انت کہ اے گوں وتی بے دروریں کرد ءَ نہ ایوک ءَ وتی راج ءُُ راج ءِ نزوریں مھلوک ءَ چہ زوراکاں رکین ایت بلکیں دنیا ءِ اے دگہ زیر دستیں راج ءُُ زہبریں انساناں آزاتی ءُُ آسراتی ءِ برورد ءَ بھر مند کنت ۔
’’ گلیں باندات‘‘کہ آئیءِ اولی شئیرانی کتاب انت ایشی ءِ وانگ ءَ رند اے پدر بیت کہ استاد عبدالمجید ءِ شائری برز بلندیں مراد ءُُ مقصدے دارایت آ پہ مھر ءُُ دوستی ءَ زورکیں ایمنی ءُُ وشی ءِ ھدوکیں ءُُ راستی ءِ بیرک داروکیں انسان دوستیں شائرے ۔ راستیں گپ ایش انت کہ آئیءِ شائری ءَ نوکیں ادب ءِ اے لوٹ پیلہ کتگ کہ ادب ءَ زند ءِ آدینک بیگ لوٹ ایت ۔
آئی ءَ وتی چاگرد ءِ وشیں ءُُ تَھلیں راستی ،مارشت ءُُ باھندگوں وتی جتائیں انداز ءَ بیان کتگ اتن ۔گلیں باندات الم ءَ پہ بلوچی ادب ءَ اے وھد ءِ جوان تریں سوگات انت ۔ءُُ بلوچ راج ءُُ آئیءِ ادب ءَ را انچیں بور سوار پکار انت ،بلوچی ءِ کشار سبز بات
علی عیسیٰ ،کراچی ۵ فروری ۱۹۷۹
منت وار سلیمان ہاشم ءِ کہ چہ آئی ءِ فیس بُک وال ءَ اے زورگ بوتگ۔