زبانانی زندان۔ دومی بھر ۔ مجاھد بلوچ
زبانانی زندان۔سپرھال
دومی بھر ۔ مجاھد بلوچ
اے مراگش ءَ کلاں گیش علی عدالت ءَ تران کرت۔آئی ءَ پاکستان ءِ سیاسی،معاشی،چاگردی ءُ زبانانی جیڑاھانی سرا ابید ترس ءَ گپ جت،آئی ءِ گشگ ات”ریاست نہ لوٹ ایت کہ زبان دیمروئی بکن انت۔آ ماتی زبانانی بیگواہ کنگ ءِ پدا انت۔اے ملک ءَ ھر کس ءَ پہ وتی زبان ءَ وت جھد کنگی انت۔”
اے مراگش ءَ پد علی عدالت مئے کرا آتک گوں ما ھواری ءَ چاہ وارت۔آئی بلوچ ءُ بلوچستان ءِ جاورانی سرءَ بازیں گپ جت۔واجہ وت برطانیہ ءَ جاہ منند انت،اے مراگش ءِ ھاترءَ اتکگ ات۔آئی وتی کسانی اے ملک ءَ گوازینتگ بازیں سْیاسی چست ءُ ایراں ھوربوتگ،زندانءَ ھم بندیگ بوتگ۔آئی ءِ گپاں چہ پدر بوت کہ آ چہ ریاست ءَ ھچ رنگ ءَ وش نہ انتءُ ریاست چہ آئی وش نہ انت ءُ آئی گرءُ دار ءِ پدا انت۔آئی گوں بلوچاں وتی دلپدردی درشان کرت۔
اے روچ ءَ دگہ بازیں مراگش بوت،کلاں گیش من ءَ مشتاق لاشاری ءِ اکسکاری دوست بوت ۔آئی اکسانی پدرائی بوھگ ءَ ات ۔مشتاق بن بیھا بلوچے،بلے سندھءِ ایدگہ بلوچانی وڑءَ وتی ماتی زبانءِ بے ھال کرتگ۔مئے گندگ ءَ گوں آ باز گل بوت گوں پچیں روھ ءَ مارا وش آتک کرت۔
مئے ھمراہ بانک حُمیرہ صدف ءُ آئی جنک اقرا جتک ات انت،بلوچی دوچاں آئرا آثر مَنْد کرت۔واجہ ءَ پاکستان ءِ تھا اولی رند ءَ کوفی ءُ چاہ ءَ چہ کراچی ءِ کوھنیں مڈیانی اکسکاری کرتگ ات۔
آئی مارا وت لوٹ ات ءُ وتی اکساری پیش داشت انتءُ آھانی بابت ءَ سرپدی دات۔آئی بلوچستان ءَ وتی اکسانی پدرائی ءِ واھشت درشان کرت۔
باید انت پاکستان ءُ دگنیا ءِ ھمک کنڈءَ بلوچ ازمکار است انت،آ یکجاہ کنگ بہ بنت ءُ مراگش ٹھینگ بہ بیت چہ ایشی ءَ یکے دومی ءِ ھنر ءَ سرپد بوت کن انت ءُ باز ھیل کرت کن انت۔ایشی ھاترا باز توجیل جھد،زر ءُ ایمان لوٹ ایت۔
اے مراگش ءَ آرٹس کونسل ءِ دیمی نیمگ ءَ کتابانی اسٹال است ات،بلئے آ وڈئیں مچی کہ بلوچستان ءَ کتابانی اسٹالاں گندگ بیت ،ادا آ وڈیں مچی نیست ات۔ھمے رنگ ءَ جْوانیں کتاب ھم دست نہ کپت۔گیشتراں کتاب زورگ ءَ گیش اکس کشی ءِ سرءَ زور داتگ ات۔کتابانی دومی نیمگ ءَ ورگ ءِ چیز بھا بوھگ ءَ ات انت،مردم کتاباں گیش ھما نیمگ ءَ گیش روگ ءَ ات انت۔انچوش گمان بوت آ چہ کتاباں ترسگ ءَ انت۔جنک و ھچ رنگ ءَ کتابانی نیمگ ءَ نہ یتک انت۔۔
روان انت
*****