بدلخان واڈیلہ ءِ گچین دستونک
وانندگاں
مے سروگانءُ سروک وانندگاں
چار کتاباناں پڑوک وانندگاں
جنگلءِ گوکءُ پساں تاجے سرءَ
للکّاں پونزءَ بروک وانندگاں
ھاک روپ پاسداریءِ پہ اگدہءَ
واجہءِ پاداں کپوک وانندگاں
داکتراں پروفیسرانءُ ماستراں
سنگراں تیراں جنوک وانندگاں
تیگءُ کاٹاری شگان دنزاں شتاں
داسی اُستاھی دموک وانندگاں
ھشءُ دانچوپی ڈھلوک وانندگاں
جانشو ماھیگ گروک وانندگاں
من بدلخان ایوکا بے وانگ اوں
سرجمیں شہر ءِ گنوک وانندگاں
بدلخان واڈیلہ
٭٭٭٭
چمءُ پونزءُ جَگر بہائیں بلوچءِ
برات جندءِ اگر دگائیں بلوچءِ
کاروان ساربان منزلءَ سربتگ
راھشون رھبر کجائیں بلوچ ءِ
گورءُ کِر بُرتگاں مُچ باروٹیاں
لیجرءُ کولگر رُگائیں بلوچءِ
بوٹگاں موٹگاں چیر ھاکءِ تہا
وش تامیں جُگر لدائیں بلوچءِ
نیمگے بستگاں نیمگے نیمگاں
ھیزکانی ھبر دو جائیں بلوچ ءِ
گُلگ ریز ریزتر پاگ دراج دراجتر
کارءُ کسبءُ ھنر ھمائیں بلوچءِ
سمڑاں کنٹگاں گوں چِشءَگَل کتہ
ٹالبرّیں تپر لچائیں بلوچ ءِ
سر کنوک مُرتگاں پارلیمنٹءِ تہا
سرکنوکءُ صدر حدائیں بلوچ ءِ
بدلخان واڈیلہ
درد نندگءُ نالگءَنہ روت
لُنٹ اگاہ جوزگءِ مالگ ءَ نہ روت
درد ھم نندگ ءُ نالگ ءَ نہ روت
ھر گور ءَ بکملیں پیلکاں کوپگاں
دل بلے گونی ایں گوالگءَ نہ روت
پاد مں کپتگاں گوں پشمپ شرتگاں
دست مں سارمی کالگءَ نہ روت
کرومگاں گرنچتگ دل منی اندر ءَ
مرتگیں بالو اۓ بالگءَ نہ روت
کڑّنی چے دگے کوتلی چے دگے
ھِرّ وت بستگیں جالگءَ نہ روت
داں ماوا پرپُکیں شِمشکیں شربتاں
تپ تئی داتگین تہلگ ءَ نہ روت
چو بدلخان نبیت حاجی ایں مردمے
داں کلانچ ءِ دمّگ کلّگءَ نہ روت
بدل خان واڈیلہ
٭٭٭٭٭٭
٭٭٭٭٭٭
زُلپانی گواجن ءُ پیڑاپ ءَ مرتگوں
من ھر رو میتگءِ مھتاپءَ مرتگوں
کُل ءَ چو ناتوام نادراہ ءَ ھپتوی
دنیا ندیستگ ءُ من لاپ ءَ مرتگوں
لنٹانی شیرگءُ آپینک ءِ ترمپک ءَ
پاھار ءَ سینگ ءِ الکاپ ءَ مرتگوں
تو برپ درشمیں بالادءَ گوستگ ۓ
من جند ءِ گس دپ ءِ پیتاپءَ مرتگوں
بازانی چمب وارتگءُ سیکّنانی تیر
کونجانی ھوری ءَ مرگاپ ءَ مرتگوں
تو لندن ءَ راوۓ واشنگٹن ءَ مِر ۓ
من سُرمگیں دیار ھوشاپءَ مرتگوں
ھوشام ءِکلّی ءَ تئی گیر مان کُت
تئی ترانگ ءِ زکّ ءَسیراپ ءَ مرتگوں
دنیا مریت بدلخان پہ گوشت ءُ گلّہءَ
من دیگ ءُ منجل ءِ واداپ ءَمرتگوں
بدلخان واٖڈیلہ
٭٭٭٭٭٭٭
٭٭٭٭٭٭٭
دل دُنیں ترانگاں گوں گوزگّان انت
