نسل پرستی ءُ بلوچ۔ذوالفقار علی زلفی
نسل پرستی ءُ بلوچ
ذوالفقار علی زلفی
نسل پرستی نوکیں چیزے نہ انت ایشی ءِ بن ءُ ریشگ سک دور رو اَنت ـ یونانی فلسفی ارسطو ءِ دیدانک ءِ رد ءَ لہتیں انسان فطری پہنات ءَ کم تر انت دانکہ آ یونانیانی ھزمت بہ کن اَنت ـ ھنچیں گپ افلاطون ءَ ھم کتگ ـ ھمے پیم یہودی تنیگا اے ھبر ءِ سرا باور کن اَنت کہ آ دنیا ءِ گھتریں نسل ءُ ھدا ءِ دوستناک تریں مردم اَنت
نسل پرستی ءِ بلے بدتریں شکل مارا ھژدھمی کرن ءَ گندگ ءَ کئیت ، وھدے یورپ چہ واب ءَ بست کنت ـ یورپ ءِ شہ زانت ءُ ھاکم ٹک اے لیکہے منوگر بیت کہ یورپ ءَ چے ڈن دراھیں انسان کم نسل انت ءُ ما باید آیانی سرا حکومت بہ کنیں ـ اے باروا ھرڈر ءِ لیکہ سک واناک انت ـ
جناور زانتی ءِ ردوم ءَ ھم نسل پرستی پزور کتگ ـ جناور زانتانی رد ءَ انسان ھم جناور انت بلے آ نسلی پہنات ءَ بالا انت , رند ترا گوشگ بیت ھنچوش کہ جناوانی نسل برز جھل انت ھمے پیم انسان ھم برز جھل بنت ـ اے وھد ءَ مرتگیں انسانانی سرگ ءِ شوھاز ءُ آیانی بنیات ءَ کم نسل ءُ شر نسل ءِ ٹھینگ ءِ کار ھم بنا بوت ـ یورپی شہ زانتانی مول ءُ مراد وتا بُرز جَنَگ ءُ اے دگراں کم ثابت کنگ بوتگ ـ
ردوم ءِ لیکہ ءِ مزن شانیں نام واجہ چارلس ڈارون ءِ پٹ ءُ پول ئی کتاب ءَ ھم نسل پرستی ءِ سرا سک سان اشتگ ـ دروغیں سائنس دیما اتک کہ بچار ڈارون گوشیت ھرچ نسل گھتر بیت آ دیمروی کنت ءُ ھما نسل کہ نابود بیت آ پشت ءَ پش کپیت ، پمشکا یورپ چہ ایشیا , افریقہ ءُ امریکہ ءَ دیما انت پرچا کہ یورپی نسل چہ دراھیناں بُرز ءُ بلند انت ـ
ھٹلر دنیا ءِ مستریں نسل پرست رھشون زانگ بیت چیاکہ واجہ جرمن نسل ءِ پہکی ءِ منوک بوتگ بلے ، چوش وَ ھو کہ ھٹلر مزنیں نسل پرستے بوتگ بلے اے گوشگ کہ تھنا ھٹلر بوتگ زنڈیں دروغے، انگلینڈ , فرانس , اٹلی , اسپین ءُ پرتگال ھم وتی نسل ئے پاکیزگی ءِ منوگر بوتگاں ـ
کولونیل دور ءَ عیسائی پادری ءُ سرمایہ دار وت مہ وت ھوار بوتاں ءُ حضرت عیسی ءِ ھنچیں بت اش اڈ دات کہ آیانی تہا حضرت عیسی اسپیت کوچگ انت ـ حضرت عیسی فلسطین ءِ مردم بوتگ ، آئی ءِ اسپیت بوئگ ءِ ھچ امکان نیست بلے یورپ اے منّگ ءَ ساڑی نہ اَت کہ مئے رھشون چہ ما نہ انت ـ عیسائی پادریانی لیکہ اَت کہ ما ھدا ءِ نزیک تریں نسلے پمشکا اے دگہ گمراہ انسانانی رھشونی ءِ ڈُبّہ مارا گون انت ـ
