میرین ءِ گڑ ءُ مَنجی۔ ھونک غیبی
میرین ءِ گڑ ءُ مَنجی
ھونک غیبی
ہر کس کہ گدار ءِ شرّیں وانوکے آ زانت کہ پہ گدار ءَ زبان چنکس ارزشت مَنْد انت۔ پدا گِدار ءِ تہا وہد ءُ پاسانی حیال دارگ ام اژدری انت۔ تو شپ ءِ گپ ءَ ئے ءُ پدا بگؤش ئِے کہ دُور کپوتانی رمے بال جنان ءُ دیم پہ کدوہاں جنزان اَت۔
من شئے سید ءِ میرین ءِ کمو “پوسٹ مارٹم” ءَ کنیں۔
“سیاھیں جمبرے ءَ ترندیں کٹھٹوکے جَت۔ ھمے ترندیں آواز ءَ اناگہ میرین چہ واب ءَ گڑینت۔ ھور انچو تیز تیز ءَ رچگ ءَ ات کہ بان ءِ سر ءِ آواز اوں میرین ءِ گوشاں کپگ ءَ اتاں۔ جمبر سک رچگ ءَ ات ءُ پجیگ ءَ ترندیں گرند ءُ گروک ات ھم۔ شیپانی ژمب ژمب ءِ بیمناکیں توار ھم آئی ءِ گوشاں کپگ ءَ اتاں” تاکدیم 4
اِدا مردم زانت کہ فکشن نوشتہ کنوک انچو پہ دیم انت۔ گِدار یک انچیں چیزے کہ آئی اولی رِد وانوک ءَ انچش بہ کنت کہ آ دست ءَ دپ ءَ بہ کنت ءُ گدار ءَ پدا ایر مہ کنت۔
تو گوشئے کہ “ھور انچو تیز تیز ءَ رچگ ءَ ات کہ بان ءِ سر ءِ آواز اوں میرین ءِ گوشاں کپگ ءَ اتاں۔ جمبر سک رچگ ءَ ات”
ھور کہ سک تیز تیز ءَ رچگ ءَ ات گڑاں پدا جمبر سک رچگ ءَ ات۔ چیا آؤرتہ؟
زانہ ھور دگہ وڑے ءَ رچیت ءُ جمبر دگہ وڑے ءَ؟
“میرین ءِ گلین بان ءِ چاریں کنڈاں آپ رچگ ءَ ات۔ بان ءِ کونہ ءُ چار پنچ جاگہ ءَ بان ءِ سر ءِ نیام ءَ رچگ ءَ ات”
میرین ءِ بان ءِ چاریں کنڈاں کہ آپ رچگ ءَ ات گڑا بان ءِ کونہ کجام جاہ انت؟
“دروازگے پچ کت۔ گْوات سک کشگ ءَ ات ھور ھم گْوات ءَ گون ات۔ کمو ٹارچی شھمے جت۔ ھور پورا وتی زور ءِ گوما رچگ ءَ ات، ڈلگ ڈلگیں ترمپ ات انت۔ زرد زردیں گْواتے ات” تاکدیم 4
شپ انت، گڑاں تو اے زرد زردیں گْوات چون دیست؟ دومی گپ۔ ھور کہ چوش رچگ ءَ انت۔ زردیں گْوات چوں کشّیت؟ گْوات ءَ حاک زرد کنت۔ ھور ءِ تہا حاک چہ کجا؟
“میرین ھمے ندارگ ءَ چارگ ءَ ات ءُ ترس وڑیں کیفیتے جان ءَ ئِے پُترگ ءَ ات۔ تاکدیم 5
اے رِد ءِ بابتا من چے بگؤشیں؟ وانوک وت بگؤش انت۔
جہل ءَ بْیا اِت۔
“کدرت پورا انسانی زھرگ ءِ وڑ ءَ برانز گپتگ ات” تاکدیم 5۔
واہ نوشتہ کار تئی رم ءِ زبان ءَ۔
“چیزے گونڈو گریوگ ءَ ات۔ چیزے مچّے ءِ سر ءَ سوار ات” تاکدیم 9۔
مچّ ءِ سرا سواری؟ اے کجی مردم اَنت کہ مچ ءِ سرا سوار بنت؟
“جمبری موسمی ات۔ ھور ترمپ ءِ وڑ ءَ بس شلان ات انت” تاکدیم 10
ھور ترمپ ءِ وڑ ءَ بس شلان ات انت؟
نوں تاکدیم 11 ءَ بْیا ات۔
“میرین وتی میتگ ءِ ماتبند ءِ نیمگ ءَ شت اتگ ات۔ ھورے ءِ موسمے ات”
“ھورے ءِ موسمے ات”
“مُسلّہ ھچ پچ نیست ات” تاکدیم 11۔
مُسلہ ھچ پچ نیست ات؟
“میرین ءِ لاپ ءَ ھر پیشاپے کہ مان ات، دراہ در ئِے کت انت ءُ نوں یکدم ھالیگ ات” تاکدیم 17۔ 18
گدار ءِ نوشتہ کنگ لیبے نہ انت لال ئِے جان۔ فکشن مزنیں جکانسری یے لوٹیت۔ ھر چیز انچش پہ دیم نہ انت۔ زانہ شئے لہدادی ماش انت؟
(روان انت)