نمدی ءِ ڈاکٹر اے آرداد ءِ نام ءَ۔ اسحاق رحیم
نمدی ءِ ڈاکٹر اے آرداد ءِ نام ءَ
درْھبات ئے!
داد صاحب ھما روچی بزاں ۱۹ ستمبر ءَ کہ تئی دپتر ءَ ڈاکٹر رحیم مہر ءَ من ءَ بلوچی ڈپارٹمنٹ ءِ نوک چاپ بیتگیں “سید شناسی” ءِ درزن ءِ دوازدھیں کتاب یکجاہ دات انت گڈا دومی سُھب ءَ مہلہ من چہ شال ءَ پہ کراچی ءِ ھاتر ءَ بسے ءَ درْنگ بیتاں۔۔۔سفر ءِ میان ءَ من چہ درستاں پیسر تئی گِدارُک “شھواھگ” دست ءَ کت کہ راہ ءَ مرچی اشی ءَ واناں۔۔۔چوناھا منی زند ءِ گیشتریں روچ سفر ءَ گوزاں پمیشکہ باز مردم من ءَ رولے سرپد بیت ءُ باز گوش ایت اے مرد ءَ کار نیست شپ جاہ ءُ روچ جاہ اِنت بلے من ءَ سپرانی تہا ھما لزت ءُ وشی رسگ ءِ انت کہ بگندے ھمک مردم چہ اے وشیاں نا آژناگ انت ءُ ھما سرپدی ءُ تجربت کہ من ءَ سپرانی میان ءَ رستگ انت بگندے دگہ جاھے من نہ دیستگ انت۔۔۔بلے سفرانی میان ءَ وانگ ءِ موڈ من ءَ ھما وھد ءَ بیت وھدے من تہنا بہ باں ءُ پدا دراجیں سفرے ءَ بہ باں۔۔۔زیک ھم سفر دراج ءُ ات ءُ من تہنا اتاں۔۔۔۔
سبا دشتیاری ھم چہ چہ لیاری ءَ گیشتر وھد ءَ گوں 52A ءُ برے 55 بس ءَ چہ لیمارکیٹ ملیر ءَ سیدکتابجاہ ءَ اتکگ ات آئی ءِ ھم گوشگ ھمیش ات کہ اے ملیر والا بس آیگ سک دیر کن انت مردم ءَ دمبرائین اَنت بلے اشانی تہا یک پائدگے ھست کہ مردم چہ لیمارکیٹ ءَ داں ملیر ءَ اگاں کتابے دست ءَ بہ کنت پہ الکاپی ونت کنت۔۔۔ھنچوش شال داں کراچی ءِ دیرپاندیں سفر ءَ من ءَ تئی “شھواھگ” سرجم ءَ وانینت۔۔۔
داد من چوناھا فکشن ءِ مردمے نیاں بلے من یک ھبرے ھیران بیتاں کہ ۱۵۳ تاکدیم ءِ اے گدار ءَ تو گدارُک ءِ نام پرچہ داتگ وھدیکہ بلوچی ءِ گیشتریں گدارانی تاکدیم ھمے ھساب انت ءُ آھانی نبشتہ کاراں آ گدار نبشتگ انت البت اگاں کِسہ گِدارُکے گڈا آئی ءَ من زانت نہ کناں۔۔۔۔
شھواھگ ءِ گدار تئی نوکیں تجربہے کہ من ءَ سک دوست بیت کسے کہ سید ءَ وانگ لوٹ ایت یا سرپد بئیگ لوٹ ایت تہ اے گدار ءِ تہا سید ءِ گوادر ءِ زند ءَ بگر داں کراچی ءِ زمانگ درست نبشتہ بوتگ انت ھنچوش آئی ءِ دیر ءُ دراجیں سفر ءُ لبزانکی چِست ءُ ایرانی گپ جنگ بوتگ اَنت۔۔۔من شھواھگ ءِ تہا تئی اے راست گشی ھم سک دوست بیت کہ تو گدار ءِ تہا ھما مردمانی نام زندگ ءُ زاھر ءَ گپتگ انت کہ آھاں سید زند ءَ سک ازیت کتگ ءُ آئی ءِ کارانی دیما ڈنگر بیتگ اَنت۔۔۔۔
ھانُل کئے اِنت اے جست دیر اِنت کہ سید ءِ وانوکانی ھاتر ءَ مانگیش اتگ ۔۔۔باز گوش ایت کہ سید ءَ بلوچستان ھانُل گوشتگ ءُ بازیں ھمے گوش اَنت کہ اے جنکے بیتگ سید ءَ باز دوست بیتگ۔۔۔
تو وتی گِدار ءِ تہا ھانُل ملا موسی ءِ جنک ھان بی بی کُتگ آ چہ گوادر ءَ کراچی ءَ آورتگ بلے داد گپے باور کنے کہ گِدار ءِ تہا زانگ نہ بیت اے راستیں کسھے یا پہ گدار ءِ وشی ءَ تو مانگیتکگ بلے من ءَ گمان بوت کہ اے ھم راستی یے۔۔۔۔
البت ملا موسی چہ گوادر ءَ لڈگ ءِ وھد ءَ سید ءَ گوش ایت کہ ما اودا ملا عمر ءِ گورا داریں بلے وھدے سید کراچی ءَ کئیت داں ملا موسی گوں ھانل ءَ ملا عثمان ءِ ھمساھگ اِنت ملا عمر وا مولوی محمد عمر ریکسری ءِ نام ءَ مشہور بیتگ بلے ملا عثمان من نزاناں کئے انت بلے من گمان کت اے ھما عمر انت ادا تو پہ ردی عثمان نبشتگ یا وا عثمان دگرے۔۔۔۔
من ءَ تئی گدار ءِ وانگ ءِ وھد ءَ وتی ھدامرزی ئیں کماش ءِ اے گپ ھم یاد اتک کہ منی پِت ءَ مدام گوشت کہ ما وھدے اُشترانی سرا گوادر ءَ دار پہ بہایا بُرتگ گڈا اودا محمد شاہ یا آئی ءِ برات احمد شاہ ءَ دکانے بیتگ آئی ءَ مئے دار پہ بہا زرتگ انت۔۔۔۔من ءَ ھمے گُمان بیت کہ سید ءَ چہ ھمے گَلگی ساربانیں بلوچانی گورا ھم بازیں لبز ءُ شئیرے جست کتگ ءُ نبشتہ کتگ۔۔۔۔پدا من ھیال کت سید ءِ انچیں ندارگے تو مانگیتکیں کہ آ گوں بلوچیں کماشاں ھم دیوان ات ءُ چہ آھاں بلوچی لبز ءُ شئیر پولگ ءَ ات۔۔۔۔
شھواھگ سید شناسی ءِ تہا یک گچینی کتابے کہ وتی وانوک ءَ وانگ پرمائیت ءُ چہ اے گِدار ءَ مردم سید ءِ سرجمیں زند ءُ زھمتاں سرپد بیت۔۔۔
سلامت بات ئے ءُ گیش کار کنات ئے۔۔۔
تئی کستر
اسحاق رحیم
۲۱ ستمبر ۲۰۰ صفورہ گوٹھ کراچی