نوزدھمی کرن ءِ گڈسر ءَ جینیٹکس ءِ سائنس ءَ دیمروی کت ءُ ثابت بوت کہ ھچ نسل کم تر نہ انت ـ پدا ھمے وھدی کوھنیں دودمانانی پٹ ءُ پول ئے کاراں ھم ثابت کت کہ ھچ نسل زگر بوت نہ کنت , دراھیں انسان وت مہ وت ھوار انت ـ انسانی سرگ شوھاز کنگ ءِ کار ءِ سرا تپر لگ اِت ءُ نسل پرستی ءِ لیکہ ءَ پروش وران کت بلے تنیگا کامل پروش ئے نہ وارتگ ـ
امریکی دپتر زانت “جان جیکسن” ءِ کتابے ھست “MAN, GOD, AND CIVILIZATION” ـ اے کوھنیں دود ءُ ربیدگانی سرا پٹ ءُ پول ئی کتابے ـ واجہ ءِ پٹ ءُ پول ءِ رد ءَ بابل , مصر , یونان ءُ لاطینی امریکہ ءِ کوھنیں دودمانانی بنزہ افریقہ انت ـ رند ترا چہ ھمے دودماناں عرب , ایران , یہودی ءُ یورپین دودماناں سان زرتگ ـ واجہ وتی کتاب ءِ تہا نبیس ایت نوح , موسی , آدم , جنت ءَ چے درکنگ ءُ ایدگہ اساطیری داستانانی بنزہ افریقہ ءِ سیاہ پوست اَنت ـ سیاہ پوست دنیا ءِ اولی دودمان اڈ کنوک بوتگاں ـ جان جیکسن دیم ترا گوش ایت کوھنیں زمانگ ءَ ھدا , پیغمبر ءُ نیکی ءِ باروا پگر کنگ بوتگ کہ ایشانی رنگ سیاہ انت بلے وھدے تہذیب ءِ بنزہ بدل بوت گڑا سیاہ رنگ ءِ بستار ھم کپت ـ
ھمے پیم , افریقہ ءِ آشوبی رھشون ءُ سوشلسٹ شہ زانت کوامی نکرومہ وتی پٹ ءُ پولی نبشتانک “نیو کولونیلزم” ءِ تہا جاھے نبیس ایت , داں مردم بدیں چیزانی واستہ سیاہ ءِ لبز یا شپ ءِ استعارہ کارنت تنا وھدی نسل پرستی ءَ چہ انسان ءِ زہن ءَ کشّگ نہ بوتگ ئیں گپے ـ ھمے رنگ ءَ اے بنگپ ءِ سرا الجزائری شہ زانت واجہ فرانز فینن ءِ لیکہ ھم وانگ کرزیت ـ
بلے مئے گورا جیڑہ تہنا سیاہ اسپیتے نہ انت ـ مئے چاگرد ءَ دست ءِ گوما کار کنوک یا سوت جنوک ھم کم نسل ءِ نام داتگ ءُ اے ٹکانی نام ھم سک بدیں ایر کتگ ـ جت , استا , لوڑیگ , درزادگ , بردیگ ءُ دگہ بازیں ـ ایشاں زمین نیست , میراث نیست , دپتر ءِ تہا , کلاسیک شاعری ءِ تہا ایشانی نام پہ شری نیست بزاں اے بلوچستان ءِ چک نہ اَنت ـ رومن امپائر ءِ رنگ ءَ مئے چاگرد ءَ ھم اسپارٹکس داشتگ ـ ھمے برز جھلی ءِ سوب انت بلوچانی مستریں بھر وتی بودشت ءَ کارمرز نہ کنت چیاکہ چاگرد ءَ وتی شگان ءُ ٹاکورانی گوما ایشانی پگری ردوم ءِ راہ بستگ بزاں وتی دیمروی ءِ راہ ما وت گپتگ ـ
مئے گورا بالاچ ھیرو انت بلے نقیبو ءِ نام گرگ نہ بیت ـ پدا ما بیھال کنیں کہ بالاچ ءَ نقیبو ءِ گوما بدقولی کتگ ءُ نقیبو یک وفادار بلوچے بوتگ ـ ھمے پیم آ نسل کہ کم تر زانگ بنت ما گندیں ھرچ جاہ ءَ ایشاں موقع رستگ ایشاں وتی بودناکی پہ شری پیش داشتگ…ھنچوشکہ فیض محمد بلوچ , جاڑوک , قادوک , قاسم آمین , صبا دشتیاری , عطا شاد , سبزل سامی , ن.م.دانش , عمر بلوچ , وقار بلوچ , خالق ڈاڈا , درمحمد افریقی ءُ دگہ بازیں ـ دومی نیمگ ءَ آ کہ شر نسل گوشگ بنت آیانی تہا غدار ءُ راج دژمنانی دراجیں لڑے ھست ـ
اے پگری سسٹم یا راست بہ گوشاں ظلم زوراکی ءُ لٹ پل ءِ سسٹم گوں نعرے بازی ءَ ھلاس بوت نہ کنت ـ نیچرل سائنس ءُ چاگردی سائنس ءَ اے گپ منارینتگ کہ خالص ءُ بہترین نسل ءِ لیکہ دروغ ءِ سرا اوشتاتگ ـ ایشی ءَ ھچ زانشتی بستار نیست ـ مئے گورا نسل پرستانہ بتل ءُ گوشتن سک باز انت ما اول باید ایشانی کارمرز کنگ یل بہ دئیں , دومی کلاسیک شاعری ءِ تجزیہ ءُ تحلیل باید لس مھلوک ءِ تناظر ءَ کنگ بہ بیت , دپتر ءِ تہا گار بوتگیں ٹکانی کار ءُ کرد شوھازگ بہ بنت ـ باید جھد کنگ بہ بیت , ھرچ پڑ ءَ جھد بہ بیت , مارا یک “بی.آر امبیڈکر” رنگیں مردمے لازم انت…
بی.آر امبیڈکر ءَ چے یات اتک….
سال 2012 ءِ قصہے ـ ملیالم زبان ءِ فلمانی سوج کار “جئین چیرین” ءَ “پوپیلون بدھ” ءِ نام ءَ یک فلمے اڈ کتگ ات ـ فلم ءَ داں روچ مروچی مئے “ھمل ماہ گنج” ءِ رنگ ءَ سینما ءِ پردہ نہ دیستگ ـ اے فلم ھندوستان ءِ “باپو” مہاتما گاندھی ءِ سرا اڈ کنگ بوتگ بلے سینسر بورڈ گوش ایت فلم گاندھی ءِ خلاف اڈ کنگ بوتگ ـ
ھبر سپریم کورٹ ءَ سربوت , آزاد ھندوستان ءِ کورٹ ءَ ھم فلم کچرا ءِ ڈبہ ءَ چگل دات ـ بگندے فلمانی گوما ھبّ نہ داروکیں وانوک ءِ دل ءَ جست پاد بئیت کہ پرچا؟؟ گڑا پرچا ءِ پسو ایش انت کہ فلم ءِ تہا پیش دارگ بوتگ کہ “دلِت” گاندھی ءَ بد رد کناں , آئی ءِ بت ءَ سوچ انت , داں اد ءَ باپو ءِ بت ءَ چمپل ءِ ھار ھم گوْرا دے اَنت ـ
سینسر بورڈ ءِ ھون وَ ھشک بوگ ئی ات , جئین چیرین ءَ گوشگ بیت کہ اے سیکوئنس در کنگ بہ بنت بلے آ گوش ایت , راستیں گپ ءَ چیر دیگ منا دوست نہ بیت ـ بس ھما فلمے کہ کپتگ ـ
دلت چہ گاندھی ءَ پرچا نہ وش انت ؟؟
دلت پگر کن اَنت گاندھی ءَ مئے گوما نارواھی کتگ , وھدے دلت رھشون بی.آر امبیڈکر کسان زاتانی بنکی حقانی رکھینگ ءِ کانود ءَ پاس کنائینیت گاندھی اے کانود ءِ ھلاپ شد ھڑتال کنت دانکہ کانود پدا زیرگ بہ بیت ـ گڈسر ءَ امبیڈکر مجبور بیت ءُ کانود ھلاس کنگ بیت ـ آ روچ ءَ بہ گر داں انو دَلت گاندھی ءَ شیطان ءِ نام ءَ توار کن اَنت….چوش مہ بیت مئے مروچیگیں شہ زانت باندا بلوچ راج ءِ “دلتانی” چمّ ءَ شیطان بہ بنت ـ