کونر ءُ داز ءُ گزّی مدّگان انت
سبز ءُ سیاہ ءُ سگار مُرتءُشتاں
کمبرو انگت ءَ مں رمگّان انت
تو ستر رونءُ پروش ھُوکءَ لَپاش
دھل دوبر سبزکیں مں ردگّان انت
بید ءِ تو شیرگءُ شکر کانڈیل
پمن ءَ جورءُ تہلیں کرھگّان انت
چُک وانندہ انت کلم گوش انت
میش ءُ گٹّور گڈّ ءُ گورگّان انت
گم گُل ءِ بیت یا گلزمین ءِ بیت
ٹپ دلءِ ھر ھسابءَکدگّان انت
مے سروک ٹھگءُ ٹور تگار لاپاں
مادریں ڈیھ گوں بژّوسرھگان انت
من بدلخان سر ءَ اباشکوھاں
مردمے مازھگّان ءُ مجگّان انت
بدلخان واڈیلہ
٭٭٭٭٭
٭٭٭٭٭
بیا بلوچستانءَ
آتکگاں ساھیلاں جمبر بیا بلوچستان ءَ
بل ھما بازیناں دلبر بیا بلوچستانءَ
تو منءَ چاشینتگاں نیوگوں ملکءِ وتی
من ترا چاشیناں کونر بیا بلوچستان ءَ
گڈ ءُآھوگءُ تلمباں جستگر ٹوکے بکن
زندگاں بالاچ ءُ کمبر بیا بلوچستان ءَ
گوں پُرانیگاں بزیناں اشکریں کنتراں
بستگاں واریناں سومر بیا بلوچستان ءَ
دیدگاں چِرکے جتہ تو درانڈھ وپتگ ئے
سرمگاں باتیل ءُگوادر بیا بلوچستانءَ
منزل ءَ بے منزلاں مسترءَ بے مستراں
بے گتاں گاریناں رھبر بیا بلوچستانءَ
واجہی زندءَبدلخان شوانگی دردے پہ دو
ترانگاں چاریناں ڈنگر بیا بلوچستان ءَ
بدل خان واڈیلہ
٭٭٭٭٭٭٭٭
٭٭٭٭٭٭٭٭
دل اگاہ درد مداریت بئے نہ انت
چم اگاہ آرس میاریت بئے نہ انت
باگپان اُوست ءُ اُمیتے آپ دنت
کرومگاں پل نیاریت بئے نہ انت
دل بلیت کولُک پہ سیسرک تینیءَ
سرتگاں جنت کپاریت بئے نہ انت
داں گل ءِ جاتگیں جوزاں مہ وارات
عاشقاں بنگ ملاریت بئے نہ انت
شیرگاں مجگ ءَ مکشیت داں طبیب
سینگاں ھشک لتاریت بئے نہ انت
مالک انت ملک ءُ ڈگارءُ گریشگ ءِ
ٹالکاں چنت پلاریت بئے نہ انت
سیٹھ اگاں کرش بہا کنت واجہ انت
چورھاں دست سماریت بئے نہ انت
گرندگءُ بیرءُ درداں جمبر بزیں
تَر مکن ھُور مہ گواریت بئے نہ انت
چم پچ ءُ زانوکءُ وانوک در بروک
داں بدل ھانءَ مہ وانیت بئے نہ انت
بدل ھان واڈیلہ
٭٭٭٭
٭٭٭٭
منی بانکیں وطن
منی بانکیں وتن منی منگہءُ مڑا
پرواہ مباں ترا تئی پن ءُ آمڑا
تئی سنگ آسودءَ تئی آپ زمزم ءَ
من ءَ دوست قبلہءَ چو مکہءِ وڑا
تئی کوہ ءُ ماتکوہ آھوگی وابجاہ
منی دل چو ماریءَ تئی کاشءُ کبڑءَ
تئی اِرتُکیں زبار منی چمءِ سرمگاں
منی دل چو دلوتءَ تئ درچکءِسمڑا
من ءَ کیدے ءَ بلوپ پیشانیءَبے بند
منی دستءَ مان گیج وتی جیڑہءُاڑا
منی زید ءُ کھچراں بیا کوکرءَ درا
منی بوٹگاں بے شنز وتی جمبری جڑءَ
منی شکٌل ءُ شکر تئی سُور تامیءَ
منی کیچ کور بلیت تئ سبزیں ساوڑا
ٹئی دژمن ءَ اگہ است تیر توپگاں
منءَ سنگ کیسگ ءَ گوں جمکءُربڑا
بدل ھان واڈیلہ
٭٭٭٭
٭٭٭٭
بیا بلوچ بیں
شیشا شلو شلیگ بیں بیا بلوچ بیں
سر چادر ءٌ سریگ بیں بیا بلوچ بیں
مردی پڑکہاں بیں گلگاں پہ داب ریزیں
کاٹار ءُ زھم ءُ تیگ بیں بیا بلوچ بیں
اے زر تئیگ سیندک ءُ بولان ھم تئیگ
چمدار داں کدیگ بیں بیا بلوچ بیں
ڈوڈانی تاس بیں ءُ دازی سواس بیں
پدمنتگ ءُ پدیگ بیں بیا بلوچ بیں
بلکیں کسانیں حمل ئے کیتیں سودومیءَ
نیلیں زر ءَ کٹیگ بیں بیا بلوچ بیں
اے بولک ءُ دیاراں کمپانے ءَ کنیں
دروازگ ءِ کڑیگ بیں بیا بلوچ بیں
چانٹاں جنیں پہ بدواہ دوستاں دل ءَ کنیں
روژناھی ئے دریگ بیں بیا بلوچ بیں
گہرام ءِ دروشم ءَ بیں میر کمبر ءَ یلیں
پہ دژمن ءَ لدیگ بیں بیا بلوچ بیں
بیا آلکوھاں ریکی کوھاں چنءُ واریں
بیا کمکیں شدیگ بیں بیا بلوچ بیں
ارساں شلیں بدلخان گل خان نصیر بیں
بیا پہ وتن گمیگ بیں بیا بلوچ بیں
بدلخان واڈیلہ
٭٭٭٭٭٭٭
٭٭٭٭٭٭٭
زندگی پُل ءَ نازاک بہ بیت بس
کرگز ءِ لنٹ ءَ مزواک بہ بیت بس
زنچک ءَ بگر انت تئی برات منیگءَ
پشک مے ھر رو چاک بہ بیت بس
گو ں دُنی گیراں کلمانٹی رُدات ئے
زُلپ تئی پمن تاک بہ بیت بس
مولدے ٹیھے بَشورے منءَدوستیں
مادریں ڈیھ ءِ ھاک بہ بیت بس
مھتر ءُ مِیر انت ملک ءِگڈاں واجہ
للٌک ءُ چرپ ءُ چالاک بہ بیت بس
بِلے ھمساھگ گوش ءُ سراں کشّاں
میگ ءُِ تئی لوگءَ جاک بہ بیت بس
بیا کناں تواب کیفانی بدلخان
کدح ءِ خانہ پاک بہ بیت بس
ندرانت پہ درانڈھی سنگتاں
تیتلی تراتاں یلو کنت درانڈھاں روت
دل گلءِیاتاں یلو کنت درانڈھاں روت
پوگس ءُ لہمیں گتراگان ءُ دریپانچ آں
شیرگی پاتاں یلو کنت درانڈھاں روت
جامگءً جراں شموشیت پہ گورءِ ٹاھیءَ
زاتءُ زریاتاں یلو کنت درانڈھاں روت
لاپءِ شوھازءَ اگہ روت بروت پرواہ نیست
تنگوھیں براتاں یلو کنت درانڈھاں روت
گلزمین پیرءُ کماشیں وتی بچاں لوٹیت
بچ بلے ماتاں یلو کنت درانڈھاں روت
ماریاں جُٹ ءُ جروٹاں ءُ کپوتاں بل ئے
پُل ءُ سوگاتاں یلو کنت درانڈھاں روت
دژمنءَ داشت ءَ منی گُر بلے دوست منی
نیزھی باتاں یلو کنت درانڈھاں روت
بدلخان واڈیلہ
٭٭٭٭
٭٭٭٭
وش کن ءُ ریپین دل ءَ گواجار من ءَ
مولماں پوست ءَ کن ءُ ٹوھار من ءَ
مُرگ پانچ دوچی گورا دیم ءَ گوزیت
چَنگلاں جنت رپتگیں اوپار من ءَ
گوپتگیں ملگور ساھار انت دل ءَ
وپتگیں واب ءَ ماوا سیاہ مار من ءَ
من پہ رک ءُ آمڑ ءِ رنگ ءَ گنوگ
ھلک ئے ملا کنت پہ تاویز سار من ءَ
من دگے پیم واجہ ءُ سردارے اوں
بس ھمے نیست تنگو ءُ کلدار من ءَ
لنککاں پنچیں مں ساپیں روگن ءَ
گنجل ءَ گنجیں کتگ دشتار من ءَ
من بدلخان بانڑی گپت ءِ گلام
دین ءُ دنیا ایچ دگے نیست کار منءَ
بدلخان واڈیلہ
٭٭٭٭٭٭٭
٭٭٭٭٭٭٭
منءُ منی وطن
ھما کیچءً کوہٹہ ھما دشتءُ کو
ھما من ءُ ھما منی وطن
ھما گواڈگ ءُ دُن ءُ دُ نگءُ بو
ھما من ءُ ھما منی وطن
ھما کیلگ ءُ ھما بیلگا ں
کڑبانی سبزیں بزیں ھوشگاں
ھما اوٹگ ءُ ھما کورءُ جو
ھما من ءُ ھما منی وطن
ھما کُندءُ کاشک پشمپءُ تگلم
کرءُ مرزءُ امبءُ کسانیں بکو
ھما نا حدا ھما جانشو
ھما من ءُ ھما منی وطن
تو زر گپتگیں پلاٹاں گَل ئے
درھم ڈالرءُ کلڑاں سر ئے
پِت ءُ پیرکی منی ماتکو
ھما من ءُ ھما منی وطن
برے لندن ءُ مں واشنگٹن ئے
گورے ٹائی ءَ تو پیزہ ورے
منی شمشک ءُ ھما آلکو
ھما من ءُ ھما منی وطن
ھما مِیرکاں تل ءُ تلساں
ھما ملبراں گبرےپہ براتاں براں
ھما واجہ ءُ ھما بانکو
ھما من ءُ ھما منی وطن
بدلخان بلکیں بدل بیتگ ئے
منی لیٹّک ءُ گلیرانت ھما
ھما ڈیری ءُ ھما کانگڑو
ھما من ءُ ھما منی وطن
بدل خان واڈیلہ
٭٭٭٭٭
٭٭٭٭٭
زراگاں تہی تُگیں ترانگ زھیر ھون انت
زِکانی شیرگ ءُ شیرآپ ترا گون انت
چے پیم بیاراں مں آزمانءُ منءُ سلوہ
حدا پیلو بکنت تہی مکر ءُ نیمون انت
تو شالے پوشیتءُ شالک چگل دات انت
چگل دے تنگوھاں کوھنیں کہ نیمسون انت
منءُ بانجیگ تالءَ انت کمرزاناں منی بیلو
تہی ھمساھگ ءُ مردم پتو چون انت
پتو گیمرتگءُ بے آپیں گونگاں کتگ پو گس
منءَ پہ زندگیں پردانی گڈ پون انت
منی ڈیھءَ ھمک چار راہی سرءَ ایر انت
اے آدم ذادگ انت یا رستری جون انت
تو مہر ءِ آپ داتگ توم کشتگ وپاھانی
بدلخان تہی کشار ھر موسمءَ رون انت
بدلخان واڈیلہ
٭٭٭٭
٭٭٭٭
بدلخان واڈیلہ
دل اگہ پروشت ئے پرواہ نیست
دیریگیں دوست ئے پرواہ نیست
کُٹ ٹًلک ریکی آلکو باز انت
نیست اگہ گوشت ئے پرواہ نیست
دٍرتگیں مًشک ئے سارت کنت آپاں
پاچنی پُوست ئے پرواہ نیست
بُز وتی ڈاچیءُ ھٍر وتی جندے
شیر اگہ دوشت ئے پرواہ نیست
دلبرءً مشتاں گوں جتگ مارا
دست نا اوشت ئے پرواہ نیست
میگءُ تہی کسہ بیت دوبر بنگیج
گونڈکیں اوشت ئے پرواہ نیست
٭٭٭٭٭
٭٭٭٭٭
غم سگ اتگ درد ماراتگ تو پہ کےءَ
من پہ ترا دُور چاراتگ تو پہ کے ءَ
دل پہ کٹوری کاڈک ءَ دیوانگ انت
مسک ءُ دناں سینگاراتگ تو پہ کےءَ
من وا زمین جمپ داشتگاں گوں کوپگءَ
دمبرتگءُ ساساراتگ تو پہ کےءَ
تو گوں ھما کونجی رماں ھور برو
تَلکاں کلی کوپاراتگ تو پہ کے ءَ
من پہ وتن ڈیھءُ ڈگار ارساں شل ھاں
بانک گُلی ھیسکاراتگ تو پہ کےءَ
ما وا کڈّب گوں ھوشگاں کاہ دان کتگ
سمّڑ چتگ نزاراتگ تو پہ کےءَ
ما وا پرانی وارتگاں گوں بینگّاں
مپت ئے حدا باکاراتگ تو پہ کے ءَ
تژن ھاں بدلخانءَ مجن نیزگاری ئے
پیراں پکیر ڈوباراتگ تو پہ کے ءَ
بدلخان واڈیلہ
٭٭٭٭٭
٭٭٭٭٭
بانجیاں مہراں پہ دروتاں کپتگ ئے
کونزّگی نازینکءُ سوتاں کپتگ ئے
تو ھما مورگ جڈکشءِ لاہق پہریزگ ئے
لیپگی کچّکانی کوتاں کپتگ ئے
ماری ئے تراپے نہ جونگیں لیڑوے
ساربان جُٹ ءُ جروتاں کپتگ ئے
بولکے ملک ئے نہ درچکے چم کپیت
شانتلاں کوں کوں کپوتاں کپتگ ئے
تہی حیالاں در بیاھاں من مراں
شھرگءَ جانءَ ما روتاں کپتگ ئے
من بلوچ ھر زات وتی سردار کتگ
تو مدام لاشارءُ ھوتاں کپتگ ئے
من ترا زرتگ کوارءَ او منی مسری شکر
پیلکاں جنڈیں ما لوتاں کپتگ ئے
تہی بدلخان انگتءَ چُکّی نہ روت
رُستگ ئے ریشءُ بروتاں کپتگ ئے
بدلخان واڈیلہ
٭٭٭٭
زلپی شودآپاں بچاشینءُ ملاراں کن بیا
بیا ھما دراشیں پدا کولءُ کراراں کن بیا
بیدءِ تو تچک نہ بنت پاد کبرءَ ساہ درنائیت
دست آرتءَ انت گڈاں ایر کُپاراں کن بیا
شیزءُ سولے پہ رگت تراتےدل ءَ ساڑین ایت
بیار کرگوشکءَ پدا پلء ُ بہاراں کن بیا
دانءُ گندیماں ببر ماشءُ پرماشاں زیر برو
پمن پوچکانءُ پگاں ایر ماں پالاراں کن بیا
من وا جزما تو نیاۓ ترا ریپنگءَ چے بیت
مپتءُ بے سوبیں منءَ ھشکیں وداراں کن بیا
بلکیں امروز بدلخان ءِ دوروچ پیم گوازیت
بیا ھما دابءَ پدا ریشّ ءُ کناراں کن بیا
بدلخان واڈیلہ
٭٭٭٭٭
٭٭٭٭٭
گوں دلءَ گرنچ انت ھما نامءِ نہ گراں
عقلءُ ھوش سدءُ سما نامء ِ نہ گراں
دیدگاں دیست بلے سیراں نہ دیست
گوست کونجانی رما نامءِ نہ گراں
آ منیگ انت ءُ منیگ کس سھیگ مہ بیت
من ھمے ترسءُ غما نام ءِ نہ گرا ں
دژمنءَ زانیں وتی نا شناس وا نہ انت
دسیتگاں دُرس ما شُما نام ءِ نہ گراں
چونیں تاھیرئے منی ماھوءِ ملگوراں بزیں
زلپءُ گیوار ءِ شَما نام ءِ نہ گراں
گوں نپس گیراں منی گین بندءَ نشتگ
داں نہ کش آں من دما نامءِ نہ گراں
تہی بدلخان بچار بحتءُ نصیبءَ کپتءَ
نیست اے ڈولیں نِما نامءِ نہ گراں
بدلخان واڈیلہ
٭٭٭٭٭
٭٭٭٭